15 Chikichik shuar etserkaigka nekaspapita tusarum titin airpa, antsu jimar tumachkusha tres shuar etsertuinakai shuar magkartua tumachkusha tunaun takasu akaisha waitat susatin ataarma. 16 Chikichik shuar pegkerchaunak takastasa wakerin asa, chikichan tsanumrak chichaak: Ju shuar Yuusan pachis pegkerchau chichawai, tusa takaigka 17 Yuus ememattasa iruuntai jeanam mai weartinaiti. Tuma jeawarmatai sacerdote aina, tura apu chichaman iwarin aina iruuntrarmatai Yuusa emtin chichakartinaiti. 18 Nu tumawarmatai apu chichaman iwarin aina nu shuaran nekaspash ta tusa shir inias iisar, aantar waitrak tamaurin nekawarka, 19 ni chikich shuaran tsanumruran waittan susatjai tu enentaimrauwa turusag nina tuma waittan susartinaiti. Shuar aantar waitrin aina nuka turakrum ijinatin ainarme. Nu turamka atuminka pegkerchauka atsutnaiti. 20 Nu turamun chikich ainasha nekawar, nitaka nuna ashamainak aantra tsanumtanka inaisartin ainawai. 21 Shuar magkartuamtaigka nisha turusrumek maatarma. Shuar chikichan jiin emesturmataigka nisha turusrumek emesturtarma. Shuar chikichan nain kupirkamtaigka nisha turusrumek kupirkatarma. Shuar chikichan uwejen kupirkamtaigka nisha turusrumek kupirkatarma. Shuar chikichan nawen kupirkamtaigka nisha turusrumek kupirkatarma.^*