Gədi ka Pətlənya
3
Udiyanyi ja ka zama ka kwama, hya pətlənya ka ea ga mafakə Tlakə wiɗətədzə kuskusəu, nja dləutsə na səli tang wi nda tə ɗa ku pama hi. 2 Hya pətlənya tsəu ka Hyel mbəɗandə ea tsa nji pu'iu ana nji pəla'a, aka a da dəhə nji tə nənyi jiri wa. 3 Kəl ja, Tlakə ndər gəzə alkawal cha, cho tsakətə hi dunama cho ɓəlatə hi tsa ndə pəla'a nga. 4 A nənyi tə ea jiri ku Tlakəu, ənda kwa mər hi sənda ea dəkar hi ya hyo biyama na məra. 5 Ga Tlakə cha nəu nahi ya ku nyidar Hyel ana səsəu nda tə hya'atə tsa Kəristi.Təɗəhimi təkəra Ngya Tsəp Chi
6 Sakanə ja ka zama ka kwama, ea kwa tsau hi bar ku tləmər Tlakə Yesu Kəristi hya təkəna dəhə njir nəu nda kwa ngya tsəp chi ku ngal, ana nji'inda pa'a kwa nəu tsaubar nda hya uya tsa ea. 7 Nahi təkərnəhi a zəndətə hi təkəɗə a kiti hya dlədləɓə na ea, aka sakanda ea kə'i hi ana ea ngya tsəp chi ku ngal wa, 8 ya ana ea səm sərsum madawa kəla ea kinda wa, kəl ja, ea mər tlər vu'i na pəchi tsa ea da ɗaka ndəka kiɗa val nə hi. 9 A da bəra a da eo kina chul vala wi ngə nga gwa'atə ea mər əngə wa, kəl nda ga ea ɗaka sər dlədləɓə nə hi. 10 Aka mada sakanda ea kə'i hi ma'a ea tsau hi bar ənda, “Ndə nda ngyar tləra, ngwa nji da nənyi sərsum wa.”
11 Aka ea ngatə alenya nji ku huɗa hi kwa ngya tsəp chi ku ngal, kəl ha nya nda ku tlər nji. 12 Aku tləmər Tlakə Yesu Kəristi ea kwa tsau nyi bar nji nga ana təɗəhimi, nda mər tlər tsa'anyata kanda uya sərsum gyaka nya nda. 13 Kəl nahi ja ka zama ka kwama, ngwa hya da həɗa na mər sə da tsa'atsa'a wa.
14 Ma ndə nda tə ngyar nəu sə nə ea dəkə ku kainau na, kəl hya gəla nacha, ngwa hya daɓəkər kə'i cha wa, ga kuzha səya nyi. 15 Kəl ja, ngwa hya hətə nyi ka ndər dawa wa, kəl nda hya təɗəhimi nənyi wi zama.
Udiya Jwamər Usa
16 Tlakə ndər piyarɗufəu təkərnyi, cha nə hi piyarɗufəu kala bəji, ana ku dəhə laku. Tlakə cha ngya tsa'a kə'i hi dəhə hi.
17 Naya Bulus təkərɗa nə tə tsəfə usa nə na cha ya, ya kwa mər əngə ku dəhə kainau ɗa, ga cha char ənda naya ngə tə tsəfa.
18 Papa'akur Tlakən mən Yesu Kəristi cha ngya kə'i hi dəhəu.