Tangərmar Kainau Bulus nə Njir Korinti nja tsəfə nyi aka nja walbiya sə'inda kwa wendə njir nəu Kəristi ku ngya kənda inda tə hya'atə ku pama daɓədzər njir nəu nda Bulus tə mbəɗiya vu Korinti. Atə ndawa bəji, Korinti ngə mələm dəgal nda njo zəndətə hə'i Heleni, mələm dəgal cha nə mətla hə'i Akaya atə hə'i Roma. Nja zəndəbiya Korinti təwa shafəli, mər sər aji, mər sə shushu'u gagaɗa ana lakur nəu Hyel pampaməu.

Sənda Bulus changhabal tə ndiya na ɗəngha nə nacha ingə wi ka təkə kər ana mər sə shushu'a ku pama daɓədzər njir nəuwa, cho ɗəngha təkəra piya sal ana mala, hədza, alenya sə təkəra sənda ɗufwa ndə kwa nar nyi, mər sənda tsa'atsa'a ku daɓədzər njir nəuwa, ga'a nə Shanguɗə Karti, ba'a hya'atər nji kuɗəkuɗa. Dəhə jau inga, Bulus tə wum nənda ana jigadəma ndzuɗakəu sənda Mafakə Mənakə kwa dəka təkəra jau inga.

Səlirma 13 kwa chabiya nyida nacha ngə sənda ndiya mənakə ku huɗa ga'ar Hyel nə nənyawa nji. Kustanyi ma'a, səlirma nə ngə nja ndiya zəndəbiya ku kainau na.