Nənnə ngə tangərmar mafakə nda Bulus changhabal Yesu Kəristi tə tsəfətə nyi nə njir nəu inda vu Tasalonika. Makidoniya hə'i cha nda tə kiɗa təlkur njir Roma, ya Tasalonika ngə mələm nda tə ndiya na səli atə hə'i Makidoniya. Nji'inda na ngya vu Tasalonika kwa ɗa 200,000 dəhə ka njir Yahuda.

Njir Yahuda tə mər dawa na Bulus aka nda kwa ngatə shishi nyi. Aka nji ɗang tə nənyi jiri nə Mafakə Mənakə nda Bulus kwa bəzə ga ɗa ka njir nəu Yesu Kəristi. Nacha gwa'atə njir Yahuda tə gədlənda Bulus ku Tasalonika, ahir nga, ku bəji nda Bulus hi Korinti bazhi nyi Timtawus tə yada cha ga nənyi mafakə təkəra njir nəu inda vu Tasalonika.

Bulus tə tsəfətə nyi kainau nə njir Tasalonika ka cha tsətə nyi ɗufəu nə njir nəu inda hinda. Cha tsəfə kainau na ka cha chari hirgyaɗi nyi təkəra ənda nda biyama na nənyi jiri nə Kəristi ga ngya na jiri ku bəjir məndza'u. Cha dəkətə nda ənda nda kwa ngya tsa'atsa'a nda kwa mərtə ɗufwa Hyel twasəu.

Njir nəu inda vu Tasalonika kwa jau alenya sə təkəra bəji nda Yesu kwa ɓəla shili ti, ngə Bulus tə wum nənda təkəri. Cha nar nyi nə njir Tasalonika nda biyama na mər tləra ana nda ngya na jiri ku bəji nda nda kwa səkə shilir Yesu ti.