4 Ka Ada, ngwa hya da tliya nyi huɗa ngulisha'a kəhi wa; kəl nda hya handə nda aku dlədləɓa ana jigadəma ku lakur Tlakəu.

5 Mavi'i, ɗa ma na kəriwa nə tlakən hi nda tə dunəya ana ləvəra, ana həsəli ku ɗufwa hi, wi nda hyo ɗa na kəriwa nə Kəristi. 6 Hya ɗa kəriwa nə nda a da kəl ka ləvər li ga hya uya fal tsa nda wa, kəl ja, wi mavi'i Kəristi, nda kwa mər sənda Hyel kwa i ana dəhə ɗufwa hi zhang. 7 Hya mər tlər kəhi ana hirgyaɗi, wi nda hyo mər nə Tlakəu, a da nə ndə wa. 8 Hya zəndə ənda Tlakə kwa nənyi wazəba nə madawa aka dəhə sə mənakə nda cha məra, nda mava cha nda dimur ndə cha.

9 Tlakə i, hya mər tang wi ngə tanyi nə mavi'i kəhi. Ngwa hya ndzamhuɗə nənda wa, aka a zəndətə hi ənda Tlakən hi zhang kə'i nda kya huɗamələm, ya a da cha na tagəl wa.

10 Udiya nyi, ɗa ma na dunama aku Tlakəu ana ku dunamar gyalkur nyi. 11 Hya pəndzə dəhə kar pa nə Hyel ka ga hya nau panda dəhə kwakunakur sərtakəu. 12 Aka pa kəmən a da na kum ana mashi wa, kəl ja, ana mambəl pəla'a nda pa'a nja kwa la'a na li, nda kwa mər gyalkur biya huɗamələm, nda kwa səm təlkur, nda kwa gəla nji, ana nda na gyalkur kutlər dunəya nə ku cha nda. 13 Aka ənga hya pəndzə dəhə kar pa nə Hyel, aka ma bəjir ɗimikur tə shili, hyo nau panda pa, ana a hir hya wurandə pa, nja həya hi ta'ita'inyi. 14 Aka əngə ja, hya ta'i na dunama, hya mbabiyadzə na gyarakən jiri, hya handzə tsa'atsa'akur ka ləkutə pa kəhi. 15 Ana Mafakə Mənakə nə piyarɗufəu cha ɗa ka ɓiɓi kəhi aka ga hya ɗa ɓatləɓatlənyi mənakəu. 16 Matsa ngə tsəu, hya hətə ləgə nə jirikur, nda nacha ngə hyo kanda dəhə hafə hu'u nda ndə ɗimi ngə kwa ha. 17 Hya hətə dləuya ka mavəkə kəhi, ana ɓwanya Hyel ka katsakər kəhi nda Shanguɗə Karti kwa nə hi. 18 Hya pətlənya ku gyalkur Shanguɗəu aku dəhə bəji ana dəhə chulkə pətlənya hya gədi. Hya gədi Hyel cha hagwa hi chi. Hya ngya na ɓəla a da na ɓəlsar wa, ma hyo pətlənya ka dəhə njir nəuwa.

19 Hya Pətlənya tsəu ka ya, ənda ga Hyel na'a mafakə nyi aka ya dəkəbiya sə ɗəwaɗəwa nda təkəra Mafakə Mənakə nyi a da na ləvər wa, 20 nda akari ngə Kəristi tə sə ɗa, madangə ku jarum naya, hya pətlənya ənda ya dəkəbiya atə babal a da na ləvər wa, wi nda yo kina məra.

21 Tikikus, zamən mən nda məno nyida ana mava nda na jiri ku tlər Tlakəu, cho nə hi mafakə dəhə səu, aka ga nahi ma'a hya zəndə yiyingkur ɗa ana sənda ya kwa. 22 Nacha ngə sənda gwa'atə yo sənyi yada hi, ga hya zəndə ənda ea, ana ga cha fətə hi ɗufəu.

23 Ga Hyel Ada ana Tlakə Yesu Kəristi cha nənyi piyarɗufəu ana nyida ku jirikur nə ka zama ka kwama nda ku Kəristi. 24 Papa'akur Hyel cha ngya na dəhə nji'inda kwa nyida Tlakən mən Yesu Kəristi ana nyida nda pa'a kwa wura.