Tsaubar nə Ngya Karti
3
Mangə hya'andə hi tənji na Kəristi, hya fətə ɗufwa hi tə sə'inda kya huɗamələm, tangnda Kəristi na ngya tə chisəma Hyel. 2 Fətə ma jigadəma kəhi tə sə'inda kya huɗamələm, a da tə sər dunəya wa. 3 Aka tətə hi, ya ɗəwanda tənji pya hi ka Kəristi ku Hyel. 4 Ma Kəristi, nda nacha ngə pya hi, tə chabiyadza, nahi tsəu hyo chabiyadza ka cha ku səli.5 Aka ənga ja, hya kuɗənda dəhə sə'inda nə dunəya, kasalikur, hiɗahiɗakur, huɓərsəu, mwaɓər ɗimi ana kamu'a, nda nacha ma'a həsəli nə katə cha. 6 Aka chul səpəla'a inga, huɗətla Hyel kwa səya (təkəra nji kəla ngatə ndəra.) 7 Nahi ma'a kwa mər hi sə'ingə ɗakaɗa, sakanda hi kwa ngya wi nəkənda. 8 Kəl ja, sakana, tuku hya təkəbiyadzə na chul ngya inga, hya ngyar huɗətla, ghərti, jigadəma ɗimikur, ngəl ndəu, ana nya zazaɓəu. 9 Ngwa hya tla gəzhi nə kərnəhi wa, mangə səɗənda təhi ɗəɗəmər ndəkurndəu, ana tlər nyi. 10 Ya handzə təhi taɗər ngya, nda nja təɗəbiya təwa zəndi, pabiya da Hyel ndər ɓatlə nyi. 11 Aku taɗər ngya nga ndər Heleni, ndara ndər Yahuda, ndə tlatla bədzang ana ndə kəla tla bədzang, ndə shilishili, ndə nda kəla ta mbəɗə kər, mava ana ndə dimu, kəl ja, Kəristi ngə dəhə səu, ya nacha ngə ku dəhə səu.
12 Aka əngə ja, wi nji'inda Hyel tə ɗəmətsi, nji karti nda cho nyida gagaɗa, hya handzə ɗufəu nə təhuɗəu, mənakəkur, həyakər, sənamkur ana mbiyahuɗəu. 13 Hya səsəu kərnəhi ana macha vanya ndə na ɓwanya təkəra kuvanyi, hya farbikər kərnəhi wi nda Tlakə kwa farbikə kəhi, nahi ma'a hya mər ənga. 14 Ndiya matsa inga, hya nyida kərnəhi, nda daɓiya sə dəhə tsa'atsa'a. 15 Hya ngyar piyarɗufəu Kəristi cha səm təlkur ku ɗufwa hi. Nja nga hi ka hya ngya ku piyarɗufəu wi dzə zhang, ana hya ngya na usaku. 16 Ngyar ma ɓwanya Kəristi cha ngya ku ɗufwa hi bwaɓəu. Hya dlədləɓə ana hya təɗəhimi nə kərnəhi ku dəhə dəma, hya na miya Dəla Nda Karti, ana miya fala, ana miya Shanguɗəu anə Hyel, hya kwa usaku Hyel ku ɗufwa hi. 17 Dəhə sənda hyo məra nda ɓwanya ndara tləra, hya mər dəhə ku tləmər Tlakə Yesu, hya usaku Hyel Ada təwa nyi.
Tsaubar nə Ngyar Ki Njir Nəuwa
18 Nahi mahi'i ɗəuɗəuwa, hətə nyi ma səli nə shili kəhi wi sənda tsa'atsa'a mar Tlakəu.
19 Nahi shili, nyida ma mahi'i kəhi ngwa hya da char nda dzaukur wa.
20 Nahi ngulisha'a, hətə nyi ma səli nə njir yah hi ku dəhə səu, aka sənda kwa nənyi hirgyaɗi nə Tlakə nga.
21 Nahi ka ada, ngwa hya da tla huɗa ngulisha'a kəhi wa, tsa hya da tsəya ɗufwa nda.
22 Nahi mavi'i, hətə nyi ma səli nə tlakən hi nə dunəya ku dəhə səu, a da kəl ka ləvər li tanyi wi njir gwa'a fal tsa nji wa, hya mər tlər na ta zhang wi njir ləvər Tlakəu. 23 Dəhə sənda hyo məra, hya mər tsa'anyata, wi anə Tlakəu a da anə ndə wa. 24 Hya zəndə ənda Tlakə kwa da nə hi sər fa'aki nda wazəba kəhi. Aka Tlakə Kəristi ngə hya kwa mər mavakur. 25 Ndə nda mər tlər ɗimikur, cho dləutsə wazəbar ɗimikur nyi. Aka Hyel do tazhira wa.