Təhuɗər Hyel təkəra Njir Isra'ila
11
Yo jau ya, Hyel ngyar tə nənyi na nji ya? A da pa'a wa! Naya təkərɗa ma'a ndər Isra'ila ya, nyandəla Ibrahim, aku nyavi Banyami. 2 A Hyel da ngyar nənyi na nji'inda cha tabiya tangərma wa. A zəndətə hi sənda likatəkatə tə na təkəra Iliya, ənda cha wula njir Isra'ila nə Hyel. 3 “Tlakəu, a kuɗənda tə nda njir mətakər ngha, ətsəu, nda dlanda dzəgana hatəmachi ngha. Kəl naya na həyadza, ya jan nda kwa gwa'a ɗa ka tsa.” 4 Aman nda Hyel tə wum nənya? “A fiya təya nji dəbu məɗəfə nə kərɗa, nji'inda pa'a ta həsəli nə katə Ba'al.” 5 Əngə tanyi sakanə ma'a, nji da tsaɗə nda Hyel tə ɗəmtsə aka ɗanghali nyi. 6 Ya macha aka ɗanghali nyi cha ɗəmtsə nda, a da ka tlər kənda nganə wa. Macha a da əngə wa, ɗanghali nyi da nə jirijiri wa.7 Aman nganə ja? Njir Isra'ila da uya sənda nda kwa gwa'a tsa'anyata wa. Kəl nji tsaɗə nda Hyel tə ɗəmtsə nga uya; həyadzər nji'inda tə ɗa ka nji kəla ngatə ndəra. 8 Wi nda likatəkatə tə na, “Hyel tə mərtə nda nji kəla ngabiya səu, cha haɗiya lya nda tsa nda da la'a səu, cha datə himya nda tsa nda da ngatə səu, ba'aka sakana.” 9 Ngə Dauda tə na, “Cha nda ɗa ɗəm ja, nja səya nda na ləbam ndara dalivyang ku bəjir ladər kənda, papa'akur kənda cha gwa'atə nda tləhi, nda uya sənda nda kwa kini. 10 Cha ɗa lya nda wuləfə nda a da nda kwa la'a sə wa; wulya nda nga na tədəɓəkura ɓwaɓwatə nda nda sa.” 11 Ba'a sakana yo jau ya, nda njir Isra'ila tə tləhi ga dla ya, a tsə'u nda kwa hya'atə wa ya? Jiri nda kwa hya'ati! Aka səpəla'a kənda, nji'inda pa'a njir Yahuda tə uya mbəɗa, ga nja mərtə njir Isra'ila nda ngatə shishi kənda. 12 Ya macha səpəla'a njir Isra'ila tə gwa'atənyi papa'akur 'ual nə njir dunəya, təutətəutəkur kənda tsəu tə gwa'atənyi papa'akur nə nji'inda pa'a njir Yahuda. Aman 'ualkura papa'akur nda kwa ɗa ma bəji nda dəhə njir Isra'ila tə dləukər na Dləuya!
13 Sakan ja, anə nji'inda pa'a njir Yahuda nə yo ɓwanya. Wi changhabal Hyel nə nji'inda pa'a njir Yahuda, yo la'a səlir tlər nda ma ɗa. 14 Təwa ənga, yo gwa'atə njir Isra'ila ngatə shishi, ndara tsəu ya dləuya alenya nji ku pama nda. 15 Aka macha ngya nda nda Hyel tə ngya nda tə gwa'atə nja ɓatliya pama njir dunəya na Hyel ya, aman ma nja dləutsə nda? A cho ɗa wi pi hya'atə ku tə ma? 16 Ma nja dzəvəya mar gwazhilakə ka tangərmar ga'a nə Hyel, dəhə gwazhilakə nda nja dzəvəya, ya ma ngilangha wu tə ɗa nə Hyel, dəhə ka cha wu nda ndani.
17 Alenya cha wur zaitun nda nja zwa da tə ɓəla, ngə nja hətə vanya cha wur zaitun takəu ga dləɓəndzə nyi. Nahi nji'inda pa'a njir Yahuda wi cha wur zaitun takə hi, ya nahi ngə nja dləɓəndzə nyi nə ngilangha wur zaitun dur, nacha ngə njir Yahuda. Təwanə nda ngə hyo uya papa'akur Hyel. 18 Aka əngə ja, ngwa hya da wovi nə cha wu inda ɓəl nda wa, ma hya mər ənga, hya ɗənghatə a da nahi ngə kwa gəzə ngilangha wu wa, kəl nda ngilangha wu ngə kwa gəzə hi. 19 Ko nau na, “Nja gəganda cha wua ka ga nja uya lakur dləɓəndzə ɗa nə ngilangha cha.” 20 Ah Ənga, kəl ja, nja gəganda nda aka a da nda nənyi jiri wa, ya nahi tsəu aka hya nənyi jiri hya uya ngya tə ngilangha wu nda. Aka ənga ngwa hya da hə kərnəhi wa, kəl nda hya ləvər sənda kwa ɗa. 21 Ya macha a Hyel da tə ngyar pa'akura cha wua nda wa, nahi ma'a a da cho ngya hi wa.
22 Hya ndzamar ja hya la'a mənakəkura Hyel ana dza'ukura cha. Cha ɗa dza'u nə nji'inda dla, kəl ja, mənakə nə hi, ma hya biyama na ngya ku mənakəkur nyi. Kəl ja, ma a da wa, na hi tsəu njo tsau nda hi. 23 Ana ma njir Isra'ila tə sha tsa tar jirikur kənda, njo ɓəlau nda gwatə mbwar ngya kənda nda; aka Hyel kwa nau mərtə ənga. 24 Sənda pa'a nja tsəl ni nga, nahi nji'inda pa'a njir Yahuda nja gəganda hi wi cha wur zaitun takə ga dləɓəndzə nyi nə wur zaitun nda njo zwa. Njir Isra'ila ngə wi wur zaitun nda njo zwa, ya cho ndiya ɗa kusə nə Hyel cha dləɓəti cha wu nda nja gəganda yatə məngya kənda səkəu.
Dəhə Njir Isra'ila kwa Uya Mbəɗa
25 A da yo i hya ɗa na tar zəndə sə ɗəwaɗəwa nə ka zama ka kwama wa, tsa hya da hə kərnəhi. Alenya njir Isra'ila tə ɗa na ɓaɓalkur kər, ya kəl nda ɗar na ɓaɓalkur kər kənda kəl bəji nda dəhə nji'inda pa'a njir Yahuda nda Hyel tə nga tə shili da Kəristi. 26 Təwa ənga, njir Isra'ila dəhə kwa uya mbəɗa. Wi nda Likatəkatə tə na
“Ndər dləuya kwa shili
hya'atə vu Sihiyona.
Cho hənda dəhə tar ləvər Hyel
ku nyandəla Jakop.
27 Ya nənnə ngə mbandər ɗa ka nda,
bəra yo hənda səpəla'a kənda.”
28 Njir Isra'ila ɗang tə ɗa ka njir dawa na Mafakə Mənakəu. Nacha nga ɗa ka sər sakəda nə hi, nahi nda nji'inda pa'a njir Yahuda. Dəhə ka ənga tsəutanyi Hyel kwa nyida nda, aka cha tabiya ka jival kənda, Ibrahim, Ishaku ana Jakop. 29 Aka a Hyel da kwa sha nya cha təkəra ga'a nyi i'i ana nga nda cha nga ndəu wa. 30 Nahi nji'inda pa'a njir Yahuda ɗakaɗa, nji kəla nəu nya Hyel hi, kəl ja, sakana uyatə hi təhuɗər Hyel aka tar nəu nya Hyel nə njir Isra'ila. 31 Əngə tanyi tsəu, njir Isra'ila tə ɗa ka njir kəpal nya Hyel sakana, aka ga ma'a nanda uya təhuɗər Hyel, təwa təhuɗər Hyel nə hi. 32 Aka Hyel tə mbiya dəhə nji ku kəla ngatəndərkur kənda, aka ga cha char təhuɗə nyi nə dəhə nji.
Fal nə Hyel
33 Kəpal da wa, ndzuɗakəkura uya, dəma,
ana zəndə nda tsa Hyel
a ɓələnyi da wa!
Nəuma nyi a ndər ngabiya da wa,
lakun nyi tsə'u a ndər nau nəubiya da wa!
34 “Wa kwa zəndə
jigadəma Tlaka?
Wa na zəndə pəlakər jigatənyi dəma?a
35 Wa ta nənyi vanya sə nə Hyel,
nda ɗatə tuku Hyel kinda nya?”b
36 Aka nacha tə mər dəhə səu,
ya dəhə səu kwa ngya təwa gyalkur nyi,
ya aka səli nyi.
Dəhə səli ngya tə nə Hyel ba'anawa! Aɗəmja.