Tlər Kə'i Changhabal tə habiya kəra Mafakə Mənakə nda Luka tə Tsəfəbiya. Dəgalər sənda cho i cha chabiya nacha ngə ənda njir nəu inda tangərma, inda Shanguɗə Karti tə nəu na nda, nda bəzə Mafakə Mənakə təkəra Yesu “Avu Urshalima, tə dəhə hə'i Yahudiya ana Samariya, ba'a ya tə ɓəlkər dunəya” (1:8). Labar cha tsəu təkəra lakur njir nəu Kəristi wi nda tə ghəya ku pama njir Yahuda ana tə nda ɗaka lakur jirikur nə dəhə dunəya. Ndər tsəfə likatəkatə nə gwa'atə cha chabiya ənda lakur njir nəu Kəristi da kwa mər dawa nda kwa ɗa ka sər ləvər nə təlkur njir Roma wa, ana jirikur lakur njir nəu Kəristi nacha ngə tə nyabiya lakur njir nəu nə njir Yahuda.

Tlər Kə'i Changhabal nja kwa nau təkəbiya nyi ku mətla wawa'a makərəu, sənda kwa chabiya dlaɓəkura mbwa nda bəzə Mafakə Mənakə tə həya ti: (1) Ghəyar lakur njir nəu Kəristi vu Urshalima ahir tərar Yesu gi huɗamələm; (2) Njir nəu Kəristi tə tsakə tə hə'i Yahudiya; (3) Tə tsakə tsəu yatə hə'i Meditereniya ba'a nə Roma.

Sə mənakə ku Tlər Kə'i Changhabal nacha ngə tlər nda Shanguɗə Karti tə məra, nda tə shili na gyalkur təkəra njir nəu vu Urshalima tə pəchir Pentikos ana tə biyama na nəu na nda kwa tsakə dunama nə njir nəuwa ana anə njirawawa'a kənda. Sə'inda ɗa nja tsəfəbiya ku Tlər Kə'i Changhabal kwa chabiya dunamar mafakə na ku ngyar njir nəuwa ana ku daɓəkər nə tsəmdzər njir nəuwa.