Hya Ngya wi Nguli Vimbəlmbəla
5
Dlədləɓə ma tsa Hyel, wi ngulisha'a nda njo nyida, 2 hya ngya na nyida, wi nda Kəristi tə nyidatə mən ga nə mən kərnyi ga'a, sər hatəmachi nda Hyel kwa ngatə məsəɗakəkur ni. 3 Ngwa nja da ngatə kasalikur, hiɗahiɗakur, ndara huɓərsə ku pama hi wa. Chul ngəna səpəla'a do kina ɗa ku pama njir nəu Hyel wa. 4 Əngə tanyi tsəu ngwa hya pə sər kuzhi wa, pə sə kəla kər, ana ngwa hya da ɓəlnyaguma təkəra sə shiushiu wa, a do ki na njir nəu wa. A təvəra ənga, hya maka usaku Hyel. 5 Hya zəndə ənda dəhə ndər mər kasalikur, ana ndər mər sə hiɗahiɗa, ana ndər huɓərsəu, (nda nacha ana ndər həsəli nə katəu sə zhang nda), a da nda kwa uya zhar təlkur Kəristi ana nə Hyel bada kushi wa. 6 Ngwa hya da i madawa cha shandə hi kər ana ɓwanya gəzhi wa, aka chul ngəna səpəla'a ingə huɗətlar Hyel kwa shili təkəra nji'inda kəla kwa ngatə ndəra. 7 Aka ənga, ngwa hya da daɓəkər kə'i nda wa.8 Aka ɗəɗəm aku kutlə hi, kəl ja, sakana, a uyatə hi vimbəlmbəla təwa Tlakəu. Hya ngya wi nguli vimbəlmbəla, 9 aka vimbəlmbəl nacha ngə kwa mər sakəda 'ualəu, mənakəkur, ngya tsa'atsa'akur, ana ngyar jiri. 10 Hya gwa'abiya sənda kwa ɗa mənakə nə Tlakəu. 11 Hya təkəna tlər kəla sakəda nə kutla nda nji kwa məra, kəl nda hya chukuɗabiya nda. 12 Aka sər kuzhi cha, mada nja ɓwanya təkəra sə'inda nji kəla nəu Hyel kwa mər tə ɗəwa. 13 Kəl ja, vimbəlmbəl kwa da chabiya ɗimikur kənda. 14 Nacha nga gwa'atə nja na, “Hya'atə ndər njihanyi, hya'ati ku tah, ka Kəristi kwa mbəl nə ngha.”
15 Aka ənga kəl hya gəla na ngya kəhi, ngwa hya da ngya wi nji kəkəng wa, kəl nda wi nji'inda na dəma. 16 Hya mər tlər na bəji nda hya uya ka mər sə mənakəu, aka bəji ɗimi nə mən kwa. 17 Ngwa hya da ɗa dzadza ja wa, kəl nda hya mbabiyadza ənda hyo ɗana gwa'abiya sənda Tlakə kwa i hya məra. 18 Ngwa hya da wi na mbadlə wa, aka cho səwandə hi. A təvəra ənga hya nyi na Shanguɗə Karti, 19 hya ɓwanya nə kərnəhi aku miya Dəla Nda Karti ana miya fala, ana miya shanguɗəu, hya vəra na miya fala ana tsa sə tsatsa nə Tlakəu ana dəhə ɗufwa hi. 20 Mada sakamani hya usaku Hyel Ada aka dəhə sə ku Tləmər Tlakən mən Yesu Kəristi.
Mahi'i ana Shili
21 Hya ɗana kəriwa nə kərnəhi aka həsəli kəhi nə Kəristi.
22 Mahi'i, hya ɗana kəriwa nə shili kəhi wi anə Tlakəu. 23 Aka sal nacha ngə tlakə təkəra mala wi ngətə Kəristi Tlakə təkəra njir nəuwa, nda dza cha, nda nacha ngə ndər dləuya nyi. 24 Sakan ja wi ngətə njir nəuwa tə ɗa da kiɗa Kəristi, əngə tanyi tsəu mahi'i nda ɗa da kiɗa shili kənda aku dəhə səu.
25 Shili, nyida ma mahi'i kəhi, wi ngə tə Kəristi tə nyidatə njir nəuwa ga sənda pya cha aka nda, 26 aka ga cha mərtə njir nəu chaməu, chichinyi ana ɓiti təwa ɓwanya Hyel, 27 ana ga cha yi na cha nə kərnyi wi njir nəu inda na səli, nda a da na ɗyatlə tə ndara sər ngəl wa, kəl nda chaməu, ya kəla bikəu. 28 Əngə tanyi tsəu, shili nda nyida mahi'i kənda wi dza kərnənda. Ndə nda kwa nyida mala nyi kərnyi nda cha kwa nyida. 29 Aa ndə ta ngyar dza kərnyi ya? Kəl nda cho nənyi sərsuma, cho ɓəlatə nyi tsəu wi ngətə Kəristi kwa mər na njir nəuwa. 30 Aka mədlə dza cha mən. 31 Wi nda likatəkatə tə na, “Aka ənga, ndə kwa ngyar ada nyi ana ama nyi, nda kwa daɓətə dzə na mala nyi, nji mətlə inda nda kwa ɗa zhang.”