25
Jimar shuar kajernaiyainakaigka mai jukirum chicham iwartainam ejétin ataarma. Turakrumin apu chichama iwarin aina iruuntrar yáki iturchatan apuja nuna nekawar, shuar iturchatan apujun waittan susartinaiti. Tura chikichnaka iturchatka atsurui tusa waittanka sutsuk akupkartinaiti. 2 Juna takasuka asutnarti timauwa nuna takasmataigka apu chichaman iwarin aina nugkanam aepsarum asutiatarma tusa inamratnaiti. Turamtai ni tunau takasmauwa turusag apu aina emtin asutrartin ainawai. 3 Turasha cuarenta inagkakigka asutiachartin arti, nu inagkaki asutiamu akugka winaka nita patainchua nuninapi iirainawa tu enentaimmainaiti. 4 Vaca trigo neren pakartasa najak wekatauka, jagke jigkattsuk inaisatarma yuati, tusa Moisés israelita ainan tinaiti.*Nuwa wajemamtaigka nina wajerig nuatmainaiti tusa timau
5 Moisés ni shuar ainan chicharuk: Shuar yachintin nuwena pujus uchin akitsuk jakamtaigka, nuwa wajemamtaisha chikich shuarka nuatmaitsui. Antsu nu jeanmag pujuina nuatmainaiti. Tura uchin akia nina yachi uchiriya numamtin amajsatnaiti. 6 Tura yama nagkamchak uchin aishmagkun akiagka nina yachi naari Israel shuar ainanam megkakai tau asa, nina yachi naarinak anaikatnaiti.* 7 Turasha nina wajeri nakitamka, chicham iwartai jeanam apu aina pujuinamunam jeaa, “wina wajeruka nina yachi naariya nu Israel shuar ainanam megkakashti tusagka wakeratsui. Tuma asa nuwa wajemamtaigka nina wajerig nuatmainaiti timauwa nunasha umitan nakitawai”, tusa titinaiti. 8 Takai apu aina aishmagkun untsuk chichamain ainawai, turamsha nakitajai tusa takaigka, 9 apu aina wainmaunam nina wajerin jeari weamakmaurin sandalian juruki, yapinam usukia chichaak: “¡Shuar nina wajerin nuatak uchin akia nina yachi uchiriya numamtin amajtan nakitaka jutiktainti tusa tumainaiti!” 10 Nu turamu asamtai patai nina jeen pujuinaka weamakmauri sandalia jurukmau tutai artinaiti, tusa Moisés tinaiti. 11-19 (-)