6 A da yo na ənda a Hyel da nyabiya alkawal nyi wa, aka a da dəhə njir Isra'ila ngə nji ɗəmɗəm nə Hyel wa. 7 Aka nda nyandəla Ibrahim da char ənda nguli Ibrahim nə jirijiri nda wa, aka Likatəkatə tə na, “Ishaku ngə zər nda təwa nyi njo jiga nyandəla ka.” Madangə alenya nguli Ibrahim da. 8 Nga char a da dəhə nyandəla cha nda nja yah təwa piyar sal na mala ngə nguli Hyel wa, kəl nyandəla cha nda təwa alkawal ngə njo jiga. 9 Aka anə sənda alkawal Hyel tə na, “Sakanə pəta yo ɓəl shili, Saratu kwa uya zər.”

10 Zər nga nacha ngə Ishaku jival kəmən, nda cha hə Robeka cha yah ɓəli. 11 Ya təvi nja yah nda, təvi nda zəndə sə mənakə ana səɗimi, Robeka uya mafakə tsa Hyel, mafakə nga char ənda Hyel kwa ɗəmtsə nji məlməl na sənda cho i, 12 cho nga nji a da ka sə mənakə ndara səɗimi nda nda kwa mər wa. Nja nar nyi ənda, “Zər dəgal nga kwa nda mər mavakur nə zər kushi nga.” 13 Wi nda Likatəkatə tə na, “A nyidatə təya Jakop kəl ja, ngyar tə ya Isuwa.”

14 Kwa nau məna na ənda Hyel kwa tazhira ya? A da pa'a wa. 15 Aka Hyel tə nar nyi nə Musa, “Yo char nyi papa'akur nə ndə nda yo i, yo ngatə təhuɗə ndə nda yo i.” 16 Aka əngə ja dəhə sə ta'itə təkəra təhuɗə nda Hyel ni, a da ka chim nda ndə kwa chima, ndara mbadzə nyi wa. 17 Aka Hyel tə na nə Fir'auna ku likatəkata, “Ya fiya nghə təl ka ga ya mər tlər naka, ya char gyalkur ɗa ana ya bəzə tləm ɗa nə dunəya dəhəu.” 18 Aka əngə ja, Hyel ana təhuɗə cha təkəra dəhə ndə nda cho i, ya cho mərtə ɗufwa dəhə nda cho i ɓaɓaləu.

19 Aka ənga, hyo nau na, “Mya gwa'atə tsəutanyi Hyel kwa la'a bikər nja? Wa kwa nau katə sənda Hyel kwa i cha məra?” 20 Kəl ja, nakə wa kə ndəu, kwa nau ɓəlakə nyi nə Hyella? Kwa nau sənda nja ɓatlə nar nyi nə ndə nda ɓatlə nyi “Mya gwa'atə ka ɓatlə ɗa ənə ya?” 21 Gyalkur da tsa ndər hər təm cha mər tlər na nyingha zhang cha hərtə təm, alenyi ka tlər nda na səli, alenyi ka tlər huɗəvi.

22 Ya əngə tanyi tsəu, madangə gyalkur da tsa Hyel ka cho char huɗətla nyi ana gyalkur nyi, nacha ndər səsə'u na nji'inda huɗətla nyi kwa səya təkəri cha, nji'inda nja ɓatliya ka kuɗa. 23 Hyel kwa səsə'ua ga cha chabiya 'ualkura səli nyi, anə nji'inda cho ngatə təhuɗə kənda, nji'inda cha ɓatliya ka səli nyi nda kwa shili. 24 Ndara nji'inda njir Yahuda ndara nji'inda pa'a njir Yahuda, namən ingə nji'inda cha nga. 25 Wi nda na cha ku likatəkatə Hosiya, “Nji nda pa'a na'a na nji yo nga nda na'a na nji, hə'i nda pa'a ya nyidati, yo nyidatə nda.” 26 Ana, “Atə mbwa nda nja na nə nda, ‘A da hi na'awa nji wa,’ njo nga nda ‘Nguli Hyel nda na pi.’ ” 27 Ishaya tə tiwi nyar Isra'ila ga na, “Madangə njir Isra'ila ɗang wi məshishi'ua nya dəl, tsaɗə tanyi ku pama nda kwa uya mbəɗa. 28 Aka Tlakə kwa tlanda nyi nəuma nə njir dunəya a da na ɗə bəji wa.” 29 Wi nda Ishaya tə na tangərma, “Pa'a Tlakə Ndər Gyalkur tə nda həya nyandəla ea tsaɗə wa, njo nda kuɗənda ea wi njir Sodom ana Gomora.”

30 Mi məno na nganə ja? Nji'inda pa'a njir Yahuda nda a da mbadzə ka gwa'a ɗa tsa'atsa'a na Hyel, a mərtə nda tə nji tsa'atsa'a na Hyel, ya təwa jirikur ngə səngə tə ɗa ənga. 31 Kəl ja, njir Isra'ila nda tə mbadzə ka nda ɗa tsa'atsa'a na Hyel təwa nəu gadlagadla, a nda uya wa. 32 Mya gwa'ata anda uya wa? Aka a da nda gwa'a ɗa tsa'atsa'a na Hyel təwa jirikur wa, a təvəra ənga nda gwa'a təwa ɓəlatə gadlagadla. Nda tləhi tə “Mangu tləhi,” 33 wi nda cha tsəfətsəfə nyi bəra, “Anə ya fiya tə hangu ku Sihiyona, nda kwa gwa'atə nji kwa tləhi, hangu nda kwa gwa'atə nda kwa dla, kəl ja, dəhə ndə nda tə nənyi jiri a da cho sa kuzhi wa.”