4
Əja, a pam da ku pama mava ana zər kushə nda kwa səkə sər fa'aki wa, madangə dəhə sənda ada nyi tə ngyari, nənyi nga. 2 Kəl nda kwa ngya da kiɗa ndə nda təkəra cha, kəl bəji nda adanya zər nda tə fiya tə ɗa. 3 Əngə tanyi mən bəji nda mən ngulisha'a, məna mər mavakur a da kiɗa təlkur ana gyalkur dunəya na. 4 Kəl ja, nda bəji nda Hyel a fiya tə nyabiyadza, ngə cha sətə zər nyi, yar malakəu, cha ngya da kiɗa gadlagadla njir Yahuda. 5 Hyel tə sətə nyi ka cha dləuya nji'inda da kiɗa gadlagadla, ka cha shandə mən ka nguli nyi. 6 Aka nguli Hyel mən, cha nə mən Shanguɗə Zər nyi ku ɗufwa mən, nda tə gwa'atə məno nga Hyel, “Ada.” 7 Sakan ja, a tsə'u hi mavi'i wa kəl nda nguli Hyel, ya mangə nguli Hyel hi, a mərtə hi tə cha ka nji'inda kwa uya sər fa'aki nyi.Ɗəngha Bulus təkəra Njir Galati
8 Təvi hya zəndə Hyel, mavi'i hi anə alenya hyel inda pa'a na pi. 9 Kəl ja, sakana a zəndətə hi Hyel, ndara nja na Hyel tə zəndə hi, ma'a ngə hyo gwa'a ɓəla mər mavakur nə təlkur gyalkur kəla sakəda nə dunəya nda pa'a da na dunama? 10 Hyo gwa'a hya ɗa tsa'atsa'a na Hyel təwa hətə nyi səli nə alenya pəchi, ndara hya, ndara fa i'i. 11 A tlənda ɗa təhi shanguɗa ya ana səngə hya mər ənga. Yo la'a wi dəhə ɓwaɓwatə nda ya sa təkəra hi ɓwa'atanyi.
12 Yo gədi hi ja ka zama, hya ɗa wi naya aka a ɗa tə ya wi nahi, a səda hya zandə ɗa wa. 13 Wi nda hya zəndə ənda ku bəji nda shiləkə tə səya ɗa nda, ya ghəya bəzə Mafakə Mənakə nə hi. 14 Madangə shiləkə ɗa ɗatə ka ɓwaɓwatə nə hi, a da hya shar ɗa yi ndara hya həyatə ya wa. Kəl nda hya dləutsə ɗa wi chama Hyel ya, ndara Yesu Kəristi təkərnyi. 15 Mya ɗa na nyida ana hirgyaɗi nda hya mər təkəra ya bəji nda? A nənyi tə ya jiri, kwa nda hi huɗakbiya lya hi hya na'a macha kwa nda hi nau. 16 A ɗatə ya ka ndər dawa kəhi sakanə aka yo dəkə jiri nə hi ya?
17 Nji ingə kwa i ka nda dlətə bazhikur kə'i hi gagaɗa, ya nda a da nda kwa chim sə dur ka hi wa. Nda kwa gwa'a nda təkəbiya ea ka hi, ga jigadəma kəhi təra ya kəra nda. 18 Macha nda njir gwa'a mər sə mənakə nda nə hi, tsa'atsa'a tanyi, kəl ja, nda mərtə hi wa'atanyi, a da kəl bəji nda ya kə'i hi wa. 19 Ngulisha'a ɗa! Ya ngatə wi ku ɓəlakər yah kəhi naya səkəu, ya a do wur wa kəl ma Kəristi tə chiya dzə ku ɗufwa hi. 20 Chim ɗa, nja na kə'i hi ya sakana ga ya ndər nə hi na vanya kurakə paməu. Aka kwa ɗəngha ya təkəra hi gagaɗa.
Hajara ana Saratu
21 Par ɗa ma, nahi inda kwa gwa'a ngya da kiɗa gadlagadla ya, kwa zəndə hi ndara mi ngə gadlagadla kwa cha ya? 22 Likatəkatə tə na, ngulisha'a shili Ibrahim mətləu, zhang təwa kwatəra, zhang tsəu təwa dimur malakəu. 23 Zər kwatəra nda nja ya nyi təwa ndəkur, kəl ja, zər dimur mala nda nja ya nyi təwa alkawal Hyel. 24 Ba'ada nga, mahi'i mətlə inga nanda ngə mbandər Hyel tsa'a mətləu. Hajara ngə ba'adar Mə Sinai nda kwa ya mavi'i. 25 Hajara ɗatə ka ba'adar Dəgəl dəgal nə Sinai nda hya'atə tə hə'i njir Arabiya. Nacha ngə ba'adar Urshalima nə sakan na, aka Hajara ka nguli nyi mavi'i nda. 26 Kəl ja, dimur mala nda, Saratu, nacha ngə ba'adar Urshalima nə huɗamələm, ya nacha ngə ama kəmən. 27 Aka a tsəfətə tənji, “Mər hirgyaɗi, nakə mala kəla yah, nakə nda pa'a ta yah! Səya kyalali hirgyaɗi, nakə nda pa'a ta ɗar ɓəlakər yah! Aka nguli mala nda sal nyi tə ngya nyi ɗatə ɗanghəu, matsa mala nda da saləu!”
28 Sakanə ja ka zama, a ɗatə mən ka nguli alkawal wi Ishaku. 29 Aku bəji nda, zər nda nja yah təwa ndəkurndəu tə ɗa məndza'u na zər nda nja yah təwa gyalkur Shanguɗə Hyel. Ya əngə tanyi ngə njo mər nə mən ənya. 30 Kəl ja, mi sənda likatəkatə tə na təkəra sənga? “Gədlənda kwatəra ngə na zər nyi, aka a mbaɗə nyi da ku sər fa'aki zər dimur mala wa.” 31 Aka əngə ja ka zama, a da mən nguli kwatəra wa, kəl ndara nguli dimur malakəu.