Bulus tə Usar ka Bazhi Nyi
16
Janə yo daɓiya hi ka kwamən mən Fibi, nda nacha ndər mər tlər cha nə njir nəu nda vu Kankiriya. 2 Dləutsə nyi ma ku tləmər Tlakəu, wi nda njir nəu kwa kina məra, hya vala nyi wi nda cho gwa'a tsa hi, aka nacha təkərnyi a vala təcha njir nəu 'ual'ualəu, ana ma'a naya.3 Hya usar ɗa ka Bəriskila ana Akila, bazhi tlər ɗa ku tlər Kəristi Yesu. 4 Nji nda sənda pya nda ka ya. A da kəl naya ngə na usaku nənda wa, ma'a dəhə njir nəu nda pa'a njir Yahuda.
5 Ətsəu usar ma njir nəu nda kwa daɓədzə ku ki kənda.
Hya usar Afanitus bazhi ɗa nda yo nyida gagaɗa, nacha ngə tangərmar ndə nda tə ghəya ɗa ka ndər nəu Kəristi Yesu tə hə'i Asiya.
6 Hya usar ɗa Maryamu nda tə mər tlər 'ual'ual ka hi.
7 Hya usar ɗa ka Andaronikus ana Juniya kuvaɗa njir Yahuda, nji'inda tə ɗaka ngya ku jarum ka ya. Kə'i changhabal zəndə nda tə 'ual'ualəu ku pama nji, ya na nda ghəya nənyi jiri nə Kəristi tsa ya.
8 Hya usar ɗa Amfiliyatus bazhi ɗa nda yo nyida ku Tlakəu.
9 Hya usar ɗa Urbanus, bazhi tlər kəmən nga ku Kəristi, ana Istakis bazhi ɗa nda yo nyida.
10 Hya usar ɗa Abalis nda kwa nəu Kəristi na jiri.
Hya usar ɗa njir ki Aristobulus.
11 Hya usar ɗa Hirudiyan kuvaɗa ndər Yahuda.
Hya usar ɗa njir nəu Tlakə inda ku taki Narkisus.
12 Hya usar ɗa Tarfena ana Taryafusa, mahi'i inga kwa mər nda tlər tsa'anyata ku Tlakəu.
Hya usar ɗa Parsis bazhi ɗa nda yo nyida, ndə nda tə mər tlər Tlakə tsa'anyata.
13 Hya usar ɗa Rufus ndə nda Tlakə tə tabiya. Hya usar ɗa ama nyi tsəu nda hətə ɗa wi zər ta cha.
14 Hya usar ɗa Asinkiritus, Filigona, Harmis, Patrobas, Harmas ana dəhə njir nəu nda kə'i nda.
15 Hya usar ɗa Filoligus ana Juliya ana Niriyus ana kwamə nyi, ana Olimpas, ana dəhə njir nəuwa nda tsa'a ka nda.
16 Hya usar kərnəhi ana gaɓədzər nyida wi njir nəuwa.
Dəhə njir nəu Kəristi kwa usa hi.
Udiya Jwamər Tsaubar Bulus
17 Ka zama ka kwama yo gədi hi hya gəla na nji'inda kwa gwa'atə ngya pampam ku pama hi, kwa gwa'atə hyo tləhi, təwa dlədləɓə nda pam matsa inda hya zəndi. Ɗa ma naɗə tsa nda. 18 Aka chulkə nji inga a da Kəristi Tlakə ngə nda kwa həsəli nənyi wa, kəl nda sənda nda kwa i. Ana ɓwanya məsəɗakə kənda ana fal nə gəzhi nda kwa shandənyi kər nə nji dzadza inda kwa səhimi da nda. 19 Madawa ngatə ti ɓwanya təkəra hi ənda hyo nəu nya Tlakəu, nacha gwa'atə yo mər hirgyaɗi nahi. Kəl ja, yo chim hya ɗa na dəma təkəra sənda mənakəu, ana hya ɗa nji kəla bikə aku mər səɗimi. 20 Hyel nda kwa nə mən piyarɗufəu nacha ngə ndə nda kwa dərɓənda Shantan a da kiɗa hya hi, a da na ɗə bəji wa. Papa'akur Tlakən mən Yesu cha ngya tsa'a nahi. 21 Timtawus bazhi tlər ɗa kwa usa hi, əngə tanyi tsəu Likiyus ana Jason ba'a Sosibatras nji inga kuvaɗa njir Yahuda. 22 Naya, Tartiyus nda Bulus tə na ya tsəfə mafakə na, yo usa hi ku Tlakəu. 23 Gayus ndə nda tə dləutsə ɗa, ndə nda kwa maka dləu dəhə njir nəu ku ki nyi, kwa usa hi. Arastus ndər gəzə məɗəwa nə mələm, ana zamən mən Kwartus kwa usa hi. 24 a
Udiya Jwamər Pətlənya Bulus
25 Sakan ja, a mən fal Hyel ndə da na gyalkur chiya hi ku jirikur təwa Mafakə Mənakə nə yo bəzə təkəra Yesu Kəristi na. Mafakə Mənakə nga nacha ngə sənda tə chabiya sə ɗəwaɗəwa nda fwatə ku aji. 26 Kəl ja, sakana a həbiya tə nji tə babal təwa tsəfə nda njir mətakər tə tsəfa. Hyel nda ba'anawa natə nja pəbəya nyi nə dəhə njir dunəya tə babal, aka ga nda nənyi jiri nda mər sənda tsa'atsa'a. 27 Hyel zhang tanyi ngə ndər dəma, fal ngya tə nənyi təwa Yesu Kəristi ba'anawa. Aɗəmja.