3 A kiti ea usaku Hyel aka hi ka zama kala bəji, ya a ɗati tsa'atsa'a ənga, aka jirikur kəhi kwa həa ka biyama ka biyama, ana nyida nda kala ndə ni a nə madawa kwa tsaka. 4 Aka ənga ja, aku huɗa njir nəu Hyel ea kwa wovi na səsəu kəhi ana jirikur nda hi ni ku dəhə ɗa məndza'u ana dzə nda hyo səsə'ua.

5 Dəhə sə inga a chartə ənda nəumar Hyel tsa'atsa'a cha, ya ana ənga njo jiga hi ku huɗa nji'inda kwa kina təlkur Hyel, aka nacha ngə hyo sa ɓwaɓwatə kari. 6 Hyel ndər mər sə tsa'atsa'a cha cho kinda nji'inda kwa nə hi ɓwaɓwatəu ana ɓwaɓwatəu 7 ana cho nə hi ɓəlsar tsa ɓwaɓwatə kəhi, ana naea tsəu. Sə'ingə dəhə kwa ɗa ma bəji nda Tlakə Yesu tə chabiyadza, hya'ati kya huɗamələm ku hu'u gəɗəgəɗa, ana chama nyi inda na gyalkur. 8 Cho nənyi ɓwaɓwatə nə nji'inda pa'a da zəndə Hyel, ya a da nda nəu sənda Mafakə Mənakə nə Tlakən mən Yesu tə na wa. 9 Njo nənda ɓwaɓwatə nda ba'anawa ana njo hənda nda tsa huɗəma Tlakəu ana tsa səlir gyalkur nyi, 10 a tə bəji nda cho shili tə aka nja hətə nyi səli aku nji karti nyi ana njo mər sər muniya nə ku pama dəhə nji'inda tə nənyi jiri. Aku huɗa nda hi, aka nənyi təhi jiri nə ɓwanya kəea.

11 Ana ənga ku jigadəma, ea kwa pətlənya kala bəji aka hi, ənda Hyel kəmən cha mərtə hya ɗa tsa'atsa'a ka nga hi nda nja nga hi, ana ənda təwa gyalkur nyi cha nyabiya kala sə mənakə nda cha hari kə'i hi ana tlər nda jirikur kəhi tə mərti. 12 Eo pətlənya ənga aka ənda tləmər Tlakən mən Yesu cha ɗana səli təwa ngya kəhi, ya hyo ɗa na səli kə'i cha təwa papa'akur Hyel kəmən ana Tlakə Yesu Kəristi.