La'a Səlir Njir Gyalkur
13
Təku madawa cha ɗa na kəriwa nə nji'inda na gyalkur ku ngwamənati. Aka dəhə gyalkur hya'atə tsa Hyel cha, ya nji'inda tə vir gəla nji, Hyel ngə tə fiya nda. 2 Aka ənga dəhə ndə nda tə ɗa kangal nə njirawawa'a nə ngwamənati, ɗatə cha kangal tə sənda Hyel tə fiya. Ya njir mər əngə tsəu, nda kwa təɗəkənyi nəuma nə kərnənda. 3 Aka njirawawa'a nə ngwamənati a da nda sər ləvər nə nji'inda kwa mər sənda tsa'atsa'a wa, kəl nda anə nji'inda kwa mər səɗimi. Kwa i ka təkəna ləvər ndə nda na gyalkur ku cha cha ya? Kəl ka mər sənda tsa'atsa'a, nacha tsəu cho faliya ngha, 4 aka nacha mava Hyel cha, ka ga cha ɓatliya nghə ngya mənakəu. Kəl ja, macha ndər mər səɗimi ka, ka ləvəra, aka a da ɓwa'atanyi ngə cha na katsakər ku cha cha wa. Mava Hyel cha, ya təwa nyi huɗətlar Hyel kwa shili təkəra ndəu, ka cha ɓutə njir mər səɗimi. 5 Aka ənga ɗatə təku hya ɗa kəriwa nə nji'inda na gyalkur ku cha nda. A da ka ga hya mbəɗə tsa huɗətlar Hyel tanyi wa, kəl nda ga jigadəma kəhi ɗa kəla bikəu.6 Nacha ngə sənda gwa'atə tsəu hyo ki tsachi, aka njir gyalkur ku ngwamənati njir mər tlər Hyel inga. Nda kwa hətə dəhə bəji kənda ka tlər nəuna nji. 7 Kinda ma sənda təkəra hi nə ndə nda kwa nəu hi, macha tsachi nə kərnəhi hya kinda, macha nə kar kəhi tsəu hya kinda. Nji nda njo kina ləvəra, hya ləvər nda, nji'inda njo kina hətə nda səli, hya hətə nda səli.
Nyida Ma Kərnəhi
8 Ngwa hya da i məl ɗa təkəra hi wa, kəl nda nə nyida kərnəhi, aka ndə nda kwa nyida təwul nyi a nyabiya təcha gadlagadla Hyel. 9 Gadlagadla nda na, ngwa ka da mər kasalikur wa, ngwa ka da tsa ndə wa, ngwa ka da həl wa, ngwa ka da ndahuɗə sər ndə wa, dəhə sə'i nga, ana alenyi, a daɓiya tə dza ku gadlagadla zhang, “Ka nyida təwul ngha wi nda ko nyida kərngha.” 10 Nyida da kwa ɗiya nji wa, aka nacha ngə tə nyabiya gadlagadla dəhəu. 11 A ɗatə tuku hya mər sənga, aka zəndətə hi bəji nə mən kwa na, bəji ɗatə aka hya hya'atə ku hanyi kəhi. Aka bəji nda njo dləuya mən ɗatə ləhə sakana matsa ku bəji nda məna ghəya nənyi jiri ti. 12 Vu'i kaɗa wura, pəchi kaɗa zədi, məna ngyar mər sə'i nda nə kutla, mən fa'atə balmi pa nə vimbəlmbəla. 13 Məna ngya kəmən wi nda ɗa tsa'atsa'a na nji'inda kwa ngya ku vimbəlmbəla, a da na ladər kəla kər ana wi wa, ndara kala chul kasalikur, ndara pa, ndara shishi wa. 14 Kəl nda hya handzə Tlakə Yesu Kəristi ka kar pa kəhi, ngwa hya ngyar ndəkurndə gəla hi cha gwa'atə hya ɗa na mwaɓər ɗimi wa.