Ngə nda nar nyi, “A mər dəhəu.” Ngə nda biya ga gu param dəhə nda, kəl ja, əvu'i nda, a səda səya nda wa. 4 Tsəɗakə mbudla, kəl jan Yesu ta'iu biya nya bam, kəl ja, a shawa nyi inda da zəndə ənda Yesu nda wa. 5 Ngə Yesu tə nar nda “Nguli Tlakala, a uyatə hi kalfi ya?”

Ngə nda na “A səda uya ea wa.”

6 Ngə cha nar nda, “Sətə ma hiɗi kəhi ya təwa chisəma param nga, hyo uya kalfi.” Ngə nda sətə hiɗi nda, kəl ja, a da nda nau təɗətə shili wa, aka kalfi nyandə ti.

7 Ngə shawa Yesu nda cho nyida nda tə nar nyi nə Bitrus, “Tlakən mən nga!” Nda Shiman Bitrus tə ngatə “Tlakən mən nga,” ngə cha handzə ləkutə nyi, aka tangərma cha səɗənda, ahir nga, ngə cha tləkəl gwatə ɓiti nda. 8 Kəl ja, alenya shawa inda tə shili ku zər param, nda kwa təɗə hiɗi nda shili chaɓə na kalfi, aka a da nda naɗə tsa nya bam wa, wi jiga hi gharəu zhang tanyi. 9 Manda nda biya nya bam, ngə nda la'a hahir hu'u ana kalfi ti, ba'a gwazhilakə dzəri. 10 Ngə Yesu tə nar nda, “Anda ma na alenya kalfi aku ingə hya səya sakan nga.”

11 Ngə Shiman Bitrus tə dləgələu gu param nda ga təɗəbiya hiɗi nda biya nya bam, chaɓə na kalfi wawa'a gharəu na tufkumnyi parnya makərəu. Kəl ja, dəhə ka ɗanghəkura kalfi nda, a hiɗi nda da ta wa. 12 Ngə Yesu tə nar nda, “Anda ma hya tlabiya nya hi.” Kəl ja, aku dəhə ba shawa nyi inda, a ndə zhang da tə mbiyahuɗə ga nar nyi, “Nakə wa nə wa.” Aka a zəndətə nda Tlakə nda. 13 Ngə Yesu təkərnyi tə hətə gwazhilakə nda ga nənda; ngə cha nənda kalfi nda tsəu.

14 Nacha ngə makərkunya bəji nda Yesu tə chabiya kərnyi a nə shawa nyi ahir nda cha hya'atə ku hwa.

15 Ahir nda nda wur na səm sərsum nda, ngə Yesu tə nar nyi nə Bitrus, “Shiman zər Yohana, kwa nyida ɗa kə tsa'anyata ndiya nji'inə ya?”

Ngə cha na “Ah, Tlakəu, a zəndə təka ənda yo nyida ngha.”

Ngə Yesu tə nar nyi “nənyi sərsum nə kətəng ɗa.” 16 Əsəkəu, Yesu tə nar nyi, “Shiman zər Yohana kwa nyida ɗa kə tsa'anyata ya?”

Cha na “Ah, Tlakəu, a zəndətə kə ənda kwa nyida nghə ya.”

Ngə Yesu tə nar nyi “Ɓəla kətəng ɗa.” 17 Makərkunyi cha nar nyi, “Shiman zər Yohana, kwa nyida ɗa kə ya?”

Ngə huɗa Bitrus tə tla təkəra makərkunya jau nda, “Kwa nyida ɗa kə ya?” Ngə cha na, “Tlakəu kwa zəndə kə sə dəhəu, ya zəndə təka ənda yo nyida ngha.”

Ngə Yesu tə nar nyi, “Ɓəla kətəng ɗa. 18 Vəlvəl yo nar ngha, sakanda kə tlakala, ko handzi nyi dzaki nə kərngha, ko ma'i ba nda kəra ka i ti, kəl ja, ku bəji nda ka halti ko har cha ka, ya vanya ndə pam kwa handzə nghə dzaki kwa ma'i nakə ba nda pa'a ko i ti.” 19 Aku ɓwanya nyi, Yesu tə chari chulkə tə nda Bitrus kwa da tah, nda kwa hətə nyi səli nə Hyel. Ahir cha wur na ɓwanya, ngə cha na “Nəu ɗa!”

20 Nda Bitrus tə sha, ngə cha la'a shawa nda Yesu kwa nyida nda kwa nəu nda, (nacha ngə ndə nda tə dəhəndzə nyi kərnyi nə Yesu sakanda nda kwa səm sərsum ti ga jawa, “Tlakəu wa ngə kwa nda tləɗa nghə nga?”) 21 Nda Bitrus tə la'a ndə nda, ngə cha na nə Yesu, “Tlakəu, aman ndə nənnə nənya?”

22 Ngə Yesu tə wuma, “Ma cha yo i cha ngya na pi kəl sakanda ya shili tə ya, mi nənghə kwa? Nakə nə ngha, tuku ko nəu ɗa!”

23 Aka ənga ɓwanya nga wiɗətədzə ku pama njir nəu Yesu inda, ənda shawa ngə do tə wa. Kəl ja, Yesu da na əngə wa, sənda na cha, “Ma cha yo i cha ngya na pi kəl sakanda ya shili ti, mi nənghə kwa?”

24 Na cha ngə shawa nda kwa ɓwanya tangna, ga tsəfəbiya dəhə səu, a zəndətə mən ənda ɓwanya nyi jiri.

25 Alenya sə da ɗanghəu, nda Yesu tə məra. Ma nja nda na njo tsəfəbiya dəhəu, yo hari, a dunəya da na vi nda kwa nau hətə likatəkatə kuranda wa.