10
Ka zamə ɗa ka kwamə ɗa, chim ɗa ana pətlənya ɗa nə Hyel dəhə ɗufwa ya njir Isra'ila nda uya mbəɗa. 2 Yo nau ta'i tə ya nda ənda kwa i nda nda nəu Hyel tsa'anyata, kəl ja, a da na təkəɗər zəndə wa. 3 Aka a da nda zəndə laku nda Hyel kwa mərtə nji tsa'atsa'a na kərnyi wa, ya nda kwa mbadzə ka nda ɓatliya lakur ɗa tsa'atsa'a na Hyel nə kərnənda təwa nəu gadlagadla, aka ənga a da nda nənyi kərnənda nə laku nda Hyel kwa mərtə nji tsa'atsa'a na cha wa. 4 Aka Kəristi ɓəlndatə gyalkur gadlagadla, ka ga dəhə ndə nda tə nənyi jiri ɗa tsa'atsa'a na Hyel.Madawa kwa Nau Uya Mbəɗa
5 Aka Musa tə tsəfətə sə təkəra ɗa tsa'atsa'a mar Hyel təwa nəubiya gadlagadla, cha na, “Dəhə ndə nda nəubiya tsaubar gadlagadla cho uya pi.” 6 Kəl ja, janə sənda likatəkatə təkəra ɗa tsa'atsa'a mar Hyel təwa jirikur tə na, “Ngwa ka da na ku ɗufwa kə ənda, ‘Wa kwa gi huɗamələma?’ (Ka cha gi səya na Kəristi.)” 7 Ya ngwa ka na, wa kwa gwa kə njikə mambəla? (Ka cha gwa zəbiya na Kəristi na pi səkəu). 8 Ətsəu jan sənda ɓwanya Hyel tə na, “Mafakə Hyel ləhə cha dzə ngha, aku nya ka ana ku ɗufwa ka.” Nacha ngə, mafakə jirikur nə ea kwa bəzə na. 9 Maka pəbəya na nya ka ənda Yesu Tlakə cha ya ngə ka nənyi jiri ku ɗufwa ka ənda Hyel tə hya'andə nyi ku hwa, ko uya mbəɗa. 10 Aka təwa nənyi jiri ku ɗufəu ndə kwa uya ɗa tsa'atsa'a mar Hyel, ya təwa pəbəya na nya, ndə kwa uya mbəɗa. 11 Wi nda likatəkatə tə na təkəra Kəristi, “Dəhə ndə nda tə nənyi jiri a da cho sa kuzhi wa,” 12 aka a pam da ku pama njir Yahuda ana nji'inda pa'a njir Yahuda wa, Tlakə zhang nga nacha nə madawa, ya nacha ngə kwa nənyi bwaɓəkura papa'akur nə dəhə nji'inda tə gədi nyi. 13 Aka, “Dəhə ndə nda tə gədi ku tləmər Tlakəu, cho uya mbəɗa.”
14 Kəl ja ya, aman nda kwa gədi ndə nda a da nda nənyi jiri wa? Ya aman nda kwa nənyi jiri nə ndə nda a da nda ngatə mafakə təkəra cha wa? Ya aman nda kwa ɗana ngatə macha a da nja bəzə mafakə nə nda təkəra cha wa? 15 Ya aman nda kwa ɗa na bəzə mafakəu macha a da nja sə njir bəzə wa? Wi nda Likatəkatə tə na “Aman mənakəkura shilir njir bəzə Mafakə Mənaka!” 16 Kəl ja, a da dəhə njir Isra'ila tə dləutsə Mafakə Mənakə nda wa, wi nda Ishaya tə na, “Tlakəu, wa nənyi jiri nə mafakə kəea?” 17 Aka ənga, jirikur kwa ɗa təwa ngatə mafakəu, ya nda kwa ngatə ma nja bəzə mafakə nənda təkəra Kəristi.
18 Kəl ja, yo jau ya, vəlvəl a njir Isra'ila nda ngatə mafakə nda waya? Jiri, ngatə tə nda, wi nda likatəkatə tə na, “Kuraka ndər bəzə mafakə ma'i tə dəhə dunəya, mafakə kənda tsəu ma'i tə dəhə ɓələkər dunəya.” 19 Yo jau səkə ja ya, a njir Isra'ila da ngabiya ma? Tangərma Musa tə na, “Yo mərtə hyo ngatə shishir nji kəla hə'i, təwa nji'inda pa'a njir Yahuda kəla dəma yo gwa'atə hyo mər huɗətla.” 20 Ngə Ishaya tə ɓwanya tə babal ənda Hyel tə na, “Nji nda a da gwa'a ɗa wa, na nda nga uya ɗa, ya chabiya kərɗa nə nji'inda pa'a tə gwa'a ɗa.” 21 Kəl ja, təkəra Isra'ila Hyel tə na, “Pa'a pəchi ya ha cha ya ka ga ya dləutsə nji kəla nəu nya ya ana nji kəla ngatə ndəra.”