Kainau Bulus nə Njir Roma nja tsəfa ga cha ɓatliya lakur yi da njir nəu nda Bulus kwa gwa'a yi vu Roma. Sənda cha kwa i nacha ngə cha yi mər tlər ku pama njir nəu inda hinda nə zər bəji kushiu, ahir nga, ana hagwachi kənda, cho nda tərabiya yi Asbaniya. Cha tsəfa ga cha chabiya zəndə nyi təkəra jirikur nə njir nəuwa ana sənda kwa nau ɗana ngyar njir nəuwa. Ku likatəkatə na, njo uya badəgal mafakə nda Bulus kwa i cha dəka.

Ahir cha usar daɓədzər njir nəu inda vu Roma ana cha nar nda ənda kwa pətlə cha nya ka nda, Bulus tə dəkəbiya nda kəra mafakə nyi, nacha ngə: “Aku Mafakə Mənakə ngə Hyel tə dəkar mən ənda cho chabiya mən ngya tsa'atsa'a na cha, nacha ngə nyabiya tə dzə fwatə tə ghəya nyi ya tə udiyanyi təwa nənyi jiri” (1:17).

Bulus tə ghəya sərnya kəra ɓwanya nyi. Dəhə sə ndəndəu, ndər Yahuda ana ndə nda pa'a ndər Yahuda kwa i nja mərtə nyi tsa'atsa'a na Hyel, aka dəhə nda sə zhang nda a da kiɗa gyalkur səpəla'a. Nja kwa mərtə nji tsa'atsa'a təwa jirikur ku Yesu Kəristi. Ahir nga, Bulus tə dəkar sə təkəra taɗər pi ku daɓəkər na Kəristi nda kwa shili na taɗər ngya da kiɗa Hyel. Ndər nəu kwa uya piyarɗufəu tsa Hyel ana nja kwa mərtə nyi ka dimur ndəu tsa gyalkur səpəla'a ana tah təwa Shanguɗə Hyel. Aku səlirma 5 ba'a nə 8, Bulus tə ɓwanya təkəra sənda gadlagadla Hyel təkəri, ana gyalkur Shanguɗər Hyel ku ngyar ndər nəuwa. Ətsəu, ngə Bulus tə wal ɓwanya ənda njir Yahuda ana nji'inda pa'a njir Yahuda kwa ɗa məlməl na sənda Hyel kwa i na dəhə sə ndəndəu. Cha udiya na ənda ngyar ngə njir Yahuda tə ngyar Yesu nga, zhang cha ku sənda Hyel kwa i ga cha shili na dəhə jul nji nda da kiɗa ɗanghalir Hyel ku Yesu Kəristi, ana nənyi tə cha jiri ənda njir Yahuda kwa da nənyi jiri nə Yesu. A tə bata, Bulus tə tsəfa təkəra ənda njir nəu Kəristi kwa kina ngya, a da wi ngya nyida ka alenya nji ma'a wa. Cha ɓwanya təkəra alenya kəra ɓwanya bəra mər tlər cha nə Hyel, wi ka sə'inda njir nəu Kəristi kwa mər nə ngwamnati ana anə kərnənda, sənda ɗufwa ndə kwa na nə kərnyi. Cha ɓəltə kər na mafakər kərnyi ana ɓwanya fal nə Hyel.