2 Səya ma himi, naya Bulus ngo pə səna. Ma tə ɗa hyo fəkər da tla bədzang ka cha mərtə hi tsa'atsa'a na Hyel, yau a sakədar Kəristi da nə hi pa'a wa. 3 Ngwa ya tsakətə nar hi, macha hyo gwa'a nja mərtə hi tsa'atsa'a na Hyel təwa tla bədzang, a ɗatə tuku kəl nahya nəubiya dəhə gadlagadla Musa tsa'atsa'a. 4 Aka macha hyo gwa'a ɗa tsa'atsa'a na Hyel təwa ɓəlatə gadlagadla, a tlabiya təhi kərnəhi tsa Kəristi ndani, ya a tar təhi papa'akur Hyel. 5 Ba naea nəkə ea, ea kwa fəkər da Shanguɗəu ga nja mərtə ea tsa'atsa'a na Hyel təwa jirikur. 6 Aka ma məna nənyi jiri nə Yesu Kəristi, mada na nji tlanda mən bədzang ndara a nja tla wa, a sakəda nyi da wa. Sə mənakə nacha ngə jirikur kwa chabiyadza təwa nyida.

7 Tangərma, ngya kəhi tsa'atsa'a! Wa nga nda shandə hi kər tsa nəu lakur jiri na? 8 A nənyi tə ya jiri a da Hyel ngə wa, aka nacha nga mərtə hi ka dimur nji. 9 Dlədləɓə nə gəzhi ngə wi tləlam kushə cha nda kwa zəkutə upə 'ualəu! 10 Nənyi tə ya jiri, Hyel kwa ɓəlatə hi tsa dlədləɓə gəzhi. Ya Hyel kwa mərtə nyi nəuma nə madawa ndər shakər nə hi.

11 Ka zama kə'i kwama, ma təɗa yo bəzə mafakə ənda tuku nja tla bədzang wi nda alenya nja na yo məra, ma ngə njo ɗa məndza'u naya? Ya kwa bəzə mafakər uya mbəɗə təwa taməngəla Kəristi, nacha ngə tə ɗa ka sər tləhi nə alenya nji. 12 Chim ɗa ja, njir hya'a jigadəma kəhi ingə tlabiya kiɗa nda pa'a.

13 Ka zamə ɗa, nja nga hi ka hya ngya ku dimukur, kəl ja, ngwa hya mər tlər na dimukur kəhi ka hya mər sənda mwaɓər dza hi kwa i wa, a təvəra ənga, hya mər tlər nə kərnəhi ku nyida. 14 Aka a daɓəu tə nji dəhə gadlagadla da kiɗa ɓwanya zhang, “Ka nyida təwul nghə wi nda ko nyida kərngha.” 15 Kəl ja, ma hya mərtə kərnəhi wi sərshishi, hya kwa pa ana ngala, hya kwa gwa'atə ɓwaɓwatə ana takasə nə kərnəhi. Gəla ma hya da kuɗənda kərnəhi!

16 Ngyar ma Shanguɗə Karti cha nəu nahi. Ma hya mər ənga a da hyo ɗa ku ndəkurndə wa. 17 Aka ndəkurndə kwa i cha mər ɗimikur, sənda a Shanguɗə da kwa i wa. Sə mətlə inga kwa mər dawa na kərnənda, nacha gwa'atə a da hyo nau mər sənda hyo i wa. 18 Macha Shanguɗə Hyel ngə kwa nəu nahi, yau, a da hi tə kiɗa gadlagadla ndani wa.

19 Tlər ndəkurndə a tə babal cha. Janə shi'ushi'ukur, hiɗahiɗakur, ana həyakur, 20 ana həsəli nə katəu, mutiyakur, dawa, kəpala, sələkəkur, huɗətla, ikər, tlə mwali, ngya pampam, 21 Ana shishi, wi na mbadla, ladər kəla kər, ana alenya chulkə sə wi inga. Yo təɗəhimi nə hi, wi nda ya ɗaka mər ɗəɗəməu, ənda njir mər chulkə sə'inga a da nda kwa uya təlkur Hyel wa.

22 Kəl ja, ngya nda Shanguɗə Hyel kwa yiya, na nda ngə, nyida, hirgyaɗi, piyarɗufəu, mbahuɗəu, kwya'akur, mənakəkur, ndə nda njo dləukər ni, 23 sənamkur, ndə nda kwa nau gəlatə kərnyi, sə wi inga nəuma da təkər pa'a wa.

24 Nji nda nə Kəristi Yesu kukwanda tə ndəkurndə ana dəhə mwaɓər dzəa. 25 Manda Shanguɗə nga nə mən pi ja, mən ngya nyi cha nəu na mən ku dəhə ngya kəmən. 26 Ngwa məna ɗa ka njir ikər, njir dlənyarvi ndara njir ngatə shishir kərnənda wa.