—Tajpaklochiw, ¡xamal xabʉat tajba poxade, jaxotde tʉakan kiasliajwam, moejsliajwambej! Jelow kandiawasap chajia foelwam xamal —aech Lot japi koleljexot.

Pe japi, kolenje, jʉmnot wʉt, jʉm-aechi ampox Lotxot:

—¡El! Xanal ma amxot chanlianaxaelen paklowaxthialaxxot —aechi Lotxot.

3 Pe nakiowa, Lot jʉmbisnik wʉt, japi baxael ow-aechlisi. Jawʉt, nakfʉlaechlisi Lot pejba poxade. Pat wʉti jaxot, Lot kitoꞌa pamakjiw chimianaxaeyax isliajwa japiliajwa. Jawʉt, isbejpi pan, levadurajila, pati xaeliajwa. Puexa chiekal toejaf wʉt, japi xaellisi.

4 Jelpati oela-el wʉtfʉk moejsliajwa, puexa poejiw, Sodoma paklowaxpijiw, masajiati Lot pejba. Japi poejiwxot, xabich pansiachiw, hasta kaes pakdiachiwpibej. 5 Japi pinjametat jʉm-aech ampox Lotliajwa:

—¿Amxotkat japi poejiw, pati nejbaxot ampamadoitat? ¡Japi toꞌim tathoetadin! ¡Xanal japi bʉꞌmoejsasian! —aech japi jiw.

6 Lot nakolde wʉt, bafafa chiekal xatbeꞌton. 7 Do jawʉt, Lot jʉm-aech ampox japiliajwa:

—Tajjiw, ¡japox, xabich babijax, nabej is japiliajwa! 8 Xan koliowje taxʉlow. Japi chinax poejiw bʉꞌmoejs-esal. Japi jukaxaelen isasiampoxan isliajwam japiliajwa. Japi poejiw, tajbatat patpi, xan tadʉtx japi. Samata, ¡japi mastaem! ¡Nabej is babijax japiliajwa! —aech Lot Sodoma paklowaxpijiwliajwa.

9 Pe japi jawʉt, jʉmnot wʉt, jʉm-aechi ampox Lotliajwa:

—¡Xam napiꞌe jaxot! ¡Xanal naweweꞌpa-el asatʉajnʉpijin, me-ama xam, jason, xanal natatoꞌlaliajwa! Ma amwʉt, xanal kaes pejme xabich babijax isaxaelen xamliajwa. Me-ama xamxot patpiliajwa, jachiyaxinil —aech japi jiw Lotliajwa.

Do jawʉt, japi jiw fiꞌsabapi Lot bafafalel. Jawʉt, japi jiw moxde bafafa jalaliajwa, leliajwabej. 10 Jawʉt, Lotxot patpi, japi batutatpi, batuxotdin fafaꞌchapi. Ja-aech wʉt, Lot jaelti doꞌchaliajwadin batuleldin. Lot batuxot wʉt, ba chiekal fakaꞌlapi. 11 Jawʉt, puexa, japi jiw tathoetat, chalechkal itliakal, Dios pej-ángeles kitis xot. Puexa, japi pansiachiw, pakdiachiwbej, chiekal itliakal. Itliakal wʉt, japi xajʉpa-el faenaliajwa bafafa. 12 Do jawʉt, jaxot pati jʉm-aechi ampox Lotxot:

—¿Xamkat kaes nejjiw ampapaklowaxxot? Nejjiw wʉt, ma amwʉt ¡tathoetlel atʉaj bʉflaem! ¡Puexa naxi, nafamjiwaxaelpibej, japibej bʉflaem atʉaj! 13 Xanal toejafaxaelen ampapaklowax. Dios wʉltaen ampapaklowaxpijiw, xabich babijaxan ispoxan. Samata, xanal natoꞌa chiekal toejafaliajwan ampapaklowaxpijiw, xabich babijaxan is xoti —aech japi, kolenje Dios pej-ángeles.

14 Do jawʉt, Lot fʉlaech koliowje paxʉlow pejbabijnowpi wʉljaesliajwa. Japixot pat wʉt, jʉm-aechon ampox:

—¡Xabʉaꞌlejen! ¡Chijiamde ampapaklowaxxot! ¡Ampapaklowax Dios chiekal toesaxael! —aech Lot.

Pe Lot pafamjiwaxaelpilach, japi naexasis-el Lot jʉm-aechpox. 15 Do kandiawasap, nalianafʉl wʉt, Dios pej-ángel jʉm-aech ampox Lotxot:

—¡Thilde! ¡Xabʉatlejen! Nijow, naxʉlow koliowje, ¡bʉflaem paklowax tathoetlel naktʉpa-elaliajwam ampi jiw sʉapich, xanal jiw kastikax wʉt ampapaklowaxpijiw! —aech Dios pej-ángeles Lotxot.

16 Pe Lot nejthis-el wʉt, Dios pej-ángeles makxafoslison jʉmch, Dios beltaen xot Lot. Jawʉt, bʉꞌfolbejpi Lot pijow, malis Lot paxʉlow, koliowje. Japi bʉꞌfos paklowax tathoetlel weliajwa. 17 Paklowax tathoetlel wʉt, kaen Dios pej-ángel jʉm-aech ampox:

—¡Dʉkpde weliajwam! ¡Kaxa nejkawʉlel nabej wʉltatae-am! ¡Nuilaximilbej yotat! ¡Xabʉaꞌde pinamʉaxan poxade, tʉpa-elasiam wʉt! —aech Dios pej-ángel.

18 Pe jawʉt, Lot jʉm-aech ampox kolenje Dios pej-ángelxot:

—¡El, tajpaklochiw! ¡Xan nabej natoꞌe pinamʉaxan poxade! 19 Diachwʉajnakolax xamal xabich nakajachawaetam xan. Xamal xabich pachaemam, nabʉꞌwiam xot xanal tʉpa-elaliajwan. Pe xanal pinamʉaxan poxade fʉlaeyaxinil, japamʉaxan xabich atʉaj xot. Nʉamfatat jit nafʉlpasaxael xanal, xamal toejafam wʉt ampapaklowax. 20 ¡Taeꞌnik! Amxot mox cha-aelpaklowaxach. ¡Nej japoxandax xanal weliajwan! Diachwʉajnakolax japapaklowax, cha-aelaxach —aech Lot.

21 Do jawʉt, Dios pej-ángel jʉm-aech ampox:

—Jʉmtaenx xam najʉm-ampox. Xam tapaeyaxaelen nawʉljowampox. Samata, toejafaxinil japapaklowaxach. 22 ¡Pe bichakal fʉlaem kamta pasliajwamlejen japapaklowaxach! Xanalfʉk toejafaxinil asapaklowaxan, xamal pas-emil wʉtfʉk japapaklowaxach —aech Dios pej-ángel Lotxot.

Lot jʉm-aech xot ampox: “Japapaklowax, cha-aelaxach” —aech xoton, samata, japapaklowax pawʉl Zoar.

23-24 Juimt julan wʉt, Lot pat wʉt Zoar paklowaxachxot, Dios toꞌik azufre tamdadutpi natacholnaliajwa, me-ama iam thilna wʉt, jachiliajwa Sodoma paklowaxxot, Gomorra paklowaxxotbej.^a 25 Jawʉt, Dios chiekal toejaf japapaklowaxan, puexa jiwbej, chiekal toejafas. Dios toejafbej puexa yotatpi. 26 Pe Lot pijow wʉchakal fol wʉt, kaxa kawʉlel wʉltataen wʉt, jawʉt japowlap jaxot domt nadofa, naexasis-el xotow Dios pej-ángel jʉm-aechpox. Japox domt nadofapox, atow kabʉan-aechpox. Pelis domtax.

27 Kandiawasap wʉt, Abraham pejcarpabaxot nakolt wʉt, fʉlaechon, majt, Dios sʉapich, nospaei poxade. 28 Jaxotde wʉt, taenpon Sodoma paklowax, Gomorra paklowabej, puexa japayobej, puexa tʉajnʉchan xabich itnuman nakolapox. 29 Ja-aech japapaklowaxan, Dios toejaf wʉt majt Lot dukpaklowaxxot. Dios nejchaxoel xot Abraham wʉljowpoxliajwa pachaempi toejafa-elaliajwa, Lot bʉꞌwiapon, koliowje paxʉlow sʉapich, Dios toejaf wʉt japapaklowaxan.

30 Do jawʉx, Lot pejlewla kaes dukaliajwa Zoar paklowaxachxot. Samata, koliowje paxʉlow sʉapich, chijiapon jaxotde pinamʉaxwʉaj poxade dukaliajwa paxʉlow koliowje sʉapich. Pinamʉaxxotlap Lot duk koliowje paxʉlow sʉapich, pin-iamatkoiyan duili japamʉaxwʉajxot. 31 Asamatkoi, Lot paxʉlow, matxoelapijow, jʉm-aech ampox pakoewow, wachakalpijowxot:

—Xatis waj-ax xabich patiꞌin. Asamatkoi, japon tʉp wʉt, waelaxilon pamojiw. Ijilbej ampatʉajnʉxot xatis nosliajwas poejiw, me-ama xatis wajkabʉan wajxiliajwa. 32 Waj-ax chaxsaxasaxaes xatis bʉꞌmoejsliajwas. Ja-aech wʉt, wajxiyaxael japon pijaxtat —aech matxoelapijow wachakalpijowxot.

33 Do japamadoitat wʉt, pax dʉajti vino. Saxtas wʉt, matxoelapijow nakmoejtow pax. Pe pax chinax japox matabijs-el, japow nak-ok wʉt, nant wʉtbejpow. 34 Kandiawa wʉt, matxoelapijow jʉm-aech ampox wachakalpijowxot:

—Kaeliw madoi, xan waj-ax nakmoejtax. Amwʉt ampamadoitat, waj-ax pejme chaxsaxasaxaes xam nakmoejsliajwam. Ja-aech wʉt, xatis koliowas wajxiyaxael waj-ax pijaxtat —aech matxoelapijow.

35 Do jawʉt, japamadoitat, pejme pax dʉajti vino. Saxtas wʉton, wachakalpijow pax nakmoejt. Paxʉlow nakmoejt wʉt, pax chinax japox matabijs-elon. Tae-elbejpon, paxʉlow jaxot nant wʉt. 36 Ja-aech wʉt, Lot paxʉlow koliowje moejowpi pax pijaxtat.

37 Do baxael, matxoelapijow naxʉwal wʉt, faenow poich. Japon pawʉl Moab. Baxael, japonlap asamatkoi, puexa moabitas pejchapamaxael. 38 Wachakalpijowbej naxʉwal wʉt, faenow poich. Japon pawʉl Ben-ammí. Japonlap-is, baxael, asamatkoi, puexa amonitas pejchapamaxael.