Nina patai doce tribu ajakarua nuna Moisés pegkernum chicharkamu
33
Moisés Yuusa chichamen juki etserin ajakua nu, eke jatsuk pujus nina patai ainan pegkernum chicharkamu. 2 Jutikas tinaiti:“Yuus ijai pujustasa nugka Sinaí tutai murariin taawaiti”.
Tuma Seírnum nagkama etsantrauwaiti.
Tuma nina tsaaptintrigka Parán nugkanam nain irunmaunam jeawaiti.
Meribá-cadés nugkanam nain irunmaunmasha jeawaiti.
Chicham umiktin aarmaun kean nina untsur uwejejai takus taawaiti.
Nayaimpinmaya shuar maanitan yacha ainajai taawaiti.
3 Yuuska shuar ninu aina nunaka aneawai.
Ni etegkramu aina nunaka kuitamui,
nu aina nuka Yuusan umirainawai.
Tura ni umiktarma timauwa nunasha wakerusar uminawai,
tusa Moisés tinaiti.
4 Chicham umiktina nuna Yuus wina surusuiti.
Nuna jukin Jacob weantu ainatirmin susauwaitjarme.
Nu chicham umiktin shir pegkera nunaka ima inak suramsauwaitji.
5 Ii shuar apu aina ashi iruuntrauwaiti.
Tura Israel ajakua nuna uchiri chiki chikichik tribu ainatiram ashi iruuntrauwaitrume.
Tumawakrumin chicham umiktin ainan Yuus suramsauwaitrume.
Tumarum Yuus atumin apuri amajsauwaitrume.
6 Rubén weantu ainan Moisés pegkernum chicharuk:
“¡Rubén weantu ainaka ishichik ainawai!
¡Tumau akusha jina megkakashtin atii tusan tajai!”
7 Judá weantu ainan Moisés pegkernum chicharuk:
“Yuusa, Judá weantu aina amina aujtamainakaigka umirkarta.
Chikich israelita aina pujuinamunam ataksha irumratin atá.
Nina shuari ainajai maaniakaisha amina senchirmijai ayamrukartin atá”.
8 Leví weantu ainan pegkernum Moisés chicharuk:
Yuusa, Tumim tura Urima aina nuka aminu ainawai.
Nu aina nuka, Leví weantu sacerdote aina amina chichamrumin metek umirtamin asarmatai susaruitme.
Nugka Masá* tutainam Leví weantu aina ame nekapsauwaitme.
Turakum nuu nugkanmag Meribá* tutainam chichamrumin umirtamkacharu asarmatai nukap chicharkauwaitme. 9 Nuna tumawa ainaksha yamaika, Leví weantu ainaka chicham umiktarma tusam ame tinaitam nuna metek uminawai.
Ame nitajai chicham umikuitam nuna shir senchi wakerus uminawai.
Tumaina asar nita patai ainan nagkasau amina ima senchi enentaimturmainawai.
Amina eme anentramas umirtamainak, aparin, nukurin, yachi ainan tura uchiri ainancha nekashtaijai metek amajainawai.*
10 Ii Jacob weantu ainatin ame wakeramu aina nuna,
jintintramainaka nita ainawai.
Ii Israel shuar ainatin chicham umiktin aina nuna pachis jintintramainasha nita ainawai.
Amina eme anentramas iirmainak patasa epetai amaunam, tagku ainan epenawai.
Incienso ainancha epenawai.
11 Yuus, nita pegkeran takaina asarmatai nitasha pegkernum yaigkarta.
Nita takainamusha pegker enentaimtusta.
Nita shuari ainaka ame nepetkata.
Tura atak awenawar nitan kajerkacharti, tusa Moisés tinaiti.
12 Benjamín weantu ainan Moisés pegkernum chicharuk:
“Yuus Tuke Pujuwa, Benjamín weantu ainaka
amina anetairam ainawai.
Nitaka waitkascham agkan shir pujusartin ainawai.
Ame ashi senchirtin asam, nitaka tuke kuitamkatnaitme”.
13 José weantu ainan Moisés pegkernum chicharuk:
Yuusa nita nugke, pegkernum chicharkata,
yumi yutak nita nugken kakeniarti,
tura nugkanmaya entsa ainasha initia jiintrarti.
14 José weantu ainaka nita
arakmamuri ainan,
chiki chikichik uwítin
árak juut tsawan jeakai árak ainan
shir pegker ainan juwartinaiti.
15 Nita weantu ainaka nain yaunchukia ainanam
arakmawar nukap jukartin arti.
Tura nain tuke irunnunam arakmawar shir nukap
jukartin arti.
16 Nita nugkenka árak shir pegker aina piakartinaiti.
Tuma asamtai ni weantu artina nusha imanisag arti tusam yaigkarta.
Ame númi shikapchich kanaknarin keamunmaya wantinturkam,
ame etegkamu aina nuna yaruak umati tusam etegtuawaitam turusmek,
José weantu ainaka ii shuar once tribu ainan
apuri arti tusam etegkauwaitme.
17 Josén uchiri,
Efraín tura Manasés ajakarua nuu weantu ainan suntarigka shir nukap artinaiti.
Iman asar nitaka pegkesha nepetmainchau artinaiti.
Manasés weantu ainasha maanin ainaka
shir nukap artinaiti.
Nu aina nuka vaca aishmag yama nagkamchak akina
senchirtina imanu ainawai,
tura búfalo senchirtina imanu ainawai.
Nitaka imanu asar,
nita shuari chikich nugkanam jeashat matsamin ainancha
ashi ijinawartinaiti.
18 Zabulón weantu ainan tura, Isacar weantu ainan Moisés
pegkernum chicharuk:
“Zabulón weantu ainatirmeka,
chikich nugkanam wekasarum warí aina suritin asarum shir aneastarma.
Tura Isacar weantu ainatirmeka
carpa jeamkarum pujakrumsha tagku aina napamkurum shir anetin ainarme”.
19 Nita patai ainan ipaawar chikichik nainnum wakartin ainawai.
Tumawar ame turatarma tusam tinaitam turusarag tagku ainan maawar epeawartin ainawai.
Nunaka nayantsa yaikmirin warí shir pegker ukmau ainan kutsainiar yaruakaru asar turawartin ainawai.
20 Gad weantu ainan Moisés pegkernum chicharuk:
“¡Gad weantu ainaka nugka uun susatnaitme. Turamu asar maaketi tusar amina turamiartin ainawai!
Gad weantu ainaka uun yawa kuntinan nakak asai kunturi ainan, tura mukencha tsupirna numamtuk
nita shuari ainanka nepetiartinaiti”.
21 Gad weantu ainaka ame timaurmin metek umikaru ainawai.
Tura israelita ainanmasha pegker iwainmamkaru ainawai. Tumawaru asarmatai nitaka Canaán
nugka akantra chiki chikichik tribu suamunam,
nitaka apu aina juinamujai metek nugka uuntan jukiartin ainawai.
22 Dan weantu ainan Moisés pegkernum chicharuk:
“Dan weantu ainaka uun yawa tsakat kuntinan asaittsa tsekenna numamtuk,
nita shuari ainajai maaniakka nugka Basánnum nagkama patatuk ijinattawai”.
23 Neftalí weantu ainan Moisés pegkernum chicharuk:
“Neftalí weantu aina nuka ashi ame wakeramu aina nuna takainawai.
Tumaina asarmatai nukap pegkernum yaigkarta”.
¡Ii shuar ainatin nugken kucha uun a nuka nugkani tura etsa akatainmani nitanuk atatui!
24 Aser weantu ainan Moisés pegkernum chicharuk:
“Aser weantu ainaka Jacob chikich aina nu nagkasam pegkernum yaigta.
Nitaka ina patai chikich tribu aina nusha anetai arti.
Nitanuka olivo ainasha nukap au asamtai,
aceiterisha nukap ariti”.
25 “Nita shuari aina waimainchau, nita yaaktari waitiri ainaka hierro, tura bronce ainajai shir epentramu artinaiti. Nuna tura asa tuke senchirtinak artinaiti”, tusa Moisés tinaiti.
26 Nuna tusa Moisés inagnak chichaak:
“Ina Yuusri pegkera imauka chikichka atsawai.
Nigka ina yainmaktasa nayaimpinmaya wári wininaiti.
Nigka apu shir uminas winina numamtuk tuke wininaiti”.
27 “Yuus atumnaka
ayamrutmaktinaitrume.
Atumnaka nina senchirijai tuke kuitamramkatnaitrume.
Atumi shuari ainancha awakak etsekeartinaiti.
Atumi shuari aina ijinatarma tusa turamtinaitrume.
28 Wina pataar ainatirmeka ashamkartutsuk shir aneasrum pujustin ainarme.
Atum weantu artina nusha agkan shir pujusartin ainawai.
Atumi nugke ainanmagka trigo tura uva ainasha shir nukap atinaiti.
Sanasha nayaimpinmaya tuke kakeniartinaiti.
29 ¡Wina pataar ainatirmeka shir aneastarma!
Atumjai metek ainaka chikich shuarka atsawai.
Yuus atumnaka uwemtikramrauwaitrume.
Ni ayamrutmarme, tura nigki yainmarme.
Niyaiti atumi shuari ainajai maaniakrumnasha nepetmatan suramsatnuka.
Atumi shuari ainaka maniachmi tusa turamiartinaiti.
Tuinakaisha atumi shuari ainaka atum ijinatnaitrume”, tusa Moisés nina patai ainan tinaiti.