4 Ga'a da pampaməu, kəl ja, Shanguɗə zhang. 5 Lakur mər tlər Hyel da pampaməu, kəl ja, anə Tlakə zhang njo məra. 6 Tlər da pampaməu, kəl ja, Hyel zhang ngə kwa nənyi gyalkur mər nə nji dəhəu. 7 Hyel kwa nənyi ga'ar Shanguɗə Karti nə kala ndə ku pama mən, ka vala kərnəmən. 8 Vanya ndə nja nənyi mafakə dəma, anə vanya ndəu, mafakə zəndi, təwa Shanguɗə zhang nda, 9 anə vanya ndəu nja nənyi ga'ar jirikur, təwa Shanguɗə zhang nda, anə vanya ndəu, ga'ar mbandə nji təwa Shanguɗə zhang. 10 Vanya ndə tsəu ga'ar mər səshinshin, vanya ndəu takər, vanya ndəu ngabiya pampamkura shanguɗə i, vanya ndəu nau ɓwanya na nya pampaməu, vanya ndə tsəu nau ɓəlabiya nya nda pa'a njo ngati. 11 Dəhə sə'inga Shanguɗə zhang ngə kwa məra, kwa təkə nə nji wi nda cho i.

12 Wi ngə dzə zhang ana mədlə ɗanghəu, madangə mədlə ɗanghəu, dzə zhang nda, ya əngə tanyi tsəu ana Kəristi. 13 Aka dəhə mən tə dləutsə baɓtisma ku Shanguɗə zhang, yo dzə zhang, ndara nji'inda njir Yahuda ndara nji'inda pa'a njir Yahuda, ndara mavi'i ndara dimur nji, dəhə mən məna dləutsə ku Shanguɗə zhang.

14 Dzə da mədlə zhang wa, kəl nda mədlə ɗanghəu. 15 Macha hi kwa na, “Mana a da ya chi wa, a da ya mədlə dzə wa,” ngə da katə tsa cha ɗa ka mədlə dzə wa. 16 Əngə tanyi tsəu, ma himi tə na, “Mana a da ya li wa a da ya mədlə dzə wa.” Ngə do katə tsa cho ɗa ka mədlə dzə wa. 17 Macha dəhə dzə li ya, ana mi njo ngatə səa? Macha dəhə dzə himi tsəu ya, ana mi njo tlatə səa? 18 Kəl ja, Hyel tə ɓatliya kala mədlə dzə wi nda cho i. 19 Macha dəhə mədlə dzə zhang, a dzə da wa. 20 Kəl ja, wi ngə tə mədlə dzə ɗanghəu, dzə zhang.

21 Laku da li kwa nar nyi nə chi, “A da yo gwa'a nghə wa,” ndara kər cha nar nyi nə hi, “A da yo gwa'a nghə wa.” 22 A da ka əngə ma'a wa, kəl mədlə dzə nda njo la'a wi dunama kənda da wa, nanda ingə tə ndəɗə na sakəda. 23 Mədlə dzə inda njo la'a wi a da na səli wa, məna kwa ndiya hətə nda səli. Təwa ənga, məno hətə nyi səli nə mədlə nda pa'a na səli. 24 Mədlə inda durdur tsəu, a da kəl nja ɓəla mərtə nda vanya sə wa. Kəl ja, Hyel tə ɓatliya dzə nda pa'a na səli, cha ɗa na səli. 25 Atsa tar daɓətə kər da shili ku dza, kəl nda mədlə i nda ɓəla kərnənda, chul ɓəla zhang. 26 Ma mədlə zhang tə takasa, dəhə mədlə kwa ngati, ma nja faliya mədlə zhang tsəu, dəhə mədlə kwa mər hirgyaɗi.

27 Dəhə hi dza Kəristi hi, ya kala ndə ku pama hi mədlə nyi cha. 28 Aku njir nəuwa, tangərma Hyel tə tabiya kə'i changhabal, mətləkunyi, njir mətakər, makərkunyi njir dlədləɓə nə nji, kəl njir mər səshinshin, ətsəu nji'inda na ga'ar mbandə nji, nji'inda kwa nau vala nji, nji'inda na ga'ar nəu na nji, ana nji'inda kwa ndər na nya pampaməu. 29 Dəhə nda changhabal ya? Dəhə nda njir mətakər ya? Dəhə nda njir dlədləɓə nə nji ya? Aa dəhə nda kwa mər səshinshin ya? 30 Dəhə nji na ga'ar mbandə nji ya? Dəhə nji ngə kwa ɓwanya na nya pampam ya? Aa dəhə nji ngə kwa ɓəlabiya ya? 31 Kəl ja, hya chim ga'a inda tə ndiya. Yo char hi laku nda ndiya na mənakəu.