32
Wii chichakai nayaimpia, shuara numamtuk,ame anturtukta.
Wii chichakai nugka shuara numamtuk,
ame shir anturtukta.
2 “Wii jintinkartamuka yumi yutina numamtuk atii tusan wakerajai.
Wii chichamuka yumi chirichirinam sanarak awa numamtuk atii tusan wakerajai.
Wii chichamuka yumi saratuk saaknum kakena numamtuk atii tusan wakerajai”.
3 Wika Yuusa pachisan chichakun:
¡Atumsha ina Yuusri pegkera nu, tura shir senchirtina nuke eme anentsa iiyakrum ememattarma! tusan titatjai.
4 Nigka muchig umuchmainchauwa numamtinaiti.
Ashi ni turamu aina nuka pegker ainawai.
Ni takámu ainaka pegker ainawai.
Nigka Yuus nekasa nuna tuke chichauwaiti.
Nigka waitrichuiti.
Nigka pegkeraiti.
Tura nekasa nunak chichauwaiti.
5 Wina pataar ainata atumka shuar pegkerchau ainarme,
pegkerchau takákrum Yuus akajearme.
Atumka nina uchirigka, tura nina nawantrigka amaitsurme.
6 Yuusjaigka anigka nakurumaitsurme.
Atumka yachachu, tura enentaimkachu ainarme.
Niyaiti atumin najatmaka, tura niyaiti atumin aparigka,
Niyaiti atumin najatma napamtamak senchirtin amajtamsauka.
7 Yaunchuk atumi uuntri aina urukawaruk aina nu enentaimtusrum iistarma.
Yaunchuksha pujutcha urukuk aya tusarum atumi, apari aina, tura untach ainasha, iniastin ataarma. 8 Yuus ashi apu ainan nagkasauwa nu,
Israelita uchiri ainan urutma nukapek ajakuit
nunaka turusag akanar nita pujumainan
tusa inka etegtamrauwaitji.
10 Aya nugkanmag entsa atsamunam,
nase umputainam ashammainnum pujamun,
Yuus nekau asa kuitamramkattsa ni juramkinaitji.
Nutikrama asa shuar nina jiin shir kuitamna numamtuk
pasugnum patatun jiiki nanamtan unuimak wekakai
kuitamuk wekatau pimpiki iyakai nugkani juarki
nugka mura ainanam juramkinaitji.
Árak ainancha yuawarti tusa suramsaurme.
Napa yumirin umararti tusa muchignumian suramsaurme.
Tura nugka kayarkamunmayan olivo aceiterincha suramsaurme.
14 Atumi vacari ainan muntsuri ijurkarum,
tura oveja ainan muntsurisha umaru ainarme.
Basán nugkanmaya oveja nuweram aina,
oveja tsakat nuweram aina maarmesha yuawaitrume.
Trigo shir pegker ainajai yutai najanamu ainasha yuawaitrume.
tagku aina nukap napamkarum,
tura árak ainasha nukap ararum
nu aina yuina asarum, senchi nuwekurme.
Imanika nuweku asarum,
tagku nuwer uresha shir winchamtin jas
nina kuitamnun pempentuki kajerna numamtuk,
Yuus atumin najatmawa nuka atumka nakitrarum inaisaurme”.
Yuus atumin kuitamramak uwemtikramrau aig
atumka kajerkauwaitrume.
16 Atumka chikich shuar yuusrimtai aina nuna
Yuus nakita nu eme anentsa iiya asarum,
emematmaina nu inaiyakrum,
iwanch aina eme anentsa iiyakrum
yuus atii tusa najanamu aina nu
eme anentsa iiyakrum tagku aina maarum
epearme.
Atumi uuntri ajakarua nusha
wainkachmau, eme anentsa ii jakchamu
yamai wainkarum eme anentsa iiyarme.
18 Wina pataar ainata ina ayamrutmau,
ina Kuitamramna nu kajinmatkin ainaji.
Yuus pujutan suramsauwa nu kajinmatkin ainaji.
19 Atum turamu asa Yuus,
nina uchiri tura nina nawantriya numamtin,
amajtamsamun atumin kajertamak inaitamsauwaitrume.
20 Nuna turutma asa Yuus chichaak: “Nitaka shuar pegkerchau ainawai”. Nitanka umikartatuapi tusan tumain nekapeatsjai.
Tuma asan yaitsuk inaisartatjai.
Turan urukawartig, tusan nakasartatjai.
21 Atumka ina yuusri atii tusa najanarum nu
eme anentsa iiyakrum winaka akajtarme. Tuma asaakrumin israelitachu ainan uwemtikattajai, nuna turakai atumka ayatik akasma pujuttarme. Tura chikich shuar wina chichamrun imatikas nekachu ainancha shir nekamtikan uwemtikattajai. Nuna turakaisha atumka ayatik kaje pujuttarme.*
22 Wii kajeamua nuka ji keena numamtinaiti.
Ji keak ashi aesna numamtuk,
wii kajekmataigka nugka init shuar jina matsamtai a nusha,
ashi nugka nagkatkamu ainanam árak aina iruna nu,
shuar nagkin eketak nina shuarin iju maina numamtuk,
Jata ashammain iyantramar ijitmattarme.
Atumin yuramatnun kuntin yukartin ikamia ainan akupturtatjarme.
Tura atumin asatmi mantamatin ainan nápi magkartin ainancha akupturtatjarme.
25 Atumi uchiri ainaka jinta weká maam artatui. Tura jeanam pujuinasha shir senchi sapijmainak jartatui.
Uchi aishmag aina, tura uchi nuwa ainasha jinawartatui.
Untach aina, tura uchi kuirach ainasha jinawartatui.
26 Jakacharu ainatirminka atakea nuisha enentaimturchatnun chikich nugka ainanam napamkan ishiakan emegkartasan enentaimturuitjarme.
27 Turasha atumi shuari aina pegkerchau chichainamun
antutan nakita asan turachmiajrume.
Wii atumin turamtai atumi shuari aina ememas chichainak:
“Yuuska turachuiti.
Auka ii ina senchirijai turawaitji, tusar tumain asarmatai turachuitjarme”.
28 Atum Israel shuar ainatirmeka enentaimkachu,
atum pegkerchau takasmaunam waitarme nu
tura nuiyasha urukatnuk ainarum nusha nekamain ainarme. 30 Shir enentaimsarum iistarma: Atumi shuari chikichik suntaraitak atumi suntaari mil ainan nepetak etsekearua nunaka wii atumin kuitamnaitaj nuna tsagkamkau asamtai turutma ainarme. Tura atumi shuari aina jimarchikitak atumi suntaari diez mil ainan nepetak etsekearua nunasha wii atumin tsagkamkau asamtai turutma ainarme.
31 Ina shuari ainaka nita yuusri ainanka,
ina Kuitamramin senchirtina imauchu aina nunaka shir nekainawai. 32 Ina shuari ainaka yaakat Sodomanmaya, tura Gomorranmaya shuar pegkerchau ajakarua nujai metek shir pegkerchau ainawai. Tumau asar uva pegkerchaun yapau, yuarka jamaina iman ainawai. 33 Nita umutairi vino ainasha
nápi asakrati magkartina iman ainawai.
34 Israelita ainatirmin, tura atumi shuari ainajaimak wii turattsan enentaimtajrum nunaka chikichkiksha pegke kajinmamtikrumain ainatsui. 35 Wiyaitjai pegkerchaun takartusaru ainan ikkatnunka.
Wiyaitjai nita waitat jukitin timauwa nuna susartinnaka.
Pachiachmau nitaka nepetkamu artinaiti.
Nita waitat jukitin timauwa nuka tsawan ashi jeawai.
Nita waitat jukitna nuka tsawan wári jeattawai.
36 Atum wina pataar ainatirminka kakamainchau wainu asa, Yuus nitanka ayamruktinaiti.
Antra inatai ainan, tura inashtai ainajaimak ashi ijinamu asar, ayamrumamainchau nekapeakaisha wait anentar nitan yaigtinaiti.
37 Ina tiragke ainan Yuus chicharuk:
Atumka ina yuusri aina yainmaktatji tusarum tujakuitrume.
Turasha nitaka atumnaka pegkesha ayamrutmakchattarme.
38 Atum yuusrimamu aina eme anentsarum iiyakrum, tagku aina maarum epeakrum nuna kuntuti sujakuittrume.
Tura vinosha sujakuittrume.
¡Atum yamai waitarum nunasha nu aina yainmakarti!
¡Nu aina tawar atumin ayamrutmakarti!
39 Shir enentaimsarum yamai iistarma,
wiyaitjai Tuke Puju tutainka.
Yuus chikichka pegkesha atsawai.
Wikitjai pujutan sukartinnaka,
tura wikitjai jakati tusan tsagkamkartinnaka.
Wikitjai jainak waittsarti tusan tsagkamkartinnaka,
tura wikitjai esekartinnaka.
Wii waitat sukartamun uwemtumainka pegkesha atsawai.
40 Wina uwejrun nayaimpinmani takuin,
titatjai: “¡Wika Yuus Tuke Pujuwaitjai! Wii taja nunaka nekas umiktatjai.
41 Wina kuchiirun mai yantamen shir atsakan umikjai,
nuna jukin pegkerchaun takaina nuna waittan susartatjai.
Wina kajertin ainan nita jumaina turusnak waittan suakun,
wina shuarmataina nunasha ikiakun waittan susartatjai.
42 Tura asan nitan ijinkun wina nagkirnaka aya numpak amajsattajai.
Tura wina kuchiirujai shuar ainan iyashin nukap tsupirtatjai.
Shuar achira yaruakmau ainan wina nagkirjai ijinattajai.
Nita apuri achikar yaruakmau ainancha wina kuchiirujai muuken tsupirattajai”, tusa tinaiti.
43 “Ashi nugkanmaya shuar ainata Yuusan umirin aina nujai iruuntrarum shir aneastarma.
Ninu aina ijitamu asa nisha turusag nitancha ikiak ijinattawai.
Ninu aina ijitamu asa nisha turusag nitancha ikkattawai.
Ninu ainanka nita pegkerchau takasmaurincha tsagkurattawai.
Tura ninu ainan nugkencha pegkerchau jasu akaisha pegker amajsattawai. 44 Nu kantaka nunis awai, nina patai ashi antuinamunam tinaiti. Tura Nun ajakua nuna uchiri Josuésha nijai pujujakuiti”, tusa Moisés tinaiti.
Moisés akatmamramu
45 Moisés ni shuar aina ashi antuinamunam kantamtain chichas umikuiti. Tura nina patai ainan chicharuk: 46 “Wii yamai atumin jintintajrum nu shir antukrum unuimartarma. Tumarum atumi uchiri ainasha jintintatarma, turamu asar chicham umiktin aina nuna umikarti. 47 Chicham umiktin aina nuka aantrachuiti, ju chicham umiakrum atumka iwáku pujuttarme. Nu umiakrum entsa Jordán amain katigkrum nugka jukirum pujakrumsha nukap uwí pujustinaitrume”, tusa Moisés ni weantu ainan tinaiti.
Yuus Moisésan Canaán nugkan inaktusmau
48 Nu tsawanta nuik Yuus Moisésan chicharuk:
49 “Nain Abarim tutaiya nui nain aina iruna nui wetá, tumam moabita ainan nugken, Nebo naintri a nui wakata. Nuka yaakat Jericójai iinias awai, tumam nui wajasam amina pataim ainan Canaán nugkan wii susartataj nu iista. 50 Ame nainnum wakattam nui, ameka jakattame. Tumam amina yatsum Aarón, nain Hor tutainam jaka nina patai aina jinaawarujai iruuntrauwa tumasmek amesha jakam amina pataim aina jinaawarujai iruuntrattame. 51 Ameka pataim aina yumi pukuni jinu Meribá-cadés tutaiya nui entsa umumain atsakai chichamruinakai, nu turatarma tusan wii aya nugkanmag Sin tutainam tinaitjarum nu mai umikchau ainarme. Pataim aina entsa umumain atsakai entsa umartin sukartusta tusa chichamruinakai ni suramsattaji tusarum wina eme anentramu nita emtin iwainakchau ainarme. 52 Nu tuma asam, amina pataim ainan nugkan wii susartataj nu ikag wainkattame. Turasha ameka nuigka jeashtatme”, tusa Moisésan tinaiti.