Malkizedek Fərist
7
Malkizedek na təl Salim cha, ana fərist nə Hyel nda ndiya na dəgaləu. Cha ɓə na Ibrahim kwa ɓəl shili tə mbwar pa ka alenya təl ahir cha kura nda. Nda nda ɓəa, ngə Malkizedek tə səkə nyi papa'akur. 2 Ngə Ibrahim tə nənyi zhang ku kuma nə kala səu. Sənda tləm Malkizedek ngə təkər nacha ngə, “Təl tsa'atsa'akur.” Ya tsəu “Təl Salim” nacha ngə “Təl piyarɗufəu.” 3 Malkizedek a da cha na ada ndara ama wa, ya a da cha na jul ma'a wa. Ya a da cha na pəchir yah ndara pəchir tə wa. Wi Zər Hyel, cha ngya ka fərist ba'anawa.4 Ndzamar ma chulkə dəgalkur nda cha ni. Nda ma'a Ibrahim nda jival kəmən tə nənyi zhang ku kuma nə kwazhalɓi nda cha fa'aya ku pa. 5 Wi nda gadlagadla tə na nyandəla Levi inda tə ɗa ka fərist nda kwa dləutsə zhang ku kuma tsa nji, nacha ngə ka zamən nda, madangə na nda ma'a nyandəla Ibrahim nda. 6 Kəl ja, ndə na, a da cha nyandəla Levi wa, dəhə ka ənga cha dləutsə zhang ku kuma tsa Ibrahim ga səkə nyi papa'akur, nacha nda nja mərtə nyi alkawal. 7 A kəpal da wa ndə nda dəgaləu tə səkə nyi papa'akur nə ndə nda kushiu. 8 Ku vanya laku zhang ku kum nga nji'inda kwa kuɗə ngə kwa dləu wa. Kəl ja, ku vanya laku Malkizedek nda nja bəza, tsəutanyi na pi. 9 Ya nji kwa nau na ənda Levi, nda dləutsə zhang ku kuma, tə kinda zhang ku kum təwa Ibrahim. 10 Aka ku bəji nda Malkizedek tə ɓə na Ibrahim nda, Levi tsəutanyi ku dza jival nyi.
Yesu wi Malkizedek
11 Gadlagadla Musa tə na fərist kwa shili təwa nyandəla Levi. Macha njo uya tsa'atsa'akur təwa fərist nda tə biya ku nyandəla Levi ya, mya gwa'atə tsəutanyi njo gwa'a vanya fərist cha shili wi ngə tə Malkizedek a da wi Haruna wa? 12 Aka ma nja shar chulkə fərist, a ɗatə təku njo shar gadlagadla tsəu. 13 Nacha nda nja kwa ɓwanya ingə təkər na, jul pam cha, ya ndə da ku jul nda, da ta mər tlər tə dzəgana wa. 14 Aka a tə babal cha ənda Tlakən mən cha biya ku nyandəla Yahuda, ya aka jul nga sə da Musa na təkəra fərist i wa. 15 Ya sənda ea na ndiyatə ɗa tə babal ma vanyi fərist tə chabiyadza, nda wi ngə tə Malkizedek, 16 nda tə ɗaka fərist a da təwa lakur gadlagadla ana nə jival nyi wa, kəl ja, təwa gyalkur pi nda pa'a kwa tah. 17 Aka bəzəya tənji ənda,
“Fərist kə ba'anawa,
wi ngə tə Malkizedek.”
18 A fiya tənji gadlagadla tangərma nda tə pəlakəu, aka təutətəutənyi cha ya sakəda nyi da wa. 19 Aka gadlagadla da kwa mərtə madami tsa'atsa'a wa. Nacha gwa'atə nja ɓatliya vanya fəkər, nda təwari məno ɗa ləhə dza Hyel.
20 Ya Hyel tə mər ngawa səu ana səmfəla. Alenya nji tə ɗa ka fərist a da na səmfəla wa. 21 Kəl ja, nacha, cha ɗaka fərist ana səmfəla nda Hyel tə na,
“Tlakə səmda tə fəla,
ya a da cho shar nya cha wa,
‘Nakə fərist kə ba'anawa.’ ”
22 Aka səmfəla na, Yesu tə ɗa ka ndə nda ta'i ka mən ga məna uya alkawal nda ndiya mənakəu.
23 Ɗakaɗa chulkə fərist da ɗanghəu, ya dəhə nda kuɗəti. 24 Kəl ja, Yesu tə ɗa fərist ba'anawa, aka nacha na kərnyi ana pi cha ba'anawa. 25 Aka ənga cho nau dləuya nji pa'apa'a, nji'inda tə shili da Hyel təwa nyi, aka wa'atanyi cha kwa gədi kanda.
26 Chulkə ngə na gau fərist kwa nə mən sənda məno gwa'a, nacha nda karti, kəla bikəu, chichinyi, nda nja həbiya tsa səpəla'a nda nji kwa məra, nja hətə nyi səli dəgal matsa dəhə sə'inda kya huɗamələm. 27 Nacha a da cha wi alenya gau fərist ingə wa, a da cho gwa'a kəl cha maka hatəmachi wa'atanyi, tangərma ka nənyi na səpəla'a ahir nga nə nji wa. Kəl ja, cha handa təmachi ka səpəla'a kənda zhaka zhang tanyi, aku bəji nda cha lətə kərnyi. 28 Aka gadlagadla kwa fiya nji təutətəutə ka gau fərist; kəl ja, səmfəla nda tə shili ahir gadlagadla nda, tə tabiya Zər, nda nja mərtə tsa'atsa'a ba'anawa.