Gau Fərist nə Taɗər Alkawal
8
Kəra ɓwanya kəmən nacha ngə, gau fərist da tsamən nda na ngya tə chisəma dzəga təlkur nə ndə nda Ndiya Gyalkur kya huɗamələm, 2 nda kwa mər tlər ku mbwa nda ndiya na kartikur, vi həsəli nə jirijiri nda Tlakə təkərnyi nga ɓatla, a da ndə wa.3 Kala gau fərist nda nja tabiya ka ga cha hatəmachi ana lə ga'a, a ɗa tə tuku nənyi tsəu cha uya sənda cho hatəmachi ni. 4 Macha a tə dunəya cha, a da cho nda ɗa fərist wa, aka alenya fərist da nda kwa lə ga'a wi nda gadlagadla tə na. 5 Nda kwa mər tlər ku mbwa nda ndiya na kartikur, ya nacha ngə pabiya ana shanguɗa sənda kya huɗamələm. Nacha gwa'atə nja tsau nyi bar nə Musa ku bəji nda cho gwa'a ɓatlə madləɓa ka mbwar ngya Hyel, ənda, “Ka zəndə ka ɓatliya sə cha ɗa məlməl na sənda nja chabiya nghə kya təkəra mə nda.” 6 Kəl ja, tlər nda nja nənyi nə Yesu ka cha mər ndiya tə tlər fərist i'i, əngə tanyi tsəu mbandər nda ɓatliya pama Hyel na nənyawa nji, ndiya tə mbandər ɗəɗəm nda, aka nja dzəguya nyi tə alkawal nda tə ndiya.
7 Aka macha nda ɗa a səda ɗimi na tangərmar alkawal nda wa, a da cho nda ɗa njo gwa'a vanyi wa. 8 Kəl ja, Hyel tə uya nji na bikəu, ga na,
“Bəji kwa shili,
ənghwandə Tlakəu,
bəji nda yo mər
taɗər alkawal
ana njir Isra'ila
ana njir Yahuda.
9 A da cho ɗa wi alkawal
nda ya mər
na jival kənda wa,
aku bəji nda ya gəzəya cha nda
ka ya fa'abiya nda vu Masar,
aka a da nda ɗa na jirikur
nə alkawal ɗa wa,
nacha gwa'atə ya shar nda dagəryi,
ənghwandə Tlakəu.
10 Janə alkawal nda yo mər
na njir Isra'ila
ahir bəji nda,
ənghwandə Tlakəu.
Yo fəu gadlagadla ɗa ku jigadəma kənda
yo tsəfətə ku ɗufwa nda.
Yo ɗa ka Hyel kənda,
ya nda kwa ɗa ka na'a wa nji.
11 A tsə'u ndə da kwa dlədləɓə nə
təwul nyi wa,
ndara nə zamə nyi wa,
kwa na,
‘Ka zəndə Tlakəu,’
aka dəhə nda nda kwa zəndə ɗa,
fwatə tə ndə nda kushiu yi tsa'a tə
ndə nda dəgaləu.
12 Aka yo farbikər pəla'akur kənda
ya a tsə'u yo ɗənghatə səpəla'a kənda
səkə wa.”
13 Təwa nga alkawal nənnə “taɗəu,” cha mərtə tangərmanyi nda halhalənyi. Ya kala chulkə sənda ɗəɗəmənyi kwa hala, ya ɗəɗəu tanyi cho sa.