6
Aka əngə ja, ngwa mən da ngya kəl ka dlədləɓə inda tangərma təkəra Kəristi wa. Kəl nda məna biyama na həa, ngwa mən ngya kəl ka ɓwanya təkəra tubi tsa sə'inda kwa yi na ndə yo tah, ana jirikur nda ku Hyel, 2 ana dlədləɓə təkəra baɓtisma, fəkər chi, hya'atər nji kuɗəkuɗa, ana nəuma nda ba'anawa wa. 3 Ma Hyel tə i, məno biyama na həa.4 Nji nda tə ngyar jirikur kənda, ga ɗar ga'ar huɗamələm, nji'inda tə uya papa'akur Shanguɗə Karti, 5 nji'inda tə ɗar mənakəkura ɓwanya Hyel ana gyalkur nə bəji nda kwa shili, 6 ma nji wi ingə tə tyati, cho ɗa dza'u nda ɓəl shili ku laku səkəu. Aka nda sa, a chartə nda kwa ɓəla kukwanda Zər Hyel səkəu, ana nda kwa fiya nyi a mar nji ka sər kuzhi.
7 Hə'i nda par kwa təɗa ti wa'atanyi kwa tsandə səu, kwa mər sakəda nə nji'inda kwa zwa nyi, chulkə ngə na hə'i kwa dləutsə papa'akur Hyel. 8 Kəl ja, hə'i nda kwa tsandə shikəɗi ana jigwal nda pəla'a a da cha na sakəda wa. Chulkə ngə na hə'i, Hyel kwa shu'unda nyi. Aku udiyanyi hu'u kwa ngəɗənda.a
9 Madangə eo ɓwanya əngə ja ka bazhi nda yo nyida, a da ea na kərmətlə təkəra hi wa, ya a da ea na kərmətlə təkəra sə'inda hya kwa məra nda kwa char dləuya kəhi wa. 10 Hyel ndər mər sə tsa'atsa'a cha. A da cho far tlər kəhi, ana nyida nda hya char nyi, ana vala nda hya vala njir nəu wa, ya hyo biyama na vala nda. 11 Eo i kala ndə ku pama hi cha biyama na mər ənga tsa'a yatə udiya nyi, ga hya mərtə fəkər kəhi cha ɗa vəlvələu. 12 A da eo i hya ɗa kukufə wa, kəl ja, hya nəu ba'ada nə nji'inda tə nənyi jiri, nda səsə'ua ga uya fa'aki sənda Hyel tə mər alkawal.
Təkəɗəkura Alkawal Hyel
13 Aku bəji nda Hyel tə mərtə nyi alkawal nə Ibrahim, manda vanya ndə da ndiya nyi na dəgalkur nda cho səmfəla nə wa ngə cha səmfəla na kərnyi, 14 cha na, “Jiri yo səkə nghə papa'akur yo mərtə nyandəla kə ɗanghəu.” 15 Ahir nda Ibrahim tə səkə na səsə'ua, cha dləutsə sənda Hyel tə mər alkawal.
16 Nji kwa səmfəla na tləmər vanyi ndə nda ndiya nda, ya səmfəla kənda a ngya ti, ya kwa hənda dəhə kəpala. 17 Hyel i tə cha char tə babal ənda a da cha kwa shar jigadəma nyi təkəra sə'inda cha mər alkawal wa, cha chabiya tə babal ənda nji nyi kwa uya sənda cha mər alkawal, aka ənga cha səmnda fəla. 18 Hyel tə mər sə mətləu, alkawal nyi ana səmfəla nyi. Sə mətlə ingə da kwa sha wa aka Hyel da kwa tla gəzhi wa. Aka ənga ja, namən nda tə uya mbwar mbu da cha, məna kwa uya tsəɗufəu gagaɗa ma məna gəziya fəkər ngə tsa'anyata. 19 Fəkər nga nacha ngə sənda kwa gəzə ɗufəu, ta'ita'inyi ya ɓəlaɓəlanyi. Nacha ngə kwa gwa da gwa tsa'a yahir miɗi nə Mbwa'alə Hyel. 20 Mbwa nda Yesu ndə nda tə yi təvi namən, tə gwa nyanə mən. A ɗatə cha gau fərist nə ba'anawa, wi ngə tə Malkizedek.