Tsaubar təkəra Həsəli nə Hyel
2
Tangərma ja, ya kwa nar hi hya pətlənya ka dəhə nji, Hya gədi Hyel ana hya usaku nyi ka nda, 2 hya pətlənya aka ka təl i ana nji'inda na gyalkur təkəra nji aka ga məna ngya mənakəu ana piyarɗufə ku ləvər Hyel. 3 Nacha ngə sənda mənakəu, ya Hyel Ndər Dləuya mən, kwa mər hirgyaɗi ni. 4 Nacha nda kwa i dəhə nji nda uya mbəɗa, ana nda zəndə jiri. 5 Aka Hyel zhang, ndə nda tə ta'i ku pama Hyel ana nji tsəu zhang, nacha ngə Kəristi Yesu. 6 Nacha təkərnyi ngə tə pəliya dəhəkura nji. Nacha ngə Mafakə Mənakə nda nja chabiya tə bəji tsa'atsa'a. 7 Ya nacha ngə sənda gwa'atə nja tabiya ɗa ka ndər bəzə mafakə ana changhabal. Ya ɗa ka ndər dlədləɓə nəna mafakə təkəra jirikur ana jiri nə nji'inda pa'a njir Yahuda. Jiri nə ya kwa dəka a da gəzhi nə ya kwa tla wa.8 Aku kala vi pətlənya, ya kwa i shili, nda hatə nyi cha nda nə Hyel ku pətlənya, ngwa huɗa nda da tla, ndara nda kəpal wa.
9 Ya kwa i mahi'i tsəu, nda gəla na ɓatlə kənda, nda pəndzə dzaki nda ki, ngwa nda ngya ka ɓatlə shishi kənda na sə mbəlmbəl wi ka bəjingha ndara nda pəndzə dzaki nə gaɗagaɗa nda njo ɗəl na kwaba 'ual wa. 10 Kəl nda ana tlər mənakə wi sənda ndər nəu Hyel kwa kina məra.
11 Ngwa mahi'i da dlədləɓə na nya nda mbim wa, kəl nda ana həyakər. 12 A da ya nənyi laku nə mahi'i nda dlədləɓə nə shili, ndara nda ɗa dəgal təkəra nda wa, kəl nda nda bəgə ɗiu, nda səhimi. 13 Aka Adamu ngə Hyel tə ghəya mərtə tangərma, təvi cha nda mər Hawa'u. 14 Ya a da Adamu ngə sərtakə tə shandə nyi kər wa, kəl nda malakə ngə cha shandə nyi kər ngə cha ɓəlnda gadlagadla Hyel, ga ɗa ndər bikəu. 15 Dəhə ka ənga malakə kwa mbəɗa təwa yah ngulisha'a, macha ngya ku jirikur ana nyida ana kartikur mar Hyel, ana ɓəlatə kərnyi.