Kainau Bulus nə
Titus
Usa
1
Hya'atə tsa Bulus mava Hyel ana changhabal nə Yesu Kəristi. Cha tabiya ɗa ka ndə nda na mafakə nyi ka ya tsəngtə jirikur nji'inda Hyel tə ɗəmətsi, ka ya dəkətə nda nda zəndəbiya jiri nda kwa cha ənda nda kwa ngya tsa'a na Hyel. 2 Jiri nga, kwa gwa'atə nda kwa fəkər da pi nda ba'anawa, nda Hyel nda pa'a kwa tla gəzhi tə mərtə nda alkawal təvi ghəyar dunəya. 3 Ya atə bəji nda cha fiya, cha chabiya mafakə na, nacha ngə ea kwa bəzə nə madawa. Hyel Ndər Dləuya mən nga na'a ya mər tlər nə nənyi.4 Yo tsəfə nə Titus zər ɗa nə jirijiri aku jirikur.
Papa'akur Hyel Adan mən ana piyarɗufəu nə Kəristi Yesu Ndər Dləuya mən ngya təkəra ka.
Tlər Titus vu Kərita
5 Ya ngya nghə vu Kərita ka kə udiya tlər kəma hingə ana ka ɗəmtsə wawa'ar njir nəu na njir nəu ku kala mələm tang wi nda ya nar ngha. 6 Tuku ndəradəgal nəuna nji cha ɗa kəla sər ngəla, cha ɗa ndər mala zhang, tuku ngulisha'a nyi ɗa ka njir nəu Hyel inda pa'a njo uya na zazaɓəkur ana kəla ngatəndərkur. 7 Kala ndə nda tə ɗa ka ndər nəu na njir nəu Hyel, tuku ngya nyi cha ɗa kəla sər ngəla. Ngwa cha da ɗa ndər bukər nyi ndara ndə nda huɗa cha kwa tla ɗəɗəu wa, ndara ndər sa sə sasa, ndara ndər gwa'a pa, ndara ndər huɓər sər dunəya wa. 8 Cha ɗa ndər dləu mihiɓi na hirgyaɗi, ya tuku cha nyida sənda mənakəu. Tuku cha ɗa ka ndə nda tsa'atsa'a ya cho ngya na dəma. Tuku cha ɗa ndər nəu Hyel na jiri, ndə karti, ya cha kwa nau ɓəlatə ngya nyi. 9 Tuku cha gəzəya mafakə nda nja dəkətə nyi na jiri, ənga cho nau tsətə nyi ɗufəu nə alenya nji ana mafakə jiri, ya cho nau nənyi kuzhi nə njir kəpal mafakə jiri.
10 Aka nji ɓaɓalkər da ɗang inda kwa pə nya zazaɓə kwa shakər nə alenya nji, nanda ingə kwa na tuku kəl nja tla bədzang njo dzugwa uya mbəɗa. 11 Tuku nja tsə nda nda bəgə ɗiyu, aka nda kwa shakər nə nji ɗang təwa dlədləɓə nə gəzhi. Ya aka gwa'a sər dunəya tanyi ngə nda kwa mər ənga. 12 Zhang kənda ma'a, ndər mətakər vu Kərita tə na, “Dəhə njir Kərita njir tla gəzhi, sərshishi pəla'a, ya nji kukufəu, nji bang huɓa.” 13 Səngə nja pə kəra nda ngə jiri, aka ənga ka tsə nda gagaɗa ka nda ɗa na jirikur nə jirijiri. 14 Tuku ngə nda ngyar səhimi da pəkətəpəkətiya njir Yahuda, ana gadlagadla nji'inda sharnyi yi nə jiri. 15 Dəhə sə cham a nə nji'inda na ɗufwa nda chaməu. Kəl ja, a vanya sə da cham nə nji kəla jiri wa, aka jigadəma kənda ana ɗufwa nda da tsa'atsa'a wa. 16 Chul nji ingə kwa har wi kwa zəndə nda Hyel, kəl ja, nda kwa kəpaliya nyi təwa ngya kənda. Sər həɗə nda, nji kəla ngatə ndəra, a nda kwa kina mər sə mənakə pa'a wa.