Nja tsəfə Kainau Bulus nə Njir Filibi tangərmar njir nəu inda tə hə'i Vwa nda ku mətla Roma nə Makidoniya. Nja tsəfə kainau na ku bəji nda changhabal ku jarum, ana bəji nda alenya njir nəu kwa mər dawa na cha ana dlədləɓə gəzhi vu Filibi. Dəhə ka ənga aku kainau na, Bulus tə char hirgyaɗi nyi ana piyarɗufəu nda kəl ndzuɗakəkura jirikur Bulus ku Kəristi ngə kwa nau dəkəbiya.

Tangərmar sənda Bulus tə tsəfə kainau nə təkər nə njir Filibi, nacha ngə ka ga cha usaku nda ana chulkə vala nda nda mərtə nyi ku bəji da cha kwa gwa'a ti. Bulus tə hətə nəna bəji ka ga cha chabiya nda, aka ga nda ɗa na mbahuɗəu ana tsəɗufəu dəhə ka ɓwaɓwatə nyi ana nəkənda. Cha gədi nda nda ɗa na həyakər ku Yesu, matsa ikər ana bukər. Cha ɗənghatə nda, ənda ngya daɓədzə ana Kəristi, ga'ar Hyel nga təwa papa'akur nyi nda nda dləutsə təwa jirikur, a da təwa həsəli nə ladər nə gadlagadla nə njir Yahuda wa. Cha tsəfə təkəra hirgyaɗi ana piyarɗufəu nda Hyel tə nənyi nə nji nda tə ngya na daɓədzə ku Kəristi.

Kainau na tə chabiyadza təkəra hirgyaɗi, fəkər, daɓəkər, ana səsə'ua ana pi nə njir nəuwa. Ətsəu cha chabiya ndzuɗakəkur nyida nda Bulus tə uya təkəra njir nəu nda vu Filibi.