Aku Kainau Bulus nə Njir Afisa, Bulus tə gədi ənda nji nda nə Hyel nda ngya ka təkəɗər sənda Hyel tə ɓatliya aka daɓəkər dəhə sə ndəndəu təwa ngya zhang ku Yesu Kəristi.

Sə tangərma nda kainau nə kwa ɓwanya təkər nacha ngə laku nda Hyel Ada tə tabiya nji nyi; ənda nja farbikə kənda ga nənda dimukur tsa səpəla'a təwa Yesu Kəristi nda Zər, ana ənda dəgalər alkawal Hyel kwa ɗa təwa daɓəkər nə Shanguɗə Karti. Mətləkunyi cha gədi njir kəratsən nda ngya ku laku nda kwa char zhangkur kənda kwa ɗa təkəɗə ku ngya kənda dəhə nda.

Zhaka ɗang tanyi nja mər tlər na ba'ada ga nja char zhangkur nji nda nə Hyel ku daɓəkər na Kəristi: Njir nəu wi dzə nda, Kəristi ngə gau; ndara wi həra, ana Kəristi ngə hangu məngum; ndara wi mala ɗəuɗəuwa, Kəristi ngə sal nyi. Nənna kainau tə ɗa tə babal, aka ndər tsəfə tə ɗa na jigadəma ɗanghali nə Hyel ku Kəristi. Kala səu a la'a tənji ku vimbəlmbəl nə nyidar Kəristi, hatəmachi nyi, farbikəu, papa'akur ana kartikur.