Mər sənda Mənakəu
3
Ɗənghatə nyi nə nji ka nda hətə nyi səli nə nji təltəl ka njirawawa'a, ana nda ɗa kəriwa, nda ɓatliya kərnənda ka mər mənakəkur mada sakamani. 2 Ngwa nda da tləɗa alenya nji wa, kəl nda nda ɗa ka njir gwa'a ngya mənakəu, ana həyakər nə jirijiri. 3 Kərnəmən haaɗa, a mərtə mən kəkəngkur ana kəla ngatəndərkur. Nja shandə mən kər məna mər mavakur nə mwaɓər ana məsəɗakəkur dza. Ngya kəmən chaɓə na paha ana pəla'akur, a da njo nyida mən wa, ya a da məno nyida kərnəmən wa.4 Kəl ja, ahir nja chabiya mənakəkur ana nyidar Hyel Ndər Dləuya mən, 5 cha dləuya mən, a da ka ngya tsa'atsa'a kəmən wa, kəl nda ka təhuɗə nyi. Cha chinda mən ga ɓəla yabiya mən, ga nə mən taɗər pi təwa Shanguɗə Karti 6 nda cha nə mən bwaɓu təwa Yesu Kəristi Ndər Dləuya mən. 7 Aka ɗanghali nyi, cha mərtə mən nji tsa'atsa'a ana nji'inda njo nənda mbaɗər pi nda ba'anawa, nda məno fəkər da. 8 Ɓwanya nga jiri.
Yo i ka ɓwanya gagaɗa təkəra sə'inga, ga nji'inda nənyi jiri nə Hyel ngya ka mər sə'inda mənakəu, inda na sakəda nə madawa. 9 Ngwa ka da kəpal kəla sakəda, ndara ka ngya ka jiga nyandəla nji wa, ngwa ka da ba'a guhi ndara pa təkəra gadlagadla wa. A sakədar sə'ingə da wa, ya sə ɓwa'atanyi nga. 10 Ka təɗəhimi nə njir tləɗa inda ku pama hi zhang mətləu, ahir nga, ngwa ka tsəu shau nda wa. 11 Ka zəndəbiya, chulkə ngəna nji wurtə sa, ya səpəla'a kənda wurta tlanda nda nəuma.
Batəbatər Tsaubar
12 Yo jigadəmar sətə nghə Artimas ndara Tikikus, ka mər dəhə sənda ko nau ka shili həya ɗa vu Nikapolis, aka yo i ya həbiya fwakə hinda. 13 Ka mər dəhə sənda ko nau tsəu ka hagwa nyi chi nə Zenas ndər zəndə gadlagadla nga, ba'a Apolos ku ma'i kənda, ka ta'i ka la'a kəl nanda uya dəhə sənda nda kwa gwa'a. 14 Tuku, nja dlədləɓə mər mənakəkur mada sakamani, ga nda nau vala alenya nji, təwa ənga a da nda kwa ngya ɓwa'atanyi wa.
15 Dəhə nji'inda ya kə'iri kwa usa ngha, ka usar ɗa nji'inda kwa nyida mən, nji'inda mən kə'iri ku jirikur.
Papa'akur Hyel ngya tsa'a nahi dəhəu.