2
Yo gwa'a hya zəndə 'ualkura mbadzə nda ya mbadzə ka hi ana nji'inda vu Laudikiya, ana nji'inda pa'ada ta la'a ɗa li na li. 2 Sənda yo i, nacha ngə ga ɗufwa nda tsətə dza, wi ngə nda daɓədaɓənyi ku nyida, təwa ənga nda kwa ɗa na dəhə uya nə təkəɗəkura ngabiya, ga nda zəndə səɗəwaɗəwa nə Hyel, nacha ngə Kəristi. 3 Aku cha nja ɗəuwanda dəhə gəna nə dəma ana zəndi. 4 Yo dəkə sə'inə nə hi tsa nja da shandə hi kər na ɓwanya məsəɗakə nə gəzhi. 5 Madangə a da mən tə mbwar zhang ku dzə wa, kəl ja, ɗufwa ya tsa'a ka hi, ya yo ngatə məsəɗakə na ngatə ənda hyo ngya tsa'atsa'a ana ənda jirikur kəhi tə chiya dzə ku Kəristi.Nyabiya tə Hi Dzə ku Kəristi
6 Sakanə ja, wi nə hya dləutsə Yesu kəristi ka tlakən hi na, hya ngya ku cha. 7 Hya chiya ngilang, hya həa ku cha, hya ɗa na dunama ku jirikur kəhi wi nda nja dlədləɓar hi, hya maka usaku nyi wa'atanyi.
8 Əngwa hya da ngyar vanya ndə cha shandə hi kər na zəndə nə dunəya nda hya'atə ku jigadəmar nji, ana gyalkur nə dunəya na, ya a da nda nə Kəristi wa.
9 Aka ku Kəristi, Hyel tə chabiya dəhə Hyelkur nyi ku dza. 10 Aka ənga a nyabiya tə hi dzə ku Kəristi, ndə nda dəgal təkəra dəhə gyalkur ana njir gəla nji. 11 Aku cha nja tlanda hi bədzang, təwa səɗənda ndəkurndəu, a da chul tla bədzang nda nji kwa mər na cha nda wa, kəl nda ana tla bədzang nda Kəristi tə məra. 12 Ahir nja haɗiya hi ka cha təwa baɓtisma, ngə nja hya'andə hi ka cha təwa jirikur ku gyalkur Hyel nda hya'andə nyi ku hwa. 13 Ɗakaɗa kuɗəkuɗənyi hi aka səpəla'a kəhi, ya nji da ta tlanda hi bədzang ndəkurndə wa. Kəl ja, Hyel tə hya'andə hi na pi tsa'a na Kəristi, ga farbikə kəhi. 14 Cha zhazhinda tsaubar nda tsəfətsəfə nyi təkəra mən dəhə ka gadlagadla nyi, cha hənda təwa kukwanda tə taməngəla. 15 Təwa əngə cha fa'aya kar pa nə njir gyalkur ana njir gəla nji, cha nənda kuzhi tə babal ənda cha kura nda təwa taməngəla.
16 Aka əngə ja, ngwa hya da i vanya ndə nə hi bikə təkəra sənda hyo səma ndara sənda hyo sa wa, ndara təkəra ngyar nəubiya tsaubar nə ladər, ndara pyaɗər hya, ndara ɓəlatə Pəchir Ngyaməngya wa. 17 Tsaubar ingə dəhəu, shanguɗa sə təkəɗə nga nda kwa shili, ya Kəristi ngə təkəɗər səu. 18 Ngwa hya da ba'a ngyar madawa gigilnda hi təwa jalvi həyakər nə gəzhi tsa uya wazəba wa, ndara ndə nda kwa həsəli nə Chama Hyel, ndara ndə nda kwa cha bəra cha uya takər. Cho bukər nyi ɓwa'atanyi təwa jigadəmar ndəkurndəu, 19 Chul ndə wi ngə təkəbiyadzə tə na Kəristi, nda nacha ngə kər nə dza. Aka aku cha ngə dəhə dzə kwa həa chulkə hə nda Hyel kwa i, aka Kəristi ngə kwa gəza ana daɓətə dəhə dzə təwa mədlə ana bəlatəu.
20 Manda tətənyi hi ka Kəristi a nə gyalkur dunəya. Mya gwa'atə hyo nəu tsaubar dunəya wi ka: 21 Ngwa gəzə wa, ngwa ɗari wa, ngwa tsəkar wa ngwa sa wa. 22 Tuku dəhə sə'ingə sa wi nda njo mər tlər ni, tsa'a na tsaubar ana dlədləɓə nə nji. 23 Pabiya da uya dəma cha, təwa chiu kər ku həsəli, həyakər nə gəzhi, ba'a nənyi ɓwaɓwatə nə kumər dza, kəl ja, ɓwa'atanyi a sakəda nyi da ka gəlatə ndəkurndə wa.