3 Əngə tsəu ka dəkətə nyi nə mahi'i wawa'a nda ngya tsa'atsa'a. Əngwa nda da tləɗa alenya nji ndara nda sa sə sasa wa. Kəl nda nda dlədləɓə sənda mənakəu. 4 Tuku mahi'i wawa'a ingə dəkətə nyi nə ku'i mahi'i ɗəuɗəuwa nda nyida shili kənda ka nguli kənda, 5 nda ngya chaməu ana dəma, nda tsamartə ki kənda, nda mər mənakəkur, nda ɗa kəriwa nə shili kənda, nja da ba'a həyatə ɓwanya Hyel.

6 Ətsəu, ka təɗəhima nguli shili nda na ki, nda zəndə ənda nda kwa ngya. 7 Nakə tsəu, tuku ka ɗa ka sər dlədləɓə nənda ku dəhə sə təwa mər mənakəkur. Ku dəhə dlədləɓə nghə ka ɗa na jiri ya tsa'anyata. 8 Ka pə jiri, nja da ba'a uya sər ngəl ku dlədləɓə ngha. Təwa ənga njir kəpal mən kwa sa kuzhi, nda kwa tar səɗimi nda nda kwa pə təkəra mən. 9 Tuku mavi'i hətə nyi səli nə tlakən nda, nda mər sənda njo ngatə məsəɗakəkur ni. Əngwa nda ɓəlakə nda ɓwanya, 10 ndara nda həl səkənda wa. A təvəra ənga nda char ənda nji mənakə nda, njir jiri tsəu aku dəhə sənda kwa gwa'atə nji kwa nyida dlədləɓə nda təkəra Hyel Ndər Dləuya mən.

11 Aka Hyel tə chabiya ɗanghali nyi ka dləuya dəhə nji. 12 Ɗanghali nə ngə kwa dəkətə mən məna ngyar laku ɗimi ana huɓər sər dunəya, məna ngya tsa'atsa'a nda Hyel kwa i ku nawa bəji. 13 Məna mər ənga bəji nda məno səka ana fəkər da papa'akur nda kwa shili, nacha ngə bəji nda səlir Hyel nda dəgaləu ana Yesu Kəristi Ndər Dləuya mən kwa chabiyadza. 14 Cha sənda pya cha ka cha pəliya mən tsa gyalkur səpəla'a, cha chinda mən, cha mərtə mən ka nənyawa nji, nji'inda tə nənyi kərnənda nə mər sə mənakəu.

15 Tuku ka dlədləɓə sə'inə nə njir nəuwa, ana ka tsətə nda ɗufəu nda məra, ya gyalkur da tsa ka, ka təɗəhima nda ma nda tyati, əngwa ka ngyar madawa həyatə sənda ka na wa.