3 Papa'akur ana piyarɗufəu nda hya'atə tsa Hyel Adan mən ana Tlakə Yesu Kəristi cha ngya tsa'a na hi.

4 Yesu nda tə nə mən kərnyi aka səpəla'a kəmən, tang wi nda Hyel ana Adan mən tə ɓatliya, ga cha dləuya mən tsa bəji pəla'a nə mən kwa na, 5 nda səli ngya tə nənyi ba'anawa! Aɗəmja.

6 A mər tə ya məngəl ənda hya sharnyi yi ɗəɗəu nə Hyel nda nga hi shili da kərnyi təwa ɗanghali Kəristi, hya kwa nəu vanya mafakə paməu. 7 A vanya Mafakə Mənakə da pamə wa. Kəl ja, alenya nji da kwa gwa'a hya'a jigadəma kəhi, nda kwa gwa'a nda bəlatə Mafakə Mənakə nə Kəristi. 8 Macha mada na ea, ndara chama Hyel səya kya huɗamələm tə bəzə vanya mafakə mənakə pam matsa nda ea bəzə nə hi, cha ɗa ka ndə shushu'a! 9 Tang wi nda ea ɗaka nar hi, jan eo ɓəla nar hi səkəu, dəhə ndə nda shili na hi vanya Mafakə Mənakə pam matsa sənda hya dləutsi, yau tlakə nyi ɗa ka ndə shushu'a!

10 Nji ngə yo gwa'a nda dləukə ɗa zəma aa Hyel? Aa sənda njo i ngə yo mər ya? Macha sənda ma ɗa ngə ya mər sənda njo i, a da ya mava Kəristi wa.

11 Ka zama, yo i hya zəndəbiya ənda a da atsa ndə ngə Mafakə Mənakə nə ya kwa bəzə nə hi nə tə hya'atə wa. 12 A da atsa ndə ya dləu wa, ya ndə da dlədləɓə na'a wa. Kəl nda ya dləutsə tsa Yesu Kəristi təwa takər.

13 Kwa zəndə hi ngya ɗa ɗakaɗa, bəji nda ya ku lakur nəu njir Yahuda, ənda ya nənyi ɓwaɓwatə nə njir nəu Hyel gagaɗa, ya mbabiya ma'a dzəa, ənda kəl ya kuɗənda nda. 14 Aku lakur nəu njir Yahuda, a ndiya tə ya məlkər ɗa i ɗang ana nəu sər jul kəea.

15 Kəl ja, təvi nja ya ɗa, Hyel tə tabiya ɗa ga nga ɗa təwa ɗanghali nyi. Ana ikur nyi 16 cha mbəɗiya lya ya ga ya zəndə Zər nyi Yesu, ga ya bəzə Mafakə Mənakə təkəra Yesu nə nji'inda pa'a njir Yahuda. Nda a ɗa ənga, a da ya ɓwanya na kuvaɗa ndə təkər wa. 17 Ya a da ya gi Urshalima ka ya gwa'a vala tsa nji'inda ghəya ɗaka changhabal ka bəzə mafakə Mənakə wa. Kəl nda ya təra ya tə hə'i njir Arabiya, ngə yada ɓəl shili ku mələm Dimaska.

18 Ahir fa makərəu, ya yi Urshalima ga ya yi zəndə Bitrus, ya hanyi kwabətufəu na Bitrus. 19 Wuɗəkər vanya changhabal bəzə mafakə nda ya ɓə nə aku bəji nda, na cha ngə Yakubu, zamənya Tlakəu. 20 Hyel zəndəti, a da gəzhi ngə yo tla wa, jiri sə nə yo tsəfə na.

21 Ahir nga, ya təra ya tə hə'i njir Suriya ana Kilikiya. 22 Kəl ja, ku bəji nda a njir nəu Kəristi inda tə hə'i Yahudiya da kwa zəndə ɗa gwadagə wa. 23 Wuɗəkər sənda nda zəndə na cha ngə, nja kwa na, “Ndə nda kwa ɗa məndza'u na ea ɗakaɗa nda shatə kwa bəzə mafakə jirikur nda cha ɗaka gwa'a ka cha katə nda!” 24 Ngə nda fal Hyel təkəra sənda cha mərtə ɗa.