3 Nda ngyar ya Makidoniya, ya nar ngha ka ngya vu Afisa ga ka təɗəhima njir dlədləɓə nə gəzhi. 4 Ka nar nda ngwa nda da nənyi kərnənda nə haaɗa nghwa ya, ana jiga nyandəla nji wa. Sə wi inga, kəl nda nda gwa'atə tlə kəpal ɓwa'atanyi, a do gwa'atə ɓwanya Hyel ngə məna dləutsə təwa jirikur ngə kwa biyama wa. 5 Sənda tə gwa'atə yo dəkar hi ɓwanya inga, aka ga hya ngya na nyida nda kwa biya ku chamər ɗufəu, ana jigadəma mənakəu, ana təkəɗər jirikur. 6 Alenya nji ngyar tə sə'ingə ga tyatə tsa laku, kəl ɓwanya kəla sakəda nda kwa pəa. 7 Nda kwa gwa'a ka nda ɗa ka njir dlədləɓə gadlagadla nə nji, ya a da nda kwa zəndə sənda nda kwa pə wa. Mada sə'inda nda ta'i təkəri.

8 A zəndətə mən ənda gadlagadla sə mənakə cha, ma nja mər tlər nə tsa'atsa'a. 9 Ya zəndətə mən ənda Hyel da mər gadlagadla ka nji'inda kwa mər sə tsa'atsa'a wa, kəl nda ka nji ɓaɓalkər, nji kəla ləvər Hyel ana njir mər səpəla'a, nji kəla nəu Hyel ana nji dyadyaɓər ɗufəu, njir tsa njir yan nda ana njir tsa nji. 10 Njir mər kasali, ana shili nda kwa piya na kuvan nda shili, ana njir shafəli mavi'i, ana njir tla gəzhi, ana dəhə nji'inda kwa səmfəla təkəra gəzhi, ana kala sə'inda kwa səwandə dəhə dlədləɓə nə jiri, 11 nda tə biya ku Mafakə Mənakə nda na səli nda Hyel ndər papa'akur tə tsau ɗa ku cha ya.

12 Usaku tə ya Tlakən mən Yesu Kəristi nda tə na'a dunamar mər tlər na. A usaku nyi tə ya tsəu aka cha la'a ɗa ndə tsa'atsa'a ga tabiya ɗa ka ya mər tlər nə nyi 13 madangə aku bəji nga təra yahi, ya həyatə Hyel, ga ɗa məndza'u na cha, ga tliya nyi huɗa cha. Dəhə ka ənga, Hyel tə ngatə təhuɗə ɗa, aka ku tar zəndə nda ya məra, ana tar jiri. 14 Tlakən mən tə char ɗa ɗanghali nyi gagaɗa, ga na'a jirikur, ana nyida nda ku Kəristi Yesu.

15 Nənnə ngə ɓwanya jiri, dəhəkura nji kwa kina dləukər na ta zhang nda nənyi jiri ənda. “Yesu Kəristi tə shili tə dunəya, ka ga cha dləuya njir mər səpəla'a.” Nda naya Bulus ngə ndə nda tə ɓəltəkər na mər səpəla'a dəhəu. 16 Na cha nə sənda gwa'atə Hyel tə ngatə təhuɗə ɗa, ga Kəristi Yesu chabiya nyi nə nji ənda ndər hali shishi'u cha. Ma nda la'a ənda cha səsə'utə ɗa naya ndər mər səpəla'a matsa dəhəkura nji, cho ɗa ka ba'ada nə nji'inda kwa da nənyi jiri, aka ga nda uya pi nda ba'anawa. 17 Səli ana dəgalkur ta'itə nə Hyel Təl nda fa na fa ba'anawa, nda pa'a nji kwa la'a, nda pa'a kwa tah kəl na cha zhang tanyi ngə Hyel, ba'anawa. Aɗəmja.

18 Zər ɗa Timtawus, tsau nghə təya bar nə ku cha ka, Tang wi ɓwanya mətakər nda nja pə təkəra kə ɗəɗəməu. Mər tlər na ɓwanya ingə ja ka balmi, ga cha tsətə nghə ɗufə ka nau pa nda pa dur. 19 Ka gəzəya jirikur ana jigadəma ngha. Aka alenya nji da tə ngyar mər tlər na sənda mənakə ku jigadəma kənda, ga səwandə jirikur kənda. 20 Aku huɗa nji ingə, ka Himeniyus ana Alekzanda, a ngya nda tə ya nə Shantan, ga nda ɓua nda ngyar həyatə Hyel.