Nuwaka yupichu ajapmaitsui tusa chicham umikmau
24
Moisés ni shuar ainan chicharuk: Shuar nuwena pujus nina nuwenian natsanmainan nekaa nakitakka, aya junikka ajapmainchau asa, ajapnaiyaku aatain aar susatnaiti. Tura nuna susa nina jenianka jiiki akupmainaiti.* 2 Nu nuwa ajapam pujus, chikich shuarjai aishrinmainaiti. 3 Turasha chikich shuar nuna nuwan nuatak pujau, nisha nakitakka ajapeajai tusa ajapnaiyaku aatain aar susatnaiti. Tumachkusha aishri jamainaiti.* 4 Nuna tumamtaisha chikich shuarjai aishrina takaniasu asamtai, wapikrurua numamtin enentaimtus iiya asa, yama nagkamchak aishri ajakuka atak awenagka nuatmaitsui. Nunaka Yuus pegke nakitawai. Tuma asamtai atum nuniakrum Yuus nugkan suramsattarum nu pegkerchau amajsairum, atum ainatirmeka tumawairpa.Chicham umiktin ainan nukap aarmau
5 Moisés ni shuar ainan chicharuk: “Shuar yama nuwenaka maaniamunmagka wechatnaiti. Tura nina nuwe atsumamurin takaruk nina jenig pujusag chikichik uwí pujusti tusarum, chikich takat aina nukesha sutsuk inaisatin ataarma. 6 Shuar yuwimramak juakaisha ni senchi atsumtairi ju surusta akirkumin awagtuktajme tusarmeka titin airpa. Nu tusarum jurakrumka ni senchi utsumtairi jurukmau asa tsukai jamainaiti”.
7 Atum ainarum nuiya chikichik shuar ni weantunak pempentuki achik juki nina inatairi amajkaigka, nuna turachkusha achik juki surakaigka, nuka maatarma. Nu turakrum shuar pegkerchau aina atumjai pujuina nuka ijinarum emegkartin ataarma.*
8 “Tura lepra achiimakrum jakrumka, Leví weantu sacerdote pujuina nui jeatin ataarma”.a Tumakrumin wii nitan jintintawaitaj turusag turamkurmin nu metek umiktin ataarma. 9 Egipto nugkanam pujuinati jiintrar jinta winarin, wina umarun Marían Yuus iturkamia nu aneartarma. 10 Shuar kuitan ikatmakai suakmesha, kuit ikatam ju awagturkumin wisha awagtuktajme, tusam nina jeen waintamka ju surusta tusamka tiipa. 11 Nuka tumatsuk aa wajasam nakasta, tumamin nigki juki nina nugkutairinka etegka suramsattawai. 12 Tura shuar atsumin kuitan ikatmak nina nugkutairi jaanchin suramkai jurukmesha kashin tsawakun awagtuktajai, tusarmeka titin airpa.* 13 Nuka turutsuk etsa akatsaig nina janchrigka awagtuktin ataarma. Nu turamu asa nuna nugkur tsetsemtsuk shir aneas kanartinaiti. Turamu asa atum pegker takámun pachis Yuusan aujturmastinaitrume, turam Yuus atumin pegkernum yainmaktinaitrume.
14 “Shuar atsumin aina, atum weantu aina tumachkusha chikich shuar ainaksha, atumi yaaktarin pujuinaka akikchatnaitkurum takamtikiakrum waitkastin airpa”.* 15 Nuka turutsuk ni sumaka yumaintri atsuru asamtai, ni takasmaurigka nu tsawanta nuik etsa akatsaig akiktin ataarma. Antsu nu turachmaka waitat susata tusa Yuusan aujsattawai, turamtai atum chicham metek umiachu asaakrumin Yuus waittan suramsatnaitrume.
16 Uun ainaka nita uchiri tunau takasmaunmagka mantamnachtinaiti. Tura uchi ainasha nina uuntri aina tunau takasmaunmagka mantamnachtinaiti. Antsu tunaun takasua nuke waittanka jukitnaiti.
17 “Chikich nugkanmaya shuar aina, tura mitaik ainasha antrarum waitkastin airpa. Tura nuwa waje aina kuit ikakrumsha, ju kuit awagturkumin awagtuktajme tusamka nina nugkutairi jaanch juruktin airpa”.* 18 Egipto nugkanam aantra inaku waitkatai pujarmin, ina Yuusri jiirmar agkanmamtikramawa nu kajinmatkitin airpa. Tuma asarum wii atumin chicham umiktin ainan yamai tajarum nu metek umiktin ataarma. 19 Tura trigo juwamunam, trigo irumra jigkamu kajinmatkirmesha waketrukrumka jukitin airpa. Shuar chikich nugkanmaya aina, nuwa waje aina, tura uchi mitaik aina jukiarti tusarum nuka jutsuk ikuktin ataarma. Nu metek umiakrumnaka Yuus pegkernum atum takamunam yainmaktinaitrume. 20 Olivo juuwakrumsha, chikich nugkanmaya shuar aina, uchi mitaik, tura nuwa waje aina nu jukiarti, tusarum ashi jutsuk waketrukrum juutsuk ikuktin ataarma. 21 Uva aina juuwakrumsha, chikich nugkanmaya shuar aina, uchi mitaik, tura nuwa waje aina nu jukiarti, tusarum uva jigkai juakaru ainaka waketrukrum jutsuk ikuktin ataarma. 22 Egipto nugkanam aantra inaku waitkatai pujarmin jiirmarua nu kajinmatkitin airpa. Turamu asarum wii tajarum turusrumek shuar waitin aina nuka pegkernum yaigtin ataarma.