Təɗəhimi təkəra Nəu Katəu
10
Yo i hya zəndə ka zamə ɗa, jival kəmən tə ma'i tə kiɗa ləmbəkəu, dəhə nda tsəu tə tərabiya tahə fa'a atə hə'i ul'ula. 2 Aku ləmbəkəu ana aku fa'a nja mərtə nda baɓtisma dəhə nda, ka nda ɗa ka njir nəu Musa. 3 Dəhə nda tsəu tə səm sərsum nə Shanguɗəu, 4 ya dəhə nda tə sa ɓitir Shanguɗəu, aka nda sa ɓitir Shanguɗə nda biya ku mə nda tə ma'i ka nda, ya mə nda, nacha ngə Kəristi. 5 Dəhə ka ənga, Hyel da ngatə mənakə na badəgal nə nda wa, Hyel tə kuɗənda nda ga wiɗənda kumur dza nda kwa takəu.6 Sə'ingə tə ɗa ka ba'ada tsa məna da i səɗimi wi nda mər nda. 7 Ngwa hya da ɗa ka njir həsəli nə katə wi nda alenya nji ku pama nda tə mər wa. Wi nda Likatəkatə tə na, “Nji tə ngya, nda səma, nda sa, nda gwa ku ladər shushu'ukur.” 8 Ngwa məna da gwa ku shushu'ukur wi nda alenya nji ku pama nda tə mər wa, nda tə gwa'atə nji dəbu mətləkumənyi parnya makər tə kuɗə pəchi zhang. 9 Ngwa məna da dzə Kəristi wi nda alenya nji ku pama nda tə mər wa, nacha gwa'atə pwabu tə kuɗənda nda. 10 Ngwa məna da ɗa njir huhuni wi nda alenya nji ku pama nda tə mər wa, nacha gwa'atə chama tah tə kuɗənda nda.
11 Sə'ingə tə ɗa nga ba'ada ngə nə mən, ya nja tsəfətə ka ga nja təɗəhimi nə mən, namən nda batəbatər bəji tə həya mən. 12 Aka ənga, macha ko har ənda ta'i təkə na dunama, ka gəla tsa ka da dla. 13 A vanya sərmbukə da ta uya hi, nda a da nja tsəl na mərtə nyi nə ndə wa. Hyel ndə mənakə cha, a da cho ngyar nja dzə hi nda kwa ndiya dunama kəhi wa, kəl ja, ma hya gwa ku sərmbukəu, Hyel kwa mbəɗiya laku nda hyo ɗana səsə'uti.
14 Aka əngə ja, ka bazhi ɗa nda yo nyida, hwi ma tsa həsəli nə katəu. 15 Nahi njir dəma hi, ndzamar ma na kərnəhi hya la'a ndara jiri ngə sə'ingə yo dəkə nga. 16 Ɗeɗika papa'akur ngə məno usaku təkər ngə ya, a da nacha nga gwa'atə məna ɗa zhang ku mashi Kəristi ma? Gwazhilakə ngə məno njinjiɗə ngə tsəu ya, a da nacha nga gwa'atə məna ɗa zhang ku dza Kəristi ma? 17 Mana gwazhilakə ngə zhang, namən nda ɗang dzə zhang mən, aka gwazhilakə zhang dəhə məna kwasa. 18 Ndzam ma njir Isra'ila, a da dzə zhang nda ku səm sənda nja hatəmachi nə tə dzəgana hatəmachi nda ma? 19 Minə yo na ja, sənda nja hatəmachi ni, nə katə vanya sə cha ya? Aa katə ya vanya sə cha ya? 20 A da wa, kəl ja, hatəmachi nji kəla nəu Hyel nə məlləm nda ha, a da nə Hyel wa, ya a da yo i hya ɗa sə zhang ka məlləm wa. 21 Laku da hyo sa ku ɗeɗika Tlakə ana nə məlləm wa, ya laku da hyo səm sərsum tə tyaɓər Tlakəu ana nə məlləm wa. 22 Aa məno gwa'a məna tliya huɗa Hyel ya? Bəliya namən na dunama tsa cha ya?
Dimukur Njir Nəuwa
23 “A ngya mən tə nji məna mər kala səu.” Kəl ja, a da dəhə sə ngə mənakə wa. “A ngya mən tə nji məna mər dəhə səu.” Kəl ja, a da dəhə sə ngə na sakəda wa. 24 Ngwa ka ɗəngha kəl ana kərnghə wa, kəl nda ka ɗəngha na alenya nji.
25 Səm ma dəhə chul kum nda njo ɗəlnda tə suku, a da kəl hya jau wa, tsa ɗufwa hi da ɗəngha na mbwa nda a hya'atə ti. 26 Aka Likatəkatə tə na, “Dunəya ana dəhə sə'inda kwa, nə Hyel nga.”
27 Ma nji kəla zəndə Hyel tə nga hi ka səm sərsuma, ya ngə hya dləukər hya ma'i, səm ma dəhə sənda nja nə hi a da kəl hya jau wa, tsa ɗufwa hi da ɗəngha na mbwa nda sərsum tə hya'atə ti. 28 Kəl ja, ma kala ndə tə nar hi, “Katə nə nja tla ni,” əngwa hya səm wa, aka səlir ndə nda nar hi nda, ana tsa jigadəmar ɗufəu da ɗa na bikəu. 29 Jigadəmar ɗufwa cha ngə yo na a da nəkə hi wa. Mya gwa'atə jigadəmar ɗufwa vanya ndə kwa katə dimukur ɗa? 30 Ma ya usaku Hyel təkəra sərsum ga səm ya, mya gwa'atə njo pə ɓwanya ɗimi təkəra sənda ya səma?
31 Aka əngə ja, dəhə sənda hyo məra, ndara səma ndara sa, hya mər dəhə səu ka səlir Hyel. 32 Ngwa hya gwa'atə njir Yahuda, ndara nji'inda pa'a njir Yahuda, ndara njir nəu Hyel tləhi wa. 33 Yo mbadzə ya mərtə nji ngatə məsəɗakə ku kala laku, a da ka kərɗa wa, kəl nda ka sakədar nji ɗanghəu, aka ga nda uya mbəɗa.