Patʉpan Jesús mat-echpox pejme dukaliajwa
28
Napatamatkoi toep wʉt,
dominkomatkoi wʉt,
juimt julan wʉtbej,
María,
Magdala paklowaxpijow,
asaow Maríabej,
kaxa fʉlaechlisi patʉpanwʉaj taeliajwa.
2 Japi wathoꞌ fol wʉt,
chalechkal sat xabich najaet.
Jawʉt Dios pej-ángel fʉloek.
Pask wʉt patʉpanwʉajxotsik,
japa-iaꞌt,
pinjit,
matriamanlison kaelel.
Do jawʉt,
Dios pej-ángel ek japa-iaꞌtmatwʉajtat.
3 Dios pej-ángel pona xabich nakthian.
Me-ama chamax kaliaf wʉt,
jakaliaf-aechon.
Sumta-otox xabich papoeikolax.
4 Soldaw,
wesfʉlpi patʉpanwʉaj,
taen wʉti Dios pej-ángel,
japi soldaw xabich tathʉlal pejlewt.
Do jawʉt,
satat oeljabapi.
Me-ama tʉp wʉt,
ja-aechi.
5 Do jawʉt,
ángel jʉm-aech japi wathoꞌliajwa:
—¡Nabej nejlewleꞌ!
Xan matabijtax xamal wʉlwekam taeliajwam patʉpan Jesús,
kematamatlaspon cruztat tʉpaliajwa.
6 Amxot ajillison.
Japon mat-echlison pejme dukaliajwa,
me-ama chajia jʉm-aechon.
¡Xabʉaꞌdin xamal najut taeliajwam ochxoton!
7 Tae-emil wʉt patʉpan,
¡xamal xabʉaꞌde japon pejnachala poxade japi chapaeliajwam!
¡Jʉm-amo Jesús pejnachala:
‘Cruztat tʉpon mat-echlison.
Amwʉtjel pejme duklison.
Xamal wʉajna japon wʉajnaxaech Galilea tʉajnʉxotde.
Jaxotde Jesús taeyaxaelam’ —amo pejnachala!
Japox xan jʉmchiliajwan Dios nabʉxtoꞌa xamalliajwa —aech ángel japi wathoꞌliajwa.
8 Do jawʉt,
japi wathoꞌ bichakal fʉlaech Jesús pejnachala poxade,
Jesúsliajwa ja-aechpox chapaeliajwapi.
Japi wathoꞌ xabich beljow.
Pe jawʉtbej,
xabich nejchachaemili.
9-10 Nʉamtat fol wʉtfʉki,
Jesús chalechkal natulaelt japi wathoꞌ pejwʉajnalel.
Jesús moi-aech japi wathoꞌliajwa.
Do jawʉt,
japi wathoꞌ mox soepa Jesúsxot.
Brixtat nuili Jesús pejwʉajnalel,
xabich sitaen xoti.
Jesús thijaeltas wʉt,
jʉm-aechon japi wathoꞌliajwa:
—¡Xabʉaꞌde tajnachala poxade chapaeliajwam xan nataenampox!
¡Tajnachala jʉm-amde Galilea tʉajnʉ poxade fʉlaeliajwapi!
Jaxotde xan nataeyaxaeli —aech Jesús,
japi wathoꞌ bʉxtoꞌa wʉton.
Soldaw wesfʉlpi patʉpanwʉaj, japi chapaeipox judíospaklochowxot
11 Wathoꞌ fʉlaech wʉtfʉk,
do jawʉtbej,
soldaw weti patʉpanwʉaj,
asew japixot soldaw,
fʉlaechbej Jerusalén paklowax poxade.
Jaxotde paꞌa wʉt,
japi soldaw chapaeilisi sacerdotespaklochowxot puexa japi taenpoxan,
jʉmtaenpoxanbej,
Jesúsliajwa.
12 Do jawʉt,
paklochow fʉlaech judíos-ancianos poxade nospaeliajwa,
japi sʉapich,
kaenejchaxoelaxliajwa japoxliajwa.
Do jawʉx,
japi paklochow moti xabich plata soldaw kichachajbaliajwa jiw.
13 Paklochow jʉm-aech soldawliajwa:
—¡Jʉm-amo jiw:
‘Madoi,
xanal moejtax wʉt,
Jesús pejnachala fʉlaen patʉpan natkowaliajwa.
Japox ja-aech xanalliajwa’ —amo puexa jiwliajwa!
14 Pilato japox wʉltaen wʉt,
xanal nospaeyaxaelen,
Pilato sʉapich.
Ja-aech wʉt,
xamal bʉꞌwʉajan jilaxaelam —aech paklochow soldawliajwa.
15 Do jawʉt,
soldaw ow-aechlisi japoxliajwa.
Samata,
kenoti plata.
Jawʉt japi soldaw chapaefʉl,
me-ama paklochow bʉxtoꞌas.
Samata,
judíos xabich chapaefʉl japawʉajan potʉajnʉcha.
Amwʉtjelbej japawʉajan nakiowa chapaefʉlfʉki.
Jesús toꞌapox pejnachala, japi naewʉajnaliajwa jiw
16 Do jawʉx,
xanal onsan pejnachalwan fʉlaechx Galilea tʉajnʉ poxade.
Jaxotde paꞌax wʉt,
fʉlaechx pinamʉax poxade,
Jesús natoꞌamʉax poxade.
17 Jaxotde xanal Jesús taenx.
Do jawʉt,
brixtat nuilx japon pejwʉajnalel,
xabich sitaenx xot.
Xanalxot asew jiw chiekal naexasis-eli,
Jesús tʉp wʉt mat-echpox pejme dukaliajwa.
18 Do jawʉtbej,
Jesús mox soepan xanalxot.
Jʉm-aechon:
—Taj-ax Dios natapaei puexa jiw tatoꞌlaliajwan,
ampathatpijiw,
athʉxotsepibej.
19 Samata,
¡xamal potʉajnʉcha jiw naewʉajnafʉlde!
Naexasit wʉti taj-ax Dios,
xan tajwʉajan naexasit wʉtbejpi,
jawʉt japi jiw bautisaxaelam taj-ax Dios pijaxtat,
xan Dios paxʉlnan pijaxtatbej,
Espíritu Santo pijaxtatbej.
20 ¡Xamal naewʉajande asew jiw naexasisliajwa puexa xan tatoꞌlaxpoxan xamalliajwa!
Xan diachwʉajnakolax xamalxotaxaelen pomatkoicha ampathatxot.
Hasta ampathat toep wʉt,
xan nakiowa xamalxotaxaelen —aech Jesús xanal pejnachalanliajwa.