Bulus changhabal Yesu Kəristi nə tə tsəfə kainau na, ku bəji nda cha tə lakur fwaɗəkunya ki bəzə Mafakə Mənakəu. Bulus tə tsəfə kainau na nə Timtawus bəji nda cha hi Makidoniya.

Timtawus ndər Listra cha, ama nyi kwa Yahuda ana ada nyi ndər Heleni. Timtawus shawa Bulus cha, ngə Bulus tə tsau nyi njir nəu inda vu Tasalonika, Korinti, Filibi ana Afisa ku cha cha. Bulus tə la'a ɗa tə tsa'atsa'a Timtawus ngya vu Afisa aka njir dlədləɓə gəzhi da ɗang ku mələm nda. Təvi Bulus ngyar Afisa kəl nda cha təɗəhimi nə wawa'ar njir nəuwa a təkəra njir dlədləɓə gəzhi inda kwa shili, ma'a ku huɗa njirawawa'a nə njir nəuwa (Tlər kə'i Changhabal 20:29-30).

Ku kainau na njir dlədləɓə gəzhi inda shandənyi tə kər nə njir nəu ɗanghəu. Ku kainau na chabiya mən tə nji bwabwa'a sənda njir nəu na nji, ana alenya njir mər tlər ku pama njir nəu kwa kina ɗa kari, ana Bulus tə dəkar nyi nə Timtawus ənda cho ɓwanya nə njirawawa'a ma səɗimi tə ɗa. Ətsəu məno la'a ənda Hyel tə dləuya mən təwa ɗanghali nyi. Bulus tə chabiya ənda ndə zhang tanyi kwa nau daɓiya sə ndə ndə na Hyel, ya ndə nga, nacha ngə Yesu Kəristi. Cha na nja səkə udiya jwamər bəji nda Yesu kwa ɓəla shili.