3 Wa'atanyi ea kwa usaku Hyel, Adanya Tlakən mən Yesu kəristi, mada sakamani eo pətlənya kə'i hi. 4 Aka ngatə təea jirikur kəhi ku Yesu Kəristi, ana chul nyida nda hi ni, nə njir nəuwa. 5 Aka hyo fəkər da sənda nja piya hi kya huɗamələm. Sənda wurtə hi ngatə təkər ku bəji nda nja shili nahi mafakə jiri, nacha ngə Mafakə Mənakəu. 6 Aku dunəya dəhə Mafakə Mənakə nə kwa wiɗa, ya kwa yatəkər kwa həa, tang wi nda cha mər ku pama hi, fwatə ku bəji nda hya ghəya ngatə ana ngabiya ɗanghali Hyel ana jiri nda cha təkəri. 7 Atsa Abafaras kuvanea mava Hyel nda məno nyida gagaɗa ngə hya dlədləɓətə sənda təkəra papa'akur Hyel, ndə nda ta'i ka ea ku tlər Yesu Kəristi na jiri. 8 Nacha ngə ndə nda dəkar ea chul nyida nda Shanguɗə Karti tə nə hi.

9 Aka ənga gwa'atə, fwatə tə pəchi nda ea ngatə sə təkəra hi, naea ta'ində pətlənya kə'i hi wa. Ea kwa gədi tsa Hyel ka ga cha nyandə hi na zəndə sənda cha kwa i, təwa dəma nə Shanguɗə ana ngabiya. 10 Eo pətlənya tsa'anyata, ka hya nau ngya nda Tlakə kwa ngatə məsəɗakə ni, mada təwa bar hya kwa yatəkər ku dəhə tlər mənakəu, hya kwa həa ku zəndə Hyel. 11 Hyel cha tsakətə hi dunama ku səlir gyalkur nyi, tsa'aka hyo nau səsəu ana mbiyahuɗə ga hya ɗa na hirgyaɗi, 12 hyo mər usaku nə Ada, ndə nda gwa'atə hya ɗa ka nji'inda kwa uya sər fa'aki nə nji Karti, nda ku təlkur vimbəlmbəla. 13 Aka nacha nga dləuya mən tsa gyalkur kutla, ga hətə mən shili ku təlkur zər nyi nda cho nyida, 14 ndə nda pəliya mən təwa mashi nyi, ga farbikər səpəla'a kəmən.

15 Kəristi ngə pabiya da Hyel ndə nda pa'a njo la'a, nacha ngə yar tangərma təvi nja ɓatlə dəhə səu. 16 Aka təwa nyi nja mər dəhə səu, sə'inda kya huɗamələm ana tə hə'i, sə'inda njo la'a ana nda pa'a njo la'a, mada dzəga təlkur, ndara gyalkur, ndara njir təlkur, ndara njir gəla nji; təwa nyi, ya aka cha nja mər sə'ingə dəhəu. 17 A da cha təvi nja mər dəhə səu, nacha ngə ndə nda gəzə sə dəhəu. 18 Nacha ngə kəra njir nəuwa, nacha ngə ghəyar dəhə səu, ya nacha ngə tangərmar ndə nda hya'atə ku hwa, aka ənga nacha ngə tangərma ku dəhə səu. 19 Aka Hyel, tə ngatə məsəɗakəkur ka cha chabiya dəhə Hyelkur nyi təwa Kəristi, 20 Ya təwa nyi Hyel tə ɓəlandə dəhə sə shili nə kərnyi. Cha ɓatlətə piyarɗufəu na dəhə sə'inda kya huɗamələm ana hə'i təwa pənda mashi Kəristi tə taməngəla.

21 Ɗakaɗa naɗə hi tsa Hyel ya njir dawa nyi hi aka səɗimi nda hya mər na jigadəma kəhi. 22 Kəl ja sakana, a ɓəlandə hi təcha təwa Kəristi nda ɗaka ndəu, ga tə ka hi, aka cha hətə hi nji karti ya mar Hyel kəla tyakəm, kəla sər ngəl tsəu, 23 ma hya chiya dzə ga ngya ku jirikur, ya a hya tyatə ku laku fəkər Mafakə Mənakə nə hya ngatə nə wa. Nacha ngə Mafakə Mənakə nda nja bəzə nə dəhə nji'inda tə dunəya, nda naya Bulus tsəu tə ɗa ka ndər mər tlər tlərnyi.

24 Sakana yo mər hirgyaɗi təkəra ɓwaɓwatə ɗa ka hi, aka təwa ɓwaɓwatə ɗa ma'a naya, yo nyabiya sənda tə həyadzə nə ɓwaɓwatə Kəristi ka dza cha, nacha ngə njir nəuwa. 25 Wi nda Hyel tə batliya ya ɗa ka ndər mər tlər nə njir nəuwa, ga ya bəzə mafakə nyi dəhəu.

26 Mafakə na ɗəwaɗəwanyi cha ɗəɗəməu ana bəji inga tərabiya nga, kəl ja, sakana, chabiya tənji nə nji chichi nə Hyel. 27 Sənda ku jigadəma Hyel nacha ngə cha chabiya dəgalkura sə ɗəwaɗəwa nda na səli, nə nji'inda pa'a njir Yahuda, nacha ngə Kəristi nda ku hi, fəkər nda na səli. 28 Eo bəzə mafakə Kəristi, ea kwa təɗəhimi ana dlədləɓə nə madawa, ana dəhə dəma, tsa'aka madawa cha ɗa tsa'atsa'a ku Kəristi. 29 Nacha ngə sənda yo mər tlər kar gagaɗa, yo mbadzə na dunama nyi, nda kwa mər tlər na gyalkur ku ya.