2 Ya kwa fal hi aka hya kwa ɗənghatə naya ku dəhə səu, ana ənda hya gəziya dlədləɓə inda, wi nda ya nə hi. 3 Kəl ja, yo i hya ngabiya ənda ndə nda təkəra sal nacha ngə Kəristi, ya ndə nda təkəra mala nacha ngə sal, ndə nda təkəra Kəristi tsəu, nacha ngə Hyel. 4 Ma dəhə sal nda tə pətlənya ndara tə takər na kəra cha mbumbunyi, a həyatə cha tə ndə nda təkəra cha. 5 Ya ma mala nda tə pətlənya ndara tə takər ya a da cha mbuya kəra cha wa, a həyatə cha tə ndə nda təkəra cha, məlməl tanyi na cha sənda kəra cha ndani. 6 Ma malakə tə ngyar mbuya kəra cha, kəl cha sənda kəra cha, kəl ja, macha sər kuzhi cha nə malakə cha sənda kəra cha, cha mbuya kəra cha. 7 Sal nənyi a da ki cha mbuya kəra cha bəjir həsəli wa, aka nja mər nyi pabiya da Hyel ya cho cha səlir Hyel. Kəl ja, mala kwa cha səlir sal. 8 Aka tangərma, a da ku dza mala sal tə biya wa, kəl nda mala ngə tə biya ku dza sal. 9 Ya a da nja ɓatlə sal ka mala wa, kəl nda mala ka sal. 10 Aka ənga, ana aka Chama i'i kwa ndzama, tuku mala cha mbuya kəra cha, ga cha char ənda a da kiɗa gyalkur cha.

11 Dəhə ka ənga, ku ngya kəmən ku Tlakəu, a mala do ngya kəla sal wa, ya sal do ngya kəla mala wa. 12 Madangə mala ku dza sal biya cha tangərma, kəl ja, kala sal mala ngə tə yah, ətsəu, dəhə səu hya'atə tsa Hyel cha. 13 Jigar ma dəma na kəra hi, tsa'atsa'a tanyi malakə pətlənya nə Hyel na kəra cha bang ya? 14 Kərnəhi zəndətə ənda sər kuzhi cha ma sal tə ɗa na shishi nyi dzəgam dzəgaməu. 15 Kəl ja, ma malakə na shishi dzəgam dzəgaməu, səli cha nənyi, aka nja nənyi shishi dzəgam dzəgam ga cha mbuya kəra cha. 16 Macha vanya ndə kwa kəpal təkəra nga, a da ea zəndə vanya sə səkə wa, ya əngə tanyi alenya njir nəu Hyel.

17 Aku tsaubar inənna, a da ya faliya hi wa, aka tsəmdzə kəhi a da nə mənakəkur cha wa, nə zazaɓəkur nga. 18 Tangərma, ya ngatə ənda ma hya tsəmtədzə wi njir nəuwa, ngya pampam da ku pama hi, ya a dləukəri təya. 19 Kəpal da wa njo uya ngya pampam ku pama hi, ga cha char nji'inda Hyel tə dləukər ni. 20 Ma hya tsəmtədza, a da sərsum daɓəkər ngə hyo səm wa. 21 Aka ku səm sərsum kəhi, kala ndə kwa səm sənyi a da cho ɗəngha na alenya nji wa. Vanya ndə kwa ngya na huɓa vanya ndə kwa sa kwa wi. 22 A ki da tsa hi nda hyo səm hyo sa kwa ma? Aa hya həyatə njir nəu Hyel, hya kwa fəu nji'inda pa'a sə tsa nda ku izza ya? Kwa faliya hi ya təkəra ngə ja? Jiri a da wa!

23 Səngə ya nə hi nga, tsa Tlakə Yesu ngə ya dləutsi, bəra, aku vu'i nda nja tləɗanda nyi cha hətə gwazhilakəu, 24 ahir cha usaku Hyel, cha pəpasəu ga na, “Nənna dzaya na, nda njo lənda ka hi. Hya maka mər ənga ga hya ɗəghatə naya.” 25 Əngə tanyi tsəu ahir sərsum akə nda, cha hətə ɗeɗika ga na, “Ɗeɗika nə taɗər alkawal na ku mashi ɗa. Hya mər ənga, ku sakanda hyo sa ti, ga hya ɗənghatə naya.” 26 Aka ənga, dəhə bəji nda hyo ɓanghə gwazhilakə na, ana hyo sa ku ɗeɗika na, Mafakə tər Tlakə nda hyo bəza, kəl bəji nda cha ɓəl shili ti.

27 Aka ənga ja, dəhə ndə nda ɓanghə gwazhilakə ndara cha sa ku ɗeɗika Tlakə na, ya a da cha tsa'atsa'a wa, a mərtə cha səpəla'a nə dza Tlakəu ana mashi Tlakə ndani. 28 Kəl madawa cha dzətə kərnyi təvi cho ɓanghə gwazhilakə ana cha sa ku ɗeɗika. 29 Aka dəhə ndə nda tə ɓanghə gwazhilakə ana cha sa ku ɗeɗika, ya a da cho la'a səlir dza Kəristi wa, nəuma nda cho təɗəkənyi nə kərnyi. 30 Nacha gwa'atə nji ɗang ku pama hi tə təuta, ana tar yiyingkur, alenya nji ma'a tə kuɗa. 31 Kəl ja, ma məna dzətə kərnəmən, a da məno gwa da kiɗa nəumar Hyel wa. 32 Macha Hyel ngə kwa tla nəuma nə mən tsəu, ɓu mən nda cho ɓu mən tsa nja da tlanda mən nəuma ka njir dunəya. 33 Aka əngə ja ka zamə ɗa, ma hya tsəmtədzə ka səm sərsuma, hya səkətə dza. 34 Macha vanya ndə kwa ngatə huɓa, cha səm sərsum ku ki, aka ma hya tsəmtədza, a do shili nahi nəuma wa. Ma ya shili yo tsakətə nə hi tsaubar təkəra alenya səu.