—¡Abraham! —aech Dios.

Abraham jʉmnot wʉt, jʉm-aechon ampox Diosliajwa:

—Xan ma amxotan —aech Abraham Diosliajwa.

2 Dios pejme jʉm-aech ampox Abrahamliajwa:

—Naxʉlan, kaenkolanpon, japon Isaac, xabich nejxasinkampon, bʉflaem Moriah tʉajnʉ poxade. Jaxotde paꞌmich wʉt, xam itpaeyaxaelen pinjiyax mʉax. ¡Japamʉaxxot isde ofrenda xanliajwa! ¡Jaxotde naxʉlan Isaac xʉaꞌlaxaelam bosliajwam xan taj-ofrendaliajwa! —aech Dios Abrahamxot.

Abraham ow-aech Dios kitoꞌaspox. 3 Dolis kandiawa wʉt, nalian wʉt, Abraham chajia nansap wʉt, i tasiapapon. Do jawʉx, Abraham bur matakʉ i xalaeliajwa. Jawʉt, Abraham bʉꞌfol kolenje pamakan. Bʉꞌfolbejpon Isaac. Do jawʉt, Abraham fʉlaech Dios jʉmtis poxade. 4 Jawʉt foli, tres matkoi, Abraham atʉaj taen Dios jʉmtisxot. 5 Jawʉt, Abraham jʉm-aech ampox kolenje pamakanxot:

—¡Xamal amxot namaem! ¡Burbej namanaxael, xamalxot! Xan, taxʉlan sʉapich, kaes wʉajnade fʉlaeyaxaechan. Jaxotde xanal isaxaelen ofrenda Diosliajwa. Do jawʉx, xanal pejme kaxa naweyaxaenan —aech Abraham kolenje pamakanxot.

6 Do jawʉt, Abraham i chafiton bʉrxotsik. Jawʉt, taka-oton i paxʉlan Isaacxot. Dolis Abraham follison, paxʉlan Isaac sʉapich. Jitdel chaxfolon, malis cha-aelsierach. 7 Jawʉt, Isaac jʉm-aech ampox paxliajwa:

—¡Ax! —aechon paxliajwa.

Abraham jʉmnot wʉt, jʉm-aechon ampox paxʉlanliajwa:

—¿Achaxkat, wʉa? —aech Abraham.

Isaac jʉmnot wʉt, jʉm-aechon ampox:

—Ama i, jitdelbej. Pe, ¿amekat cordero Dios pej-ofrendaliajwa? —aech Isaac paxliajwa.

8 Abraham jʉmnot wʉt, jʉm-aechon ampox paxʉlanliajwa:

—Dios nakchaxdusaxael cordero ofrenda isliajwas —aech Abraham paxʉlanliajwa.

Dolisi fʉlaechlisi.

9 Pat wʉti Dios jʉm-aechxot, jawʉt Abraham iaꞌ sumta-efʉl altar isliajwa. Do jawʉx, i owapon altarmatwʉajtat. Do jawʉt, Abraham paxʉlan mʉaxmatakʉ wʉton, oton imatwʉajtat. 10-11 Xʉaꞌlaliajwa wʉt paxʉlan Dios pej-ofrendaliajwa, jawʉt Abraham Dios luekson athʉsik. Dios jʉm-aech ampox Abrahamliajwa:

—¡Abraham! ¡Abraham! —aech Dios.

Abraham jʉmnot wʉt, jʉm-aechon ampox Diosliajwa:

—Xan ma amxotan —aech Abraham.

12 Jawʉt, Dios jʉm-aech ampox Abrahamliajwa:

—¡Naxʉlan nabej xʉaꞌleꞌ! Xan chiekal matabijtax xam naxanaboejtampox, kamta na-ow-am xot, naxʉlan kaekolanpon xʉaꞌlax kitoꞌax wʉt —aech Dios Abrahamliajwa.

13 Jawʉt, Abraham natachaemt wʉt, taenon kaen ovejapoi, mat-exawaet wʉt cha-aelnaedalanxot. Jawʉt, Abraham fʉlaech oveja, mat-exawaetpon, jaelsliajwa. Abraham oveja jaelt wʉt, xʉaꞌlapon. Jawʉt, Abraham bot oveja altarmatwʉajtat jitat Dios pej-ofrendaliajwa. 14 Abraham japamʉax wʉlduw ampawʉltat: “Dios nakchaxdut nakweweꞌpox”. Samata, ma amwʉt, jiw nakiowa jʉm-aechfʉki ampox: “Dios pejmʉaxxot Dios nakchaxdut nakweweꞌpox” —aechfʉki.

15 Do jawʉt, Abraham pejme luekson Dios pej-ángel athʉlelsik. 16-17 Dios pej-ángel jʉm-aech ampox Abrahamliajwa:

—¡Naeweꞌe Dios jʉm-aechpox xamliajwa: ‘¡Naxʉlan xʉaꞌlaxaelam taj-ofrendaliajwa!’ —an wʉt, xam kamta na-ow-am! Samata, xan jʉm-an ampox xamliajwa: ‘¡Xan tajut diachwʉajnakolax xam kajachawaesaxaelen. Samata, xamxot jʉmdutx xabichaliajwa namojiw. Me-ama itthaej xabichpi thatbaxoxot, jachiyaxaellap-is namojiw. Me-ama thaejbelinbej xabich marbabʉꞌxot, jachiyaxaellap-is namojiw. Namojiw majt xabich nabeyaxael, padaelmajiw sʉapich, japatʉajnʉ kifeꞌnaliajwa. Do jawʉx, namojiw duilaxael padaelmajiw pejkawʉtat. 18 Puexa asatʉajnʉchanpijiw kajachawaesfʉlaxaes namojiw pijaxtat, xam chiekal nanaexasitam xot, kitoꞌax wʉt’ —an xan xamliajwa —aech Dios xamliajwa! —aech Dios pej-ángel Abrahamliajwa.

19 Do jawʉx, Abraham, Isaac sʉapich, nawenpi pamakjiw, namapi, poxadin. Do jawʉt, puexa fʉlaech wʉti Beerseba poxade, jaxot Abraham namanlison dukaliajwa puexa pejjiw sʉapich, puexa pamakjiw sʉapichbej.

20 Do baxael, Abraham wʉltaen pakoewan Nacor xabichpox paxi pijow Milcaxot. Japow ocho paxipow. 21 Matxoelapijin pawʉl Uz. Wachakalpijin pawʉl Buz. Terceropijin pawʉl Kemuel. Japonlap Aram pax. 22 Do Kemuelwʉx, kaes cinco pakoew nalaela. Kaen pawʉl Quesed. Asan pawʉl Hazo. Asan pawʉl Pildas. Asan pawʉl Jidlaf. Asan pawʉl Betuel. 23 Betuellap Rebeca pax. Japi, Nacor paxi, ocho poejiw. Japi nalaelapi Milcaxot.

24 Nacor kaesbejpon paxi, asaow pijowtat. Japow pawʉl Reúma. Japi cuatro paxipi poejiw. Kaen pawʉl Teba. Wachakalpijin pawʉl Gaham. Terceropijin pawʉl Tahas. Taxdukapijin pawʉl Maaca.