Vala ma Kərnəhi
6
Ka zama ka kwama, ma nja həya vanya ndə ku səpəla'a, nahi nda Shanguɗə Karti tsa'a nahi, hya ɓəl nacha shili ku laku ana sənam, tsa kərnəhi da gwa ku sərmbukəu. 2 Hya hagwa nyi chi nə kərnəhi təwa hə ɓwaɓwatər kərnəhi, təwa ənga hyo nyabiya gadlagadla Kəristi. 3 Macha vanya ndə kwa har ənda vanya sə cha, ya səda cha karə wa, kər nda cho sha nə kərnyi. 4 Madawa cha dzətə tlər nyi, cha la'a macha ɗatə mənakəu, cha dzugwa bukər nyi na sənda cha mərtə na kərnyi, a da kəl cha məməlandə kərnyi na vanya ndə wa. 5 Aka a kitə madawa hə tlər kərnyi.6 Dəhə ndə nda nja dlədləɓətə nyi ɓwanya Kəristi, kəl cha təkəya dəhə sə mənakə ka nji'inda dlədləɓətə nyi. 7 Ngwa hya da shandənyi kər nə kərnəhi wa, a da njo nghwa'ali nə Hyel wa, aka dəhə sənda ndə tə tləka nacha cho mərəya. 8 Ma ndə nda tləka ka sənda mwaɓər dza cha kwa i, cho mərəya tah, kəl ja, ndə nda tə tləka ka sənda Shanguɗə kwa i, cho mərəya pi nda ba'anawa. 9 Aka əngə ja, əngwa məna həɗa na mər sə mənakə wa, aka ma a da məna həɗa ga ngyar wa, bəji kwa shili nda məno mərəya ana papa'akur. 10 Aka əngə ja, ku dəhə sakanda məna uya bəji, məna mər sə mənakə nə madawa, a da wi nə ka zamən mən ka kwamən mən ku Kəristi ma'a wa.
Batəbatər Təɗəhimi ana Usa
11 La'a ma chul tsəfə wawa'a nda ya tsəfə nə hi ana cha ya aku batəbatər ɓwanya na. 12 Nji'inda kwa gwa'a nda chiu hi ku tla bədzang nda kwa i nda char sənda mənakə biyabibiya. Nda kwa mər ənga tsa məndza'u nda kwa uya nda təkəra taməngəla Kəristi. 13 Ya mada nji'inda nja tlanda nda bədzang ma'a a da nda ɓəlatə dəhə gadlagadla Musa wa. Nda kwa i nja tlanda hi bədzang ka ga nda uya lakur bu kərnənda, ana nda na ənda shawa kənda hi. 14 Kəl ja, naya, a da yo bukər ɗa təkəra madami wa, mada yo bukər ɗa ma'a kəl nda təkəra taməngəla Tlakə Yesu Kəristi. Aka təwa tənyi tə taməngəla sər dunəya tə ɗa tətənyi na'a, ya naya tsəu tətənyi nə sər dunəya. 15 A da cha vanya sə mada tlanda mən tənji bədzang ndara a da nja tlanda mən wa. Sənda tə ndiya dəhə nacha ngə ndara ɗatə mən ka nji taɗəu. 16 Piyarɗufəu ana təhuɗə cha ngya kə'i nji'inda kwa nəu nawa taɗər gadlagadla ana dəhə nji'inda nə Hyel.
17 Batəbatənyi, ngwa tsəu madawa wendə ɗa wa, aka mbwar kəti inda dzə ɗa kwa char ənda mava Yesu ya.
18 Ka zama ka kwama, papa'akur Tlakən mən Yesu Kəristi cha ngya nahi. Aɗəmja.