Sara tʉpox
23
1-2 Sara laeja ciento veintisiete waechan. Jaswaechan sʉapich laeja wʉt, asamatkoi Sara tʉp Quiriat-arba paklowaxxot, Canaán tʉajnʉxot. Ma amwʉtjel, japapaklowax, pawʉl Hebrón. Abraham xabich wʉnow, pijow Sara tʉp wʉt, xabich nejxaejwas xoton. 3 Do jawʉt, Abraham, pijow, patʉpow, cha-ot wʉt, fʉlaechon nospaeliajwa, hititas sʉapich, japilap jaxot mox duil. 4 Jaxotde pat wʉt, Abraham jʉm-aech ampox hititasxot:—Xan asatʉajnʉpijnan. Pe ma amwʉtjel, dukx nejtʉajnʉxot. ¡Xanxot sat mowim, tajow, patʉpow, mʉthsliajwan! —aech Abraham hititasxot.
5 Japi hititas jʉmnot wʉt, jʉm-aechi ampox Abrahamxot:
6 —Tajpaklon, ¡xam chiekal nanaeweꞌe! Xanalxot Dios makafit xam, tajpaklonaliajwam xanalxot. ¡Nijow mʉthde tajsatxot, kaes xamliajwa sat pachaemxot! Kaen xanalxot jʉmchiyaxil asax xamliajwa —aech hititas Abrahamxot.
7 Do jawʉt, Abraham nant wʉt, natxatdikon itpaeliajwa sitaeyax japiliajwa. 8 Jawʉt jʉm-aechon ampox:
—Diachwʉajnakolax xamalliajwa pachaem wʉt xan tajow mʉthsliajwan nejsatxot, ja-aech wʉt, ¡xamal nospaem, Efrón sʉapich, japon Zohar paxʉlan! 9 ¡Japon jʉm-amde mowaliajwa mʉaxwʉaj xanxot, sat pawʉlxot, Macpela! Japamʉaxwʉaj xabich mox Efrón pejsat matdukafʉlxot. Xan mosaxaelen jas-om sʉapichpox mʉaxwʉajliajwa. Ja-aech wʉt, japamʉaxwʉaj xan tajmʉaxwʉajaxael, asamatkoi, tajjiw tʉp wʉt mʉthaliajwan jaxot —aech Abraham hititasxot.
10 Efrón, hitita-aton, japon-is jaxot. Samata, japon pajut jʉmnot wʉt Abrahamxot, jʉm-aechon ampox puexa jiw chiekal jʉmtaeliajwa, asew xaxenapibej paklowax laleyaxxot:
11 —¡El, tajpaklon! Xan malech chaxdusaxaelen japasat, mʉaxwʉaj sʉapich. Puexa tajjiw amxotpi jʉmtaen xan malech chaxdusaxaelenpox japasat xam. ¡Nijow, patʉpow, mʉthde jaxot! —aech Efrón.
12 Pe Abraham pejme natxatdik puexa hititas wʉajnalel itpaeliajwa sitaeyax. 13 Jawʉt, Abraham jʉm-aech ampox Efrónxot, puexa jiw jʉmtaeliajwa:
—¡Xam chiekal naeweꞌe! Xan wʉljowx plata nakifisliajwam japasat-omliajwa. Do jawʉx, tajow mʉthsaxaelen jaxotde —aech Abraham Efrónxot. 14 Do jawʉt, Efrón jʉmnot wʉt, jʉm-aechon ampox Abrahamxot:
15 —Tajpaklon, ¡chiekal nanaeweꞌe! Sat pa-om jʉmch cuatrocientos platafachan. Jas-om sʉapichpoxliajwa, kaes asax najʉmchiyaxisal. ¡Ma amwʉt mʉthde nijow, patʉpow! —aech Efrón toꞌa wʉton Abraham.
16 Do jawʉt, Abraham ow-aech mosliajwa jas-om sʉapichpox sat. Samata, Abraham moton Efrón cuatrocientos platafachan, puexa hititas wʉajnalel. 17-18 Jasoxtat Efrón pejsat mowa, mʉaxwʉaj sʉapich, Abrahamxot. Japasat pawʉl Macpela. Chamowabejpon jaxot naechan nuili. Japasat Mamre pej-orientelel. Puexa jaxotpijiw pajut chiekal taen Abraham wʉajt wʉt sat Efrón xot.
19 Do jawʉx, Abraham pijow Sara, patʉpow, mʉthton mʉaxwʉajxot. Japasat pawʉl Macpela, Mamre orientelel. Mamre mox Hebrón paklowaxxot, Canaán tʉajnʉxot. 20 Jasoxtat Abraham sat wʉajt wʉt, chawʉajtbejpon mʉaxwʉaj asamatkoi pejjiw tʉp wʉt mʉthaliajwa japamʉaxwʉajxot. Majt hititas pejsat. Pe ma amwʉtjel, Abraham pejsat.