Ndər Tlə Mwali
2
Sakan ja, ka zama ka kwama, a təkəra shilir Tlakən mən Yesu Kəristi ana ənda njo da tsəmtə mən ma nyi, ya kwa gədi hi, 2 ngwa hya da ɗa na kərmətlə ndara hya wendə kərnəhi na nji'inda kwa na bəra, Tlakə wurta shili wa. Nda kwa nau na ənda nda ngatə ənga ku ɓwanya takər, ndara mafakə ana ɓwanya nda hya'atə tsa ea. 3 Ngwa hya da ngyar madawa shandə hi kər wa, aka pəchi ngə da kwa shili wa kəl nja tlə mwali, ana ma ndər tlə mwali tə chabiyadza, ndə nda nja ɓatliya ka hu'u. 4 Cho shili mər dawa ana cho hətə kərnyi matsa dəhə chulkə sə'inda njo nga hyel i'i, ndara sənda njo həsəli nənyi, cho ngyata nyi ma'a ku Mbwa'alə Hyel, cho na ənda nacha təkərnyi Hyel cha.5 A tsəu hyo ɗənghatə ənda dəkə təya sə'inə nə hi sakanda ya kə'i hi ma? 6 Ya sakana a zəndətə hi sənda katə nyi tsa shili, aka ga cha chabiyadzə tə bəji tsa'atsa'a. 7 Aka gyalkur tlə mwali nda tə ɗəuwa ghəya tə tləra, kəl ja, ndə nda kwa ka nyi kwa biyama na ka nyi kəl Hyel tə hənda ndə nda kwa katə sə'inə tsa ɗa. 8 Sakangə ja, ndər tlə mwali kwa chabiyadza, kəl ja, Tlakə Yesu kwa tsəya nyi na səpi nyacha, ya cho zhazhinda nyi na səlir shili nyi. 9 Ndər tlə mwali kwa shili ku gyalkur Shantan nda kwa chabiyadzə ku chul nə nyi na səshinshin, sər məngəl ana sər muniya, 10 cho mər tlər na kala chul laku ɗimi nə shakər nə nji'inda tə lakur kuɗa, aka nda ngyar dləukər ana nyida jiri nda kwa dləuya nda. 11 Aka ənga Hyel tə mərtə nja shandə nda kər 'ual'ualəu ka ga nda nənyi jiri nə gəzhi, 12 aka ga nja tlanda nyi nəuma nə dəhə nji'inda tə ngyar nənyi jiri, nda kwa ngatə məsəɗakəkura mər ɗimikur.
Ta'i na Jiri
13 Tuku ea usaku Hyel kə'i hi, ka zama ka kwama nda Tlakə kwa nyida, aka Hyel tə tabiya hi tangərma ka ga hya uya mbəɗə təwa chinda hi nda Shanguɗə tə chinda hi, ana təwa nənyi jiri kəhi ku jiri. 14 Hyel tə nga hi təwa Mafakə Mənakə nda ea bəzə nə hi nda, ka ga hya uya mbaɗə ku səlir Tlakən mən Yesu Kəristi. 15 Aka əngə ja ka zama ka kwama, hya ta'i na dunama, hya gəzəya dlədləɓə nda ea mər nə hi təwa ɓwanya ana təwa kainau.