Nənnə ngə kainau nda Bulus tə tsəfətə nyi nə njir nəu nda vu Kolosi, mələm nda təwa zədər pəchi nə mələm Afisa nda tə hə'i Asiya. A da Bulus ngə tə ghəya bəzə Mafakə Mənakə nə nda wa, kəl ja, zhang cha ku huɗa mələm inda Bulus tə hari ənda tlər nyi ngə cha yi bəzəya nda Mafakə Mənakəu. Cha ləti njir bəzə mafakə hya'atə vu Afisa, mələm dəgal nə Roma nda tə hə'i Asiya. Bulus ngabiya tə ənda alenya maləm gəzhi da kwa dlədləɓə nə njir nəu nda vu Kolosi. Nda kwa dlədləɓə ənda ka ga ndə ngabiya Hyel ana uya mbəɗə pa'apa'anyi, kəl na cha həsəli nə alenya “gyalkur ana təlkur inda kya huɗamələm.” Alenya maləm tsəu kwa na, kəl na nja tlanda bədzang ana nda nəubiya tsaubar njir Yahuda təkəra səm sərsuma ana mər tlər pəshir ngyaməngya.

Bulus tə tsəfətə nda kainau na ga cha kəpaliya dlədləɓə nə gəzhi ana cha chabiya nda dlədləɓə jiri nə Mafakə Mənakəu. Gagaɗər sənda Bulus tə tsəfə təkər nacha ngə ka ga cha chari ənda Yesu Kəristi ngə kwa nənyi mbəɗə nda pa'apa'anyi nə ndəu, ana ənda alenya dlədləɓə inga kwa hənda ndə naɗə tsa Kəristi. Cha chabiya ənda təwa Kəristi ngə Hyel tə ɓatlətə dunəya, ya a yada cha dəhə səu kwa ɓələu. Ana nda zəndi ənda Kəl təwa ngya ku Kəristi ngə fəkər nə dəhə dunəya.

Ahir nga, Bulus tə chabiya nda laku nda nda kwa ngya ku dlədləɓə mənakə na. A kiti tsəu nja zəndəbiya ənda Tikikus ngə ndə nda Bulus tə sə na kainau na, yi nə njir nəu nda vu Kolosi. Onisimus mava nda Bulus tə tsəfə kainau nə Filimun təkər nda ngə tə ləbiya nyi.