Patʉpan Jesús mat-echpox pejme dukaliajwa
16
Do jawʉx,
napatamatkoi toep wʉt,
juimt tujop wʉt,
María Magdalena paklowaxpijow,
asaow Maríabej,
japow Santiago pen,
Salomé sʉapich,
xabejasapan wʉajti patʉpan Jesús joelaliajwa.
Marcos 16.1-20
2 Kandiawasap wʉt,
dominkomatkoi wʉt,
juimt julan wʉt,
japi wathoꞌ fʉlaechlisi patʉpan och poxade.
3 Japi wathoꞌ nʉamtat fol wʉt,
nakaewa najʉm-aechi:
—Patʉpan Jesús ochxot,
japawʉaj fakaꞌch iaꞌt,
pinjitat.
¿Achankat japot iaꞌt wʉlnakwematariaman xatis leliajwas patʉpanwʉaj?
—na-aechi nakaewa.
4 Pe pat wʉti patʉpanwʉajxot,
japi wathoꞌ taen iaꞌt fafatat nuka-elpox.
Asalelaxach nukox.
5 Samata,
japi wathoꞌ low patʉpan ochxot.
Jaxot kaen pansian taeni.
Ekon poklalel.
Naxoelox xabich papoeyax.
Pakchowaxbejpox.
Japi wathoꞌ beljow,
taen wʉti papoeyax naxoelan.
6 Do jawʉt,
japon pansian jʉm-aech:
—¡Nabej belweꞌ!
Xan matabijtax,
xamal fʉlaeman Jesús Nazaret paklowaxpijin taeliajwam,
japon kematamatlaxtat cruztat tʉpon.
Pe Jesús mat-echlison.
Pejme amwʉtjel duklison.
¡Taem chiekal ochxot!
Amxot ajillison.
7 ¡Xabʉaꞌde japon pejnachala poxade japi chapaeliajwam!
Chapaeyam wʉt,
¡Pedrobej chapaem!
¡Jʉm-amopi:
‘Xamal wʉajna Jesús wʉajnaxael Galilea tʉajnʉ poxade.
Jaxotde Jesús taeyaxaelam.
Me-ama chajia jʉm-aechon xamalliajwa,
jachiyaxaelon’ —amopi,
chapaeyaxaelam wʉt!
—aech ángel.
8 Japi wathoꞌ japox jʉmtaen wʉt,
jaxot nakolapi.
Do jawʉt,
dʉkplisi.
Do jawʉtbej,
xabich tathʉlal,
beljow xoti.
Chapae-eli asew jiw,
xabich pejlewla xoti.
Jesús natulaeltpox María Magdalena paklowaxpijowxot
9 [Napatamatkoi toep wʉt,
dominkomatkoiliajwa nalian wʉt,
Jesús mat-ech pejme dukaliajwa.
Mat-ech wʉt,
matxoela natulaelton María Magdala paklowaxpijowxot.
Jesús,
tʉpa-el wʉtfʉk,
siete dep nakolax toꞌapon japow pejmatpʉatxot.
10 María taen wʉt Jesús,
jawʉt fʉlaechow Jesús pejnachala poxade.
Japi wʉajna now,
nejxaejwas xoti Jesúsliajwa.
Jawʉt María chapaei taenpox.
11 Jʉm-aechow:
—¡Jesús mat-echlison!
¡Amwʉtjel pejme duklison!
¡Xan tajut chiekal taenx Jesús!
—aechow.
Pe Jesús pejnachala naexasis-el japow chapaeipox Jesús taenpoxliajwa.
Jesús natulaeltpox kolenje pejnachalanxot
12 Do jawʉx,
Jesús natulaelt kolenje pejnachalanxot,
japi laelp wʉt paklowax tathoetlel.
Jesús natulaelt wʉt,
me-ama asan wʉt,
jakabʉan-aechon japixot.
13 Do jawʉx,
japi kolenje nawia asew pejnachala poxade chapaeliajwa taenpox.
Japibej naexasis-esal,
chapaei wʉti Jesús taenpox.
Jesús toꞌapox pejnachala, japi naewʉajnaliajwa jiw
14 Do baxael,
Jesús natulaelt once pejnachalaxot,
japi naxael wʉt.
Jaxot Jesús lot pejnachala.
Lot wʉt,
jʉm-aechon japiliajwa:
—¿Ma-aech xotkat xamal naexasis-emil?
¿Ma-aech xotbejkat matnaetinkam naexasisliajwam asew jiw,
xamalxot nataeni,
chapaei wʉti xamal:
‘¡Jesús mat-echlison!
¡Amwʉtjel pejme duklison!’
—aech wʉt japi jiw?
—aech Jesús,
lot wʉt pejnachala.
15 Jesús pejme jʉm-aech pejnachalaliajwa:
—¡Xabʉaꞌde puexa jiw naewʉajnaliajwam chimiawʉajan,
potʉajnʉchanpijiw!
16 Xan nanaexasitpi,
¡japi bautisam Dios bʉꞌweliajwas!
Asew jiw naexasis-elpi,
japilax Dios pelsaxaes infierno poxadik.
17 Xamal naexasisaxaelpi,
japi jiw tajaxtat toꞌaxaeli dep nakolaliajwa jiw pejmatpʉatanxot.
Naksiyaxaelbejpi asew jiw pejjamechan,
majt matabija-eljamechan naksiyaliajwa.
18 Japi jom jaela wʉt,
liklaxisal.
Veneno af wʉtbej,
tʉpaxili.
Jiw bʉꞌxaeya boejthʉsaxael,
pejke-etat jacha wʉt —aech Jesús pejnachalaliajwa.
Jesús bʉꞌfospox athʉ poxase
19 Do jawʉx,
Jesús wajpaklokolan,
naksiyax bʉxtoet wʉt pejnachalaliajwa,
Dios bʉꞌfoslison athʉ poxase.
Ma amwʉtjel Jesús ek Dios poklalel jiw tatoꞌlaliajwa,
Dios sʉapich.
20 Do jawʉx,
Jesús pejnachala follisi potʉajnʉcha jiw naewʉajnaliajwa.
Dolis japi naewʉajnalap chimiawʉajan,
Jesucristo pejwʉajan.
Ja-aech wʉt,
Jesús kajachawaesfʉl pejnachala.
Naewʉajan wʉti chimiawʉajan,
isbejpi koechaxan.
Samata,
jasoxtat xabich jiw matabija chimiawʉajan diachwʉajnakolaxpox.]
Marcos -créditos