Sər Hatəmachi nda na Pi
12
Aka əngə ja ka zamə ɗa ka kwamə ɗa, aka 'ualkura təhuɗər Hyel nə hi, yo gədi hi, hya nənyi kərnəhi wi sər hatəmachi nda na pi nə Hyel, nda nja dzəvəya ka cha, ya sənda cho ngatə mənakə ni. Nacha ngə laku jiri nə həsəli. 2 Ngwa hya da dlədləɓə ngyakəngyar dunəya nə sakanə wa, kəl nda hya dləukər Hyel shabiya hi cha mərtə ɗufwa hi ana jigadəma kəhi taɗəu. Təwa ənga hyo nau zəndə təkəɗər jigadəmar Hyel, nacha ngə sənda mənakəu, sənda Hyel kwa i ana sənda tsa'atsa'a.3 Təwa ga'ar ɗanghali pampam nda Hyel tə mərtə ɗa yo na nə madawa ku huɗa hi, ngwa ka da hə kərngha ndiya matsa ənda kə wa, a təvəra ənga, ngwa shakər nə kərnghə wa, kəl nda ka jigadəma təkəra kərngha ana həyakər, məlməl na jirikur nda Hyel tə nə ngha. 4 Wi ngə tə dzə na mədlə ɗanghəu, ya dəhə mədlər dzə inga, ana tlər kənda pampaməu, 5 əngə tanyi namən ma'a, madangə ɗang mən, daɓədaɓənyi mən ku dzə zhang ka Kəristi, ya madawa ku huɗa mən, mədlə dzə cha nə kuvanyi. 6 Hyel aku mənakəkur nyi cha nə mən ga'a pampaməu, məlməl na ɗanghali nda nja mərtə mən. Ma cha ga'a kəmən nə takər, mən takər məlməl na jirikur kəmən. 7 Macha ga'a nə tlər nə nji, mən mər tləra, macha nə dlədləɓə nə nji, mən dlədləɓa. 8 Macha nə tsəɗufəu, mən tsəɗufəu, macha nə vala njir gwa'a, mən mər na chi wunghəu. Macha nə nəu na nji, mən mər nyi tsa'anyata, macha nə ngatə təhuɗəu mən mər na hirgyaɗi.
Nyida
9 Nyida tuku cha ɗa tsa'anyata, hya ɗa tsa səɗimi, kəl ja, hya dləndzənyi kərnəhi nə sənda mənakəu. 10 Nənyi ma kərnəhi nə nyida, wi ka zama ka kwama njir nəuwa, ka hətə nyi səli nə kuvangha ndiya matsa kərngha. 11 Mər tlər 'ual'ualəu, ngwa ka da ɗa kukufə wa. Mərtə nyi tlər nə Tlakə na dəhə ɗufwa ka. 12 Hya mər hirgyaɗi ku fəkər kəhi, hya səsə'ua ku ɓwaɓwatəu kəhi, hya ngya na pətlənya. 13 Hya təkəya ka kuvanəhi njir nəu Hyel nda kwa gwa'a, hya ɗa ka njir dləu mihiɓi.
14 Hya fəkənyi papa'akur nə nji'inda kwa ɗa məndza'u nahi, hya fəkə nda papa'akur ngwa hya da shu'unda nda wa. 15 Hya mər hirgyaɗi ka nji nda kwa mər hirgyaɗi, hya tiwi ka nji nda kwa tiwi. 16 Hya ngya mənakə na madawa. Ngwa hya da hə kərnəhi wa, kəl ja, hya ɗa ka bazhinya nji'inda njo həyati. Ngwa hya da hətə kərnəhi wi njir dəma wa.
17 Ngwahya da ki ɗimikur na ɗimikur wa. Hya mbadza hya mər sənda tsa'atsa'a tə lya madawa. 18 Macha kwa ɗa cha, hya mbadzə hya ngya mənakəu na madawa. 19 Ka bazhi ɗa nda yo nyida ngwa hya da gwa'a kisəkur wa, a təvəra ənga, hya ngya nyi ni nə huɗətlar Hyel. Aka likatəkatə tə na, “Kisəkur na'a nga, nayo kya,” ənghwandə Tlakəu. 20 A təvəra ənga, “Ma huɓə kwa tə njir dawa kəhi hya nənda sərsuma; ma nda kwa ngatə hili, hya nənda sər sa, təwa ənga hyo ɓukənda hahir kuzhi təkəra nda.” 21 Ngwa hya i ɗimikur kura hi wa; kəl nda hya kura ɗimikur na mənakəkur.