Nda nji'inda pa'a njir Yahuda ghəya dləukər Mafakə Mənakə nə Yesu Kəristi nda nja kwa bəzə nənda, kəl ngə jau tə hya'ati ku pama nda təkəra ndara a ta'i tə tuku nja nəubiya gadlagadla Musa ndo dzəgwa ɗa njir nəu jiri. Bulus tə kəpala ənda sə'ingə da tuku wa, aka jirir sənda ta'i ka pi ku Kəristi nacha ngə jirikur, təwa əngə njo uya lakur ɗa tsa'atsa'a na Hyel. Kəl ja, ku pama njir nəu inda vu Galati, ku mətla Roma vu tə hə'i Asiya, nji nda kwa kəpal Bulus tə shili ga na kala ndəu cha nəubiya gadlagadla Musa ga cha dzəgwa ɗa tsa'atsa'a na Hyel.

Kainau Bulus nə njir Galati cha tsəfə ka cha bəlandə nji'inda dləukər dlədləɓə gəzhigəzhi shili ku mər sənda tsa'atsa'a. Bulus tə ghəya na chaɗə nda hu'u dza kərnyi təkəra gyalkur nda tə gwa'atə nja nga nyi changhabal nə Yesu Kəristi. Cha na Hyel ngə tə nga nyi cha ɗa ka changhabal a da təwa gyalkur nji wa, ya badəgal tlər nyi kwa ɗa nə nji nda pa'a njir Yahuda. Kəl ngə cha biyama na kəpal ənda təwa jirikur tanyi njo ɗa tsa'atsa'a mar Hyel. Ku batəbatər səlirma Bulus tə char ənda ngyakəngyar njir nəu kwa ɗa ku nyida nda jirikur kwa shili ni.