3 Ngə Bitrus ana vanya shawa nyi nda tə biya ga təra ya tə hu nda. 4 Kya'a nda ana hwi biya nda, kəl ja, vanya shawa nda tə ndiya Bitrus na hwi ga ghəya yi tə hu nda. 5 Cha uzhi, cho ndzam gu hu nda, cha la'a kəl pa'ua lilin nda ba'a, kəl nda kərnyi da gwa wa. 6 Səkardzə kushiu kəl jan Bitrus shili ti, ngə cha gwa ku hu nda, ma cha la'a kəl pa'ua lilin nda ba'a, 7 ana sənda nja baɗənda kəra cha nə guvakəu təkətəkənyi na pa'ua lilin nda. 8 Kəl shawa nda yi tangərma nda kərnyi tsəu, tə gwa ga la'a ga nənyi jiri. 9 Aka ba'aka saka nga, a da nda ngabiya ənda likatəkatə tə na, tuku kəl na cha hya'atə ku hu wa. 10 Ngə shawa inda ɓəl yo ki.

11 Tsə'u Maryamu ta'iu biyanya hu nda cho tiwi, tsə'u tanyi kwa tiwi ngə cha uzhi ga linghari gu hu nda, 12 kəl cha la'a chama Hyel tsa'a mətləu ana sə pərtə dzən nda a tə ngya tə vi nda nja pinda Yesu tə nda, zhang ki təwa kəra cha, zhang səya təwa hya cha. 13 Ngə nda nar nyi, “Malaka, mi ko tiwa?”

Ngə cha na, “Tlakə ɗa ngə nja həbiya ku hwa, ya a da ya zəndə vi nda nja fiya nyi tə wa!”

14 Ahir nda cha na ənga, macha sha kəl jan Yesu ta'iu, kəl ja, a Maryamu da zəndə ənda Yesu nda wa. 15 Ngə Yesu tə nar nyi, “Malaka, mi ko tiwa? Wa nə ko gwa'a?”

Maryamu tə har ndara tlakər fa nda nga, ngə cha nar nyi, “Saləu, macha nakə nga həbiya nyi, char ɗa vi nda ka pinda nyi ti, ga ya ki hətə nyi.”

16 Ngə Yesu tə nar nyi, “Maryamu!”

Ngə cha sha mbakəu ga nar nyi na nya njir Yahuda, “Rabboni!” Na cha ngə “Maləm.”

17 Ngə Yesu tə nar nyi “Ngwa ka da tsəka ɗa wa, aka a da ya ta gya da Ada gwadagə wa, kəl nda ka təra ka ki nar nyi nə ka zamə ɗa inda, janə yo təra gya dzər Ada ɗa, Ada kəhi tsəu, Hyel ɗa, Hyel kəhi tsəu.”

18 Kəl Maryamu Magdaliya tə hya'atə ga yada shawa nyi inda, cha nar nda, “A la'atə ya Tlakəu!” Ngə cha dəkar nda sənda Yesu tə nar nyi.

19 Pəshi nda pəshir tangərmar hanyi ku suku a ba akəu, shawa nyi inda dəhə ku vi, nyavi dəhə tə haɗa aka ləvər njir Yahuda, kəl janə Yesu ta'i ku pama nda, ngə cha nar nda, “Piyarɗufə cha ngya tsa'a na hi.” 20 Ahir nda cha nar nda ənga, ngə cha char nda cha cha ana yimbilya cha. Ngə shawa nyi inda tə mər hirgyaɗi ana nda nda la'a Tlakən nda. 21 Ngə Yesu tə nar nda səkəu, “Piyarɗufə cha ngya tsa'a na hi. Tang wi nda Ada tə sə ɗa, əngə tanyi tsəu yo sə hi.” 22 Nda cha nar nda ənga, ngə cha fəkə nda papa'akur ga na, “Dləutsə ma Shanguɗə Karti. 23 Dəhə ndə nda hya farbikə nyi, a fartə nji bikə nyi ndani. Madawa tsə'u a da hya farbikə nyi wa, a nji da farbikə nyi ndani wa.”

24 Toma (nda njo nga zər ɓəli) zhang cha ku huɗa nji kwabəmətlə inda, sakanda Yesu tə shili da shawa nyi inda a da cha ku pama nda wa. 25 Ngə alenya shawa inda tə nar nyi, “A la'atə ea Tlakəu!”

Ngə Toma nar nda, “Ma a da ya la'a vir gədanya nda ku cha cha, ya fəu kwalyanghar cha ya ku vir gədanya nda, ana ku yimbilya cha wa, a da yo nənyi jiri wa.”

26 Ahir hanyi chisəu, shawa nyi inda ku vi səkəu, aku bəji nga nanda ka Toma. Ya nyavi kə nda tsa'a tə haɗa, kəl jan Yesu tə ta'i ku pama nda, ngə cha na, “Piyarɗufə cha ngya tsa'a na hi.” 27 Ngə cha nar nyi nə Toma, “Fəu kwalyanghar cha ka ku na, ndzamar cha ya i'i, hatə cha kə ka tsəkar yimbilya ya. Ngwa ka da ɗa kəla jiri wa, kəl nda ka ɗa ndər jiri.”

28 Ngə Toma nar nyi, “Tlakə ɗa, ana Hyel ɗa!”

29 Ngə Yesu tə nar nyi, “Kəl nda ka la'a ɗa ko dzəgwa na'a jiri ya? Njir papa'akur ngə nji'inda pa'ada la'a ɗa, ya nda na'a jiri!”

30 Yesu tə mər səshinshin pampaməu a tə lya ka shawa nyi, nda a da nja tsəfətə dəhə aku likatəkatə nə wa. 31 Kəl ja, nja tsəfəbiya inən na, aka ga hya nənyi jiri ənda Yesu Kəristi ngə Zər Hyel, təwa nənyi jiri tsəu hyo uya pi nda ba'anawa aku Tləm nyi.